ភ្នំពេញ ៖ នាយនគរបាលខណ្ឌច្បារអំពៅបានប្រាប់កម្ពុជាថ្មីថា ឃាតក ដែលសម្លាប់យុវជនម្នាក់កាលពីយប់រំលងអធ្រាត្រ ថ្ងៃទី ខែកក្កដា នៅតាមបណ្តោយផ្លូវ៣៦៩ក្បែរស្ពានអ្នកតាវាំងក្នុងភូមិព្រែកថ្មី សង្កាត់ព្រែកថ្មី ខណ្ឌច្បារអំពៅបណ្ដាលឲ្យជនរងគ្រោះស្លាប់នោះ គឺសមត្ថកិច្ចមានពន្លឺក្នុងការបង្ក្រាបក្រុមឃាតកហើយ។
នគរបាលបាននិយាយថា មកដល់ថ្ងៃទី២១ ខែកក្កដានេះ សមត្ថកិច្ច បានឃាត់ខ្លួនជនសង្ស័យម្នាក់ក្នុងចំណោមបក្សពួកឃាតក យកមកសាកសួរដើម្បីឈានដល់ការបង្ក្រាបទាំងក្រុមតែម្តង។
នគរបាលបានបន្តថា ក្នុងប្រតិបត្តិការ នេះគឺមានការចូលរួមពីនគរបាលព្រហ្មទណ្ឌកម្រិតធ្ងន់នៃស្នងការដ្ឋានរាជធានីភ្នំពេញផងដែរ។ សមត្ថកិច្ចបានរំលឹកពីហេតុការណ៍ ឃាតកម្មនេះថា កាលពីវេលាម៉ោង១២និង២០នាទីរំលងអធ្រាត្រជនរងគ្រោះឈ្មោះប៉ូ រិទ្ធី ភេទប្រុស អាយុ២៦ឆ្នាំ មុខរបរជាកម្មករសំណង់មានស្រុកកំណើតភូមិកណ្តាលកោះ ឃុំកោះអន្លង់ចិន ស្រុកស្អាង ខេត្តកណ្តាល បានជិះម៉ូតូម៉ាកMSX ពណ៌ទឹកក្រូចពាក់ស្លាកលេខភ្នំពេញ1GJ 82 18ត្រឡប់មកពីហូបការបងស្រីបង្កើតនៅឯស្រុកកំណើត។ ជនរងគ្រោះបានឆ្លងកំពង់ដមួយមកសង្កាត់ព្រែកថ្មី។ លុះចេញពីកំពង់ដ បានបន្តិចម៉ូតូជនរងគ្រោះបានអស់សាំង ធ្វើឲ្យជនរងគ្រោះបណ្ដើរតាមផ្លូវ៣៦៩មកដល់ក្បែរស្ពានអ្នកតាវាំងស្ថិតក្នុងភូមិព្រែកថ្មី សង្កាត់ព្រែកថ្មី ខណ្ឌច្បារអំពៅ ក៏ស្រាប់តែលេចមុខឃាតកមកកាប់ជនរងគ្រោះចំ ចំហៀងកខាងឆ្វេងបណ្តាលឲ្យរងរបួសធ្ងន់ ហើយត្រូវបានប្រជាពលរដ្ឋនៅក្បែរចំណុចកើតហេតុបានទូរសព្ទ័ហៅរថយន្តសាមុយដឹកយកទៅមន្ទីរពេទ្យ ប៉ុន្តែដឹកដល់ពាក់កណ្តាលផ្លូវជនរងគ្រោះ បានដាច់ខ្យល់ស្លាប់ ទើបរថយន្តសាមុយដឹកយកមកទុកនៅចំណុចកើតហេតុវិញ។
សមត្ថកិច្ចក៏បានធ្វើការស្រាវជ្រាវដ៏ក្តៅគគុកដើម្បីចាប់ខ្លួនឃាតកយកមកផ្ដន្ទាទោសតាមច្បាប់ឲ្យទាល់តែបាន៕
Source: Kampuchea Thmey Daily
0 Comments