ក្រុមអ្នកមុជទឹកកាលពីថ្ងៃសុក្រ បានយកសពចុងក្រោយចេញពីបំណែកនៃទូកដែលបានលិចកាលពីថ្ងៃព្រហស្បតិ៍ក្នុងអំឡុងពេលមានព្យុះនៅបឹងមួយក្នុងរដ្ឋ Missouri ដោយបានសម្លាប់មនុស្សចំនួន១៧នាក់ រួមទាំងសមាជិកប្រាំបួននាក់នៅក្នុងគ្រួសារតែមួយផងដែរ។
ទូកដែលយកស្ទីលតាមបែបសង្គ្រាមលោកលើកទីពីរមួយនេះគឺមានផ្ទុកអ្នកដំណើរចំនួន៣១នាក់រួមទាំងកុមារផងដែរនៅពេលព្យុះមួយបានវាយប្រហារបឹង Rock Lake នៅខាងក្រៅទីក្រុង Branson ។ ព្យុះនេះបានបង្កើតរលកដែលបណ្តាលឲ្យទូកក្រឡាប់នៅក្នុងសោកនាដកម្មវិស័យទេសចរណ៍សម្លាប់មនុស្សច្រើនបំផុតមួយរបស់អាមេរិកក្នុងរយៈពេលច្រើនឆ្នាំមកនេះ។
លោកស្រី Tia Coleman បាននិយាយថា នាងនិងក្មួយប្រុសរបស់នាងគឺជាអ្នកនៅរស់រានមានជីវិតតែពីរនាក់គត់មកពីសមាជិក១១នាក់នៃគ្រួសាររបស់ពួកគេដែលបានធ្វើដំណើរទេសចរណ៍ “Ride The Ducks”។
លោកស្រី Coleman បានប្រាប់ទូរទស្សន៍ Fox 59 ពីគ្រែមន្ទីរពេទ្យរបស់នាងក្នុងទីក្រុង Branson ថា “ខ្ញុំបានបាត់បង់កូនទាំងអស់របស់ខ្ញុំ ខ្ញុំបានបាត់បង់ស្វាមីរបស់ខ្ញុំនិងសមាជិកគ្រួសារផ្សេងទៀត ខ្ញុំមិនអីទេប៉ុន្តែនេះពិតជាលំបាកណាស់”។
លោកស្រីបាននិយាយថា អ្នកបើកទូកបានប្រាប់ពួកគេនៅពេលពួកគេស្ថិតក្នុងបឹងថា កុំពាក់អាវពោងដែលនេះជាសកម្មភាពមួយដែលនាងជឿថាបណ្តាលឲ្យមានការបាត់បង់ជីវិត។
អភិបាលរដ្ឋ Missouri លោក Mike Parson បាននិយាយថា មនុស្សចំនួន៧នាក់ក្នុងចំណោមអ្នករស់រានមានជីវិតចំនួន១៤នាក់បានរងរបួសដោយមានម្នាក់របួសធ្ងន់។
លោក Parson បាននិយាយនៅក្នុងសេចក្តីថ្លែងការណ៍មួយថា “អ្នកឆ្លើយតបបន្ទាន់និងអ្នកជួយសង្គ្រោះស៊ីវិលបានជួយបញ្ចៀសសោកនាដកម្មនេះកុំឲ្យកាន់តែអាក្រក់សូម្បីតែនៅពេលដែលមនុស្សប្រញាប់ប្រញាល់ទៅជួយក្នុងស្ថានភាពគ្រោះថ្នាក់ខ្លាំងក៏ដោយ”។
តម្រួតតំបន់ Stone County លោក Doug Rader បានប្រាប់ក្រុមអ្នកសារព័ត៌មានថា កាពីតែនទូកនេះបានរួចជីវិត។
អ្នកនាំពាក្យអភិបាលក្រុងលោក Kelli Jones បាននិយាយថា ជនរងគ្រោះទាំង១៧នាក់គឺមកពីរដ្ឋអាមេរិកចំនួន៦ផ្សេងៗគ្នា៕ REUTERS
Source: Kampuchea Thmey Daily
0 Comments