ភ្នំពេញ ៖ លោកឃួង ស្រេង អភិបាលនៃគណៈអភិបាលរាជធានីភ្នំពេញ រួមជាមួយមន្ត្រីពាក់ព័ន្ធ អាជ្ញាធរដែនដីនារសៀលថ្ងៃទី២១ កក្កដានេះ បានចុះពិនិត្យមើលស្ថានភាពទឹកជំនន់ទឹកភ្លៀងនិងសួរសុខទុក្ខប្រជាពលរដ្ឋ ដែលកំពុងទទួលរងការលិចលង់ផ្ទះសំបែងនៅតំបន់១ចំនួនក្នុង ខណ្ឌដង្កោ ក្រោយពីប្រជាពលរដ្ឋចំនួន២៦ភូមិ នៅក្នុងសង្កាត់ចំនួន០៩ខណ្ឌនេះ ទទួលរងការលិចលង់អស់នោះ។
លោកអភិបាលបានធ្វើដំណើរតាមអូប័រ ដើម្បីពិនិត្យមើលស្ថានភាពជំនន់ទឹកភ្លៀងតាមទីតាំងដែលលិចលង់ និងស្វែងយល់ពីតម្រូវការចាំបាច់នឹងដោះស្រាយជូនពួកគាត់ភ្លាមៗ។ លោកអភិបាលបានណែនាំឲ្យមន្ត្រីជំនាញពាក់ព័ន្ធ,អាជ្ញាធរដែនដីត្រូវរួមគ្នាគិតគូរនិងដោះស្រាយនិងដាក់ចេញវិធានការចាំបាច់ឲ្យបានទាន់ពេលវេលាជូនប្រជាពលរដ្ឋយើងដែលរងគ្រោះ រៀបចំទីទួលសុវត្ថិភាព និងរៀបចំទីតាំងស្នាក់ការកាកបាទក្រហមដែលអាចដាំស្លររួមគ្នាបានដើម្បីសម្រួលការលំបាកដល់បងប្អូននៅពេលទឹកលិចផ្ទះសម្បែង រៀបចំឲ្យមានពេទ្យប្រចាំការនៅទីតាំងរងគ្រោះដើម្បីផ្តល់សេវាសុខាភិបាលជូនពួកគាត់។
ពាក់ព័ន្ធនឹងទំនប់៧មករា (ទំនប់សណ្តរស្ទឹងព្រែកត្នោត)ដែលមានរន្ធនាគ មានទឹកហូរក្រោមទំនប់នេះលោកឃួង ស្រេង បានជំរុញឲ្យមន្ទីរធនធានទឹកប្រើគ្រឿងចក្របិទភ្លាមៗ ជៀសវាងទុកឲ្យទឹកហូរច្រោះរហូតផ្តាច់ទំនប់នោះ។
ក្រៅពីនេះ លោកអភិបាលក៏បានបញ្ជាឲ្យបញ្ជូនតង់មកឲ្យប្រជាពលរដ្ឋដែលចាកចេញពីលំនៅឋានមករស់នៅបណ្តោះអាសន្នលើទីទួលសុវត្ថិភាពផងដែរ។
បើយោងតាមការឲ្យដឹងពីសមត្ថកិច្ចមូលដ្ឋានបានបញ្ជាក់ថា គិតត្រឹមថ្ងៃទី២១ ខែកក្កដា ឆ្នាំ២០១៨នេះ សង្កាត់ដែលទទួលរងការលិចលង់ធ្ងន់ធ្ងរជាងគេ គឺ សង្កាត់សាក់សំពៅ មាន០៦ភូមិ ៤៥៤គ្រួសារ មនុស្សចំនួន២០៤៩នាក់ ស្រី១១៤៤នាក់៕
Source: Kampuchea Thmey Daily
0 Comments