កងកម្លាំងអ៊ីស្រាអែល បានបើកការវាយប្រហារសម្លាប់មនុស្សនៅទូទាំងតំបន់ហ្គាហ្សាស្ទ្រីបកាលពីថ្ងៃសុក្រ បន្ទាប់ពីទាហានម្នាក់ ត្រូវបានបាញ់សម្លាប់នៅតាមបណ្តោយព្រំដែន។
អ្នកនាំពាក្យក្រុមឥស្លាមនិយមហាម៉ាសរបស់តំបន់ហ្គាហ្សាបាននិយាយថា កិច្ចព្រមព្រៀងបទឈប់បាញ់មួយត្រូវបានឈានដល់កាលពីព្រឹកថ្ងៃសៅរ៍បន្ទាប់ពីមានការសម្រុះសម្រួលរបស់អេហ្ស៊ីបនិងអង្គការសហប្រជាជាតិដែលជាហេតុកាត់បន្ថយភាពភ័យខ្លាចនៃជម្លោះកាន់តែធំ។
កាលពីថ្ងៃសុក្រ សកម្មប្រយុទ្ធហាម៉ាសចំនួន៣នាក់ត្រូវបានសម្លាប់នៅពេលការវាយឆ្មក់ដែនអាកាសបានវាយប្រហារលើតំបន់ហ្គាហ្សាខណៈអ៊ីស្រាអែលនិយាយថា គ្រាប់រ៉ុក្កែតត្រូវបានបាញ់តបតដាក់ទឹកដីរបស់ខ្លួនវិញ។
អង្គការសហប្រជាជាតិបានអំពាវនាវដល់ភាគីទាំងអស់ឲ្យដកថយបន្ទាប់ពីការកើនឡើងភាពតានតឹងរាប់ខែខណៈជនជាតិប៉ាឡេស្ទីនទីបួនត្រូវបានបាញ់សម្លាប់អំឡុងការតវ៉ានៅតាមបណ្តោយព្រំដែនជាមួយអ៊ីស្រាអែល។
ការផ្ទុះឡើងនេះគឺជាហេតុការណ៍ចុងក្រោយបំផុតបន្ទាប់ពីការធ្វើបាតុកម្មនិងការប៉ះទង្គិចគ្នានៅតាមព្រំដែនចាប់តាំងពីខែមីនាមកបានធ្វើឲ្យប្រជាជនប៉ាឡេស្ទីនយ៉ាងតិច១៤៩នាក់ស្លាប់។
កងទ័ពបាននិយាយថា ក្រុមភេរវជនបានបាញ់សម្លាប់ទាហាននៅតាមព្រំដែនជាមួយតំបន់ហ្គាហ្សាភាគខាងត្បូងប៉ុន្តែមិនបានបញ្ចេញឈ្មោះរបស់គាត់ទេ។
អ្នកនាំពាក្យម្នាក់បានប្រាប់ AFP ថា វាជាលើកទីមួយហើយដែលទាហានអ៊ីស្រាអែលត្រូវបានសម្លាប់នៅក្នុងឬនៅជុំវិញតំបន់ហ្គាហ្សាអំឡុងប្រតិបត្តិការចាប់តាំងពីសង្គ្រាមថ្មីបំផុតក្នុងឆ្នាំ២០១៤។
យោធាអ៊ីស្រាអែលបាននិយាយថា យន្តហោះនិងរថក្រោះរបស់ខ្លួនបានតម្រង់គោលដៅលើទីតាំងរបស់ក្រុមហាម៉ាសចំនួន៤០កន្លែងហើយថា ការវាយប្រហារត្រូវបានបង្កើតឡើងជាផ្នែកមួយនៃការវាយប្រហារទ្រង់ទ្រាយធំដើម្បីឆ្លើយតបទៅនឹងការបាញ់ប្រហារនៅតាមព្រំដែន។
អ្នកឆ្លើយឆ្លងព័ត៌មានរបស់ AFP បាននិយាយថា ការវាយឆ្មក់តាមអាកាសបានបន្តចូលដល់ល្ងាចថ្ងៃសុក្រដោយមានការផ្ទុះជាច្រើននៅតាមតំបន់ផ្សេងៗនៃតំបន់ហ្គាហ្សា៕ AFP
Source: Kampuchea Thmey Daily
0 Comments