អគ្គមេបញ្ជាការកងទ័ពជើងគោក ៖ សមយុទ្ធ “ហនុមានមាស ២០១៩” មិនមែនជាការគំរាមកំហែងប្រទេសជិតខាងនោះទេ តែជាការពង្រឹងវិស័យការពារជាតិ

កំពត ៖ នាយឧត្ដមសេនីយ៍ វង្ស ពិសេន អគ្គមេបញ្ជាការកងយោធពលខេមរភូមិន្ទ បានអះអាងថា សមយុទ្ធ “ហនុមានមាស ២០១៩” មិនមែនជាការគំរាមកំហែងប្រទេសជិតខាងណាមួយនោះទេ តែជាការពង្រឹងទៅលើកងយោធពលខេមរភូមិន្ទ ដើម្បីពង្រឹងវិស័យការងារការពារជាតិ ហើយក៏បានប្រកាសប្រឆាំងដាច់ខាតចំពោះ អ្នកមានបំណងចង់បំផ្លាញសន្តិភាព និងការអភិវឌ្ឍ នៅប្រទេសកម្ពុជា។

អគ្គមេបញ្ជាការកងយោធពលខេមរភូមិន្ទ នាយឧត្ដមសេនីយ៍ វង្ស ពិសេន មានប្រសាសន៍បែបនេះ នៅក្នុងពិធីបិទសមយុទ្ធបាញ់គ្រាប់ពិត “ហនុមានមាស ២០១៩” កាលពីថ្ងៃទី០៨ ខែឧសភា ឆ្នាំ២០១៩ ដែលពិធីនោះ មានការអញ្ជើញចូលរួមពីលោកឧត្ដមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងមេបញ្ជាការកងទ័ពជើងគោក ព្រមទាំងសេនានុព័ន្ធយោធា នៃបណ្តាស្ថានទូត ស្ថានឯកអគ្គរាជទូត របស់ប្រទេសជាមិត្តប្រចាំនៅកម្ពុជា។

តាមរបាយការណ៍របស់លោកឧត្តមសេនីយ៍ឯក ម៉ៅ សុផាន់ មេបព្ជាការកងពលតូចថ្មើជើងលេខ៧០ បានឲ្យដឹងថា "សមយុទ្ធហនុមានមាស ២០១៩" មានលំហាត់ទីបញ្ជាការ និងលំហាត់លើទីលានប្រើប្រាស់កម្លាំងជាង២ពាន់នាក់។ លទ្ធផលនៃសមយុទ្ធ គឺគ្រប់ជំនាញបាញ់ចំគោលដៅ១០០ភាគរយ។ "សមយុទ្ធ ហនុមានមាស ២០១៩" គោល បំណងពង្រឹងសមត្ថភាព ជំនាញកងយោធពលខេមរភូមិន្ទ។

ថ្លែងនៅក្នុងឱកាសនោះ នាយឧត្តមសេនីយ៍ វង្ស ពិសេន បានមានប្រសាសន៍ថា "សមយុទ្ធ ហនុមានមាស ២០១៩" មិនមែនជាការគំរាមកំហែងទៅប្រទេសជិតខាង ឬយកទ័ពទៅវាយប្រទេស ជិតខាងនោះទេ។ តែគឺជាការពង្រឹងទៅលើកងយោធពលខេមរភូមិន្ទដើម្បីពង្រឹងវិស័យការងារការពារជាតិ។ នាយឧត្តមសេនីយ៍ វង្ស ពិសេន បានបញ្ជាក់ថា " ការធ្វើសមយុទ្ធនេះ អត់មានគំនិតចង់ ទៅឈ្លានពានអ្នកណាទេ សំខាន់បំផុតពង្រឹងទៅលើកងយោធ ពលខេមរភូមិន្ទ ទៅលើវិស័យការងារការពារជាតិ។ សមយុទ្ធរបស់យើងនេះ មិនមែនជាការគំរាមកំហែងយកទ័ពរបស់យើង ទៅវ៉ៃប្រទេសនេះប្រទេសនោះគឺអត់មានទេ"។

ជាមួយគ្នានោះ នាយឧត្តមសេនីយ៍ វង្ស ពិសេន បានប្រកាសថា កងយោធពលខេមរភូមិន្ទប្រឆាំងដាច់ខាតពួកអមិត្ត ដែលមានបំណងចង់បំភ្លេចបំផ្លាញសន្តិភាព និងការអភិវឌ្ឍ ដែលកំពុងតែមាននាពេលបច្ចុប្បន្ននៅក្នុងប្រទេសកម្ពុជា។ សន្តិភាពមិនអាចរកបានដោយងាយ ដូច្នេះយើងទាំងអស់គ្នាត្រូវតែការពារឲ្យបានដាច់ខាត ទោះក្នុងតម្លៃណាក៏ដោយ។ ក្នុងលក្ខណៈណាក៏ដោយ រូបភាពជាក្រុមក្តី ជាបុគ្គលក្តី គឺយើងត្រូវតែប្រឆាំងដាច់ខាត និងមានវិធាន ការផ្លូវច្បាប់ ចំពោះអ្នកណាចង់បំផ្លាញសន្តិភាព។

ចំណែកលោកឧត្តមសេនីយ៍ឯក អួន សារឿន មេបញ្ជាការកងទ័ពជើងគោកបានថ្លែងថា សម យុទ្ធ “ហនុមានមាស២០១៩" ដែលបានធ្វើឡើងពីថ្ងៃទី៤-ទី៨ ខែឧសភា ឆ្នាំ២០១៩ គឺជាសម យុទ្ធលើកទី១ និងជាប្រវត្តិសាស្ត្រ នៃបញ្ជាការដ្ឋានកងទ័ពជើងគោក និងមានគោលបំណងដើម្បីពង្រឹងសមត្ថ ភាពចំណេះដឹងបណ្តាជំនាញដល់នាយទាហាន នាយទាហានរង និងពលទា ហានកងទ័ពជើងគោក នៃកងយោធពលខេមរភូមិន្ទក្នុងកិច្ចការពារបូរណភាពទឹកដី នាពេល បច្ចុប្បន្ន និងដើម្បីវាស់ស្ទង់សមត្ថភាព គុណភាព ផ្តល់ចំណេះដឹងការងារសេនាធិការក្នុងការធ្វើសមយុទ្ធ ដល់កម្មសិក្សា នាយទាហានសេនាធិការក្នុងកិច្ចសហការវាងប្រភេទកងទ័ព និងទ័ពជំនាញ ក្នុងពេលហ្វឹកហ្វឺនក៏ដូចជាក្នុងពេលប្រយុទ្ធ។

ទាក់ទងបញ្ហានេះ នាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិបានបញ្ជាក់កាលពីរសៀលថ្ងៃទី០៨ ឧសភា ថា សមយុទ្ធ "ហនុមានមាស ២០១៩" បានបិទបញ្ចប់ដោយជោគជ័យតាមផែនការ។ សមយុទ្ធ នេះ មានរយៈពេល៥ថ្ងៃ នៅលើទីលានបាញ់គ្រាប់ពិតតេជោសែនជុំគិរី ខេត្តកំពត។ ជោគជ័យសម្រាប់សមយុទ្ធ "ហនុមានមាស ២០១៩" នេះ គឺកើតឡើងដោយសារកត្តា២យ៉ាងនោះ គឺបញ្ជាការរបស់យើងបានរៀបចំផែនការប្រយុទ្ធបានល្អ ហើយកម្លាំងសមយុទ្ធរបស់យើង ក៏បានអនុវត្តតាមផែនការ បានយ៉ាងល្អប្រសើរផងដែរ។ ក្នុងសមយុទ្ធ "ហនុមានមាស ២០១៩" ៥ថ្ងៃមកនេះ មានកម្លាំងយោធាចូលរួមចំនួន ២៣៣២នាក់ មកពីអង្គភាពផ្សេងៗនៃកងទ័ពជើងគោក។ អាវុធយុទ្ធភណ្ឌដែលប្រើក្នុងសកម្មភាពសមយុទ្ធនោះ រួមមានរថក្រោះ, រថពាសដែក, ឧទ្ធម្ភាគចក្រ, ត្រូន រួមទាំងកាំភ្លើងត្បាល់120mm ផងដែរ។
"ហនុមានមាស ២០១៩" ត្រូវបានធ្វើឡើងដើម្បីពង្រឹងសមត្ថភាព ចំណេះដឹង បណ្តាជំនាញដល់ នាយទាហាន នាយទាហានរង និងពលទាហាន នៃកងទ័ពជើងគោក ក្នុងកិច្ចការពារបូរណភាពទឹកដី នាពេលបច្ចុប្បន្ន និងអនាគត។ សមយុទ្ធនេះក៏ជាការវាស់ស្ទង់សមត្ថភាព ក្រោយពីធ្វើការហ្វឹកហ្វឺនតាមបណ្តាសាលា និងកងឯកភាពរួចផងដែរ។ មួយវិញទៀត សមយុទ្ធហនុមានមាស នឹងជួយលើកកម្ពស់សមត្ថភាព គុណភាព ផ្តល់ចំណេះដឹងការងារសេនាធិការ ក្នុងការធ្វើសមយុទ្ធដល់កម្មសិក្សា នាយទាហានសេនាធិការ ក្នុងការសហការរវាងប្រភេទទ័ព និងទ័ពជំនាញ ក្នុងពេលហ្វឹកហ្វឺន ក៏ដូចក្នុងពេលប្រយុទ្ធថែមទៀត។

សមយុទ្ធហនុមានមាស បានប្រើប្រាស់យុទ្ធវិធីវាយបកយកទីតាំងដែលខ្មាំងដណ្តើមបានត្រឡប់មកវិញ ខុសប្លែកអំពីសមយុទ្ធនាគមាស ២០១៩ ដែលកម្លាំងសមយុទ្ធបានវាយរំដោះចំណាត់ខ្មាំងពីជំរុំខ្មាំងជាដើម៕