ភ្នំពេញ ៖ សម្តេចតេជោ ហ៊ុន សែន បានឆ្លើយតបទៅលោក ប្រេដ អាដាម ថា មេទាហានកម្ពុជាដែលស្មោះត្រង់ជាមួយរាជរដ្ឋាភិបាល ស្មោះត្រង់ជាមួយ ហ៊ុន សែន មានរហូតជិត ១២ ម៉ឺននាក់ គឺជាមេទាហានរបស់កម្ពុជាមានភាពស្អាតស្អំមិនមែនដូចការចោទប្រកាន់របស់អ្នកឯងទេ។
សម្តេចមានប្រតិកម្មដូចនេះ ធ្វើឡើងបន្ទាប់ពីអង្គការឃ្លាំមើលសិទ្ធិមនុស្ស (Human Rights Watch) បានចោទប្រកាន់ មេនគរបាល មេយោធា និង មេកងរាជអាវុធហត្ថកម្ពុជា ចំនួន ១២រូប ថា បានរំលោភសិទ្ធិមនុស្សយ៉ាងធ្ងន់ធ្ងរ។
ប្រតិកម្មរបស់សម្តេចតេជោ ហ៊ុន សែន បានធ្វើឡើងនៅព្រឹកថ្ងៃទី២ ខែកក្កដា ឆ្នាំ ២០១៨ នៅក្នុងពិធីសម្ពោធដាក់ឲ្យប្រើប្រាស់ជាផ្លូវការនូវស្ពានអាកាសមិត្តភាព កម្ពុជា-ចិន សែនសុខ ហៅស្ពានផ្សារដីហុយ។ សម្តេចតេជោមានប្រសាសន៍ថា “រឿង នាយទាហាន ១២ រូប សូមផ្ដាំទៅ ប្រេដ អាដាម ថា នេះវាមានចំនួនតិចណាស់ សូមដាក់ទាំងអស់ទៅ ទើបគ្រប់មិនមែនមានតែ ១២ នាក់ទេ ដែលស្មោះត្រង់នឹង ហ៊ុន សែន ស្មោះត្រង់រាជរដ្ឋាភិបាល។ នាយទាហានម៉ាប្រទេសជាង ១១ ម៉ឺននាក់ គឺស្មោះត្រង់នឹង ហ៊ុន សែន និងរាជរដ្ឋាភិបាល។
សម្តេចតេជោបានបន្តថា រឿងអ្នកឯងចោទគឺជារឿងរបស់អ្នកឯង ឯភាពស្អាតស្អំរបស់មេទាហានកម្ពុជាគឺជាភាពស្អាតស្អំរបស់នាយទាហានកម្ពុជា អ្នកឯងគ្មានសិទ្ធិអ្វីទាំងអស់។ សម្តេចបានផ្ដាំទៅ ប្រែដ អាដាម ដែលជាអង្គការក្រៅរដ្ឋាភិបាលថា កងកម្លាំងប្រដាប់អាវុធទាំងអស់គឺជាឧបករណ៍ការពារជាតិ ដូចនេះគេបង្កើតកងទ័ពមកគឺដើម្បីការពារជាតិ ការពាររដ្ឋាភិបាល។ ប្រទេសណាដែលគ្មានកម្លាំងប្រដាប់អាវុធនៅលើពិភពលោក គឺសុទ្ធតែមានកម្លាំងប្រដាប់អាវុធទាំងអស់ តើកម្លាំងប្រដាប់អាវុធគឺទុកធ្វើអី គឺគេទុកសម្រាប់ការពារជាតិ ហើយគុកគេធ្វើសម្រាប់ដាក់អ្នកទោស។
គួរបញ្ជាក់ថា ឧត្តមសេនីយ៍ ១២រូប ស្ថិតក្នុងស្ថាប័នគ្រប់គ្រងប្រដាប់អាវុធទាំង៣គឺយោធា នគរបាល និងកងរាជអាវុធហត្ថ។ អ្នកទាំងនោះ រួមមាន លោក ប៉ុល សារឿន អគ្គមេបញ្ជាការ នៃកងយោធពលខេមរភូមិន្ទ, លោក គន់ គីម អគ្គមេបញ្ជាការរង នៃកងយោធពលខេមរភូមិន្ទ និងជានាយសេនាធិការចម្រុះ, លោក សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការនៃកងរាជអាវុធហត្ថលើផ្ទៃប្រទេស, លោក នេត សាវឿន អគ្គស្នងការនគរបាលជាតិ, លោក ជា ម៉ន មេបញ្ជាការរងកងទ័ពជើងគោក, លោក ប៊ុន សេង មេបញ្ជាការរងកងទ័ពជើងគោក, ឧត្ដមសេនីយ៍ទោ ជឿន សុវណ្ណថា មេបញ្ជាការរងកងទ័ពជើងគោក, លោក ចាប ភក្ដី នាយរងសេនាធិការចម្រុះ នៃកងយោធពលខេមរភូមិន្ទ, លោក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ, លោក សុខ ផល អគ្គស្នងការរងនគរបាលជាតិ និងជាអគ្គនាយកនៃអគ្គនាយកដ្ឋានអន្តោប្រវេសន៍, លោក ម៉ក់ ជីតូ អគ្គស្នងការរងនគរបាលជាតិ, និងលោក ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ។
នៅក្នុងឱកាសនោះដែរ សម្តេចតេជោមានប្រសាសន៍ដែរថា សន្តិភាពមានក្នុងដៃហើយ ការអភិវឌ្ឍជាជំហានមានក្នុងដៃហើយ តើគួរត្រូវឲ្យវាបាត់ទៅវិញទេ មិនត្រូវឲ្យមានការបាត់បង់ណាមួយទេ ទោះបីតម្លៃណាក៏ដោយជនជាតិកម្ពុជាមិនត្រូវអោនក្បាលឲ្យបរទេសកៀបសង្កត់ទៀតទេ ដោយសារតែបរទេសធ្វើផ្ដេសផ្ដាសមកលើយើងនេះហើយ ទើបបង្កឱ្យប្រជាជនយើងស្លាប់រាប់លាននាក់។ រដ្ឋប្រហារ ៨ មីនា ១៩៧០ បានបង្កើតឡើងនូវវិនាសសកម្មរាប់មិនអស់ដែលយើងត្រូវចង់ចាំលើរឿងនេះ។ ជនណាក៏ដោយដែលបម្រើឲ្យផលប្រយោជន៍ជនបរទេសគឺជាជនក្បត់ជាតិ ខុសទៅនឹងពាក្យសម្បថដែលខ្លួនបានស្បថចំពោះព្រះមហាស្វេតឆ័ត្រ នៅចំពោះព្រះភ័ក្ត្រព្រះមហាក្សត្រ និង ចំពោះព្រះភ័ក្ត្រសម្តេចព្រះសង្ឃរាជទាំងពីរគណៈ។
សម្តេចតេជោនាយករដ្ឋមន្ត្រីបានបន្តថា សម្តេចគ្មានកំហុសទេ នៅពេលដែលដឹកនាំប្រជាជនឲ្យងើបឈរឡើងដើម្បីការពារឯករាជ្យ ការពារអធិបតេយ្យភាពជាតិ ការពារបូរណភាពទឹកដី ការពារសន្តិភាព និងការអភិវឌ្ឍ ខ្ញុំមិនបានខុសទេ ទោះបីត្រូវប្រើកម្លាំងប្រដាប់អាវុធក៏សម្តេចមិនបានខុសដែរ ព្រោះនេះជាបេសកកម្មការពារជីវិតមនុស្ស ការពារនូវសន្តិភាព និង ការពារនូវការរីកលូតលាស់របស់ជាតិ៕
Source: Kampuchea Thmey Daily
0 Comments