ប្រធានាធិបតីអាមេរិកលោក Donald Trump និងប្រធានាធិបតីជាប់ឆ្នោតម៉ិកស៊ិកលោក Andres Manuel Lopez Obrador បាននិយាយកាលពីថ្ងៃចន្ទថា ពួកគេបាននិយាយទូរស័ព្ទជាលើកដំបូង “ដ៏អស្ចារ្យ” ជាមួយគ្នា ខណៈដែលអ្នកនិយមឆ្វេងអាមេរិកឡាទីនរូបនេះបានស្នើឲ្យកាត់បន្ថយការធ្វើអន្តោប្រវេសន៍ឆ្លងកាត់ព្រំដែនអាមេរិក។
លោក Lopez Obrador បានទទួលជ័យជម្នះក្នុងការបោះឆ្នោតកាលពីថ្ងៃអាទិត្យដែលជាហេតុនាំឲ្យមានការលើកឡើងជាសំណួរអំពីអនាគតនៃទំនាក់ទំនងដ៏សំខាន់របស់ម៉ិកស៊ិកជាមួយនឹងអ្នកជិតខាងដ៏ធំនៅភាគខាងជើងរបស់ខ្លួន។
អ្នកនយោបាយរូបនេះដែលត្រូវបានគេស្គាល់ថា “AMLO” គឺបានប្តេជ្ញាក្នុងអំឡុងយុទ្ធនាការថានឹងដោះស្រាយជាមួយលោក Trump ខណៈគោលនយោបាយប្រឆាំងពាណិជ្ជកម្មនិងប្រឆាំងអន្តោប្រវេសន៍របស់ប្រធានាធិបតីសាធារណរដ្ឋរូបនេះបានធ្វើឲ្យប្រទេសម៉ិកស៊ិកខឹងសម្បា។
ប៉ុន្តែអ្នកទាំងពីរហាក់ដូចជាមានទំនាក់ទំនងល្អនៅក្នុងការនិយាយទូរស័ព្ទលើកដំបូងរបស់ពួកគេបន្ទាប់ពីជ័យជម្នះរបស់លោក Lopez Obrador។
លោក Lopez Obrador បានសរសេរនៅលើ Twitter ថា “ខ្ញុំបានទទួលទូរស័ព្ទពីលោក Donald Trump ហើយយើងបាននិយាយគ្នារយៈពេលកន្លះម៉ោង។ មានការគោរពហើយក្រុមរបស់យើងនឹងរៀបចំកិច្ចពិភាក្សា”។
ចំណែកលោក Trump ក៏បានលើកឡើងពីការនិយាយទូរស័ព្ទនេះផងដែរនៅពេលគាត់និយាយទៅកាន់អ្នកយកព័ត៌មានក្នុងការិយាល័យអ៉ូវ៉ាល់។
គាត់បាននិយាយថា “ខ្ញុំគិតថា ទំនាក់ទំនងនេះនឹងក្លាយទៅជារឿងដ៏ល្អមួយ។ យើងមានការពិភាក្សាដ៏អស្ចារ្យ។ ខ្ញុំគិតថាគាត់នឹងព្យាយាមនិងជួយយើងជាមួយបញ្ហាព្រំដែន”។
គួរបញ្ជាក់ថា ទំនាក់ទំនងរវាងសហរដ្ឋអាមេរិកនិងម៉ិកស៊ិកត្រូវបានរារាំងចាប់តាំងពីលោក Trump បានឈ្នះការបោះឆ្នោតឆ្នាំ២០១៦បន្ទាប់ពីយុទ្ធនាការគំរាមកំហែងប្រឆាំងនឹងម៉ិកស៊ិក ការវាយប្រហារលើកិច្ចព្រមព្រៀងពាណិជ្ជកម្មសេរីអាមេរិកខាងជើង (NAFTA) និងការសន្យាថានឹងកសាងជញ្ជាំងនៅព្រំដែនប្រទេសទាំងពីរហើយឲ្យម៉ិកស៊ិកចំណាយលើវា៕ AFP
Source: Kampuchea Thmey Daily
0 Comments