រដ្ឋាភិបាលចម្រុះកំពុងកាន់អំណាចរបស់អធិការបតីអាល្លឺម៉ង់លោកស្រី Angela Merkel កំពុងប្រឈមមុខនឹងអនាគតមិនច្បាស់លាស់មួយ ខណៈដែលរដ្ឋមន្ត្រីក្រសួងមហាផ្ទៃដ៏រឹងមាំរបស់លោកស្រីបានដាក់សំណើលាលែងពីតំណែងកាលពីថ្ងៃអាទិត្យ ក្រោយពីបានប្រយុទ្ធតស៊ូអស់រយៈពេលជាច្រើនសប្តាហ៍ឲ្យលោកស្រីផ្លាស់ប្តូរចិត្តលើគោលនយោបាយអន្តោប្រវេសន៍។
ប្រភពដែលជិតស្និទ្ធជាមួយនឹងកិច្ចប្រជុំបិទទ្វារបស់ពួកគេក្នុងទីក្រុងមូនិកបានប្រាប់ AFP ថា លោក Horst Seehofer បានប្រាប់បណ្តាមេដឹកនាំជាមិត្តនៃគណបក្ស CSU ថា លោកចង់លាលែងពីតំណែងទាំងជាប្រធានបក្សនិងរដ្ឋមន្ត្រីមហាផ្ទៃដោយនិយាយថា លោក “គ្មានការគាំទ្រ” ។
អ្នកចូលរួមក្នុងកិច្ចប្រជុំនេះបាននិយាយថា ប៉ុន្តែប្រធានក្រុមអ្នកតំណាងគណបក្ស CSU លោក Alexander Dobrindt មិនចង់ទទួលយកការលាលែងពីតំណែងរបស់លោក Seehofer ទេ។
កង្វះភាពច្បាស់លាស់ពីជំរំ Bavarian បានលើកឡើងជាសំណួរអំពីអនាគតនៃរដ្ឋាភិបាលចម្រុះដែលកំពុងគ្រប់គ្រងរបស់លោកស្រី Merkel រវាងសម្ព័ន្ធភាព CDU-CSU និងគណបក្សប្រជាធិបតេយ្យសង្គមនិយមកណ្តាល (SPD) ។
ប្រសិនបើលោក Seehofer ចាកចេញមែននោះ, CSU អាចស្នើឲ្យជំនួសរដ្ឋមន្ត្រីក្រសួងមហាផ្ទៃម្នាក់ប្រសិនបើខ្លួនមានគោលបំណងនៅជាប់ជាមួយគណបក្ស CDU របស់លោកស្រី Merkel ។
ផ្ទុយទៅវិញ វាអាចបំបែកភាពជាដៃគូរយៈពេលជាច្រើនទសវត្សរ៍មកហើយរបស់គណបក្សទាំងពីរដោយរារាំងលោកស្រី Merkel ពីការទទួលបានសំឡេងភាគច្រើននៅក្នុងរដ្ឋសភា។
ដើម្បីឲ្យនយោបាយរស់រានជាបន្ត លោកស្រី Merkel អាចសាកល្បងរដ្ឋាភិបាលសំឡេងភាគតិចមួយ ស្វែងរកដៃគូចម្រុះថ្មីក្នុងគណបក្សបរិស្ថាន Greens ឬគណបក្សគាំទ្រជំនួញ Free Democrats ឬរៀបចំការបោះឆ្នោតសម្តែងការមិនទុកចិត្តមួយនៅក្នុងសភាដែលអាចបង្កឲ្យមានការបោះឆ្នោតថ្មី។
លោកស្រី Merkel ដែលកាន់តំណែងចាប់តាំងពីឆ្នាំ២០០៥មកបានព្រមានកាលពីសប្តាហ៍មុនថា បញ្ហានៃការធ្វើអន្តោប្រវេសន៍អាចសម្រេចពីអនាគតរបស់សហភាពអឺរ៉ុបផ្ទាល់៕ AFP
Source: Kampuchea Thmey Daily
0 Comments