កំពង់ចាម ៖ ប្រមុខរាជរដ្ឋាភិបាលកម្ពុជាបានថ្លែងឲ្យដឹងថា នៅថ្ងៃស្អែកនេះរដ្ឋសភានឹងពិភាក្សាអនុម័តលើ លើសេចក្តីព្រាងច្បាប់ស្តីពីវិសោធនកម្មមាត្រា ៨៧ ចំណងជើងចំណុច «គ» នៃផ្នែកទី៣ ជំពូកទី៤ មាត្រា៨៩ មាត្រា៩០ មាត្រា៩១ មាត្រា៩៤ មាត្រា១១០ មាត្រា១២០ និងមាត្រា ១២២ នៃច្បាប់ស្តីពីការងារ។ ពាក់ព័ន្ធបញ្ហាដែលថៅកែរោងចក្ររត់ចោលកម្មករដោយតម្រូវឲ្យម្ចាស់រោងចក្រ ៦ ខែម្តងត្រូវទូទាត់ប្រាក់បំណាច់អតីតភាពការងារជារៀងរាល់៦ខែម្តងឲ្យកម្មករ ដោយមិនត្រូវទុកដល់បញ្ចប់ការងារទើបបើកផ្តល់ឲ្យនោះទេ។ រាជរដ្ឋាភិបាលមិនអាចជាជនរងគ្រោះ ដែលរង់ចាំតែសងប្រាក់ថៅកែជំពាក់កម្មករ ទៅឲ្យកម្មករនោះទេ។
សម្តេចតេជោនាយករដ្ឋមន្ត្រីបានលើកឡើងបែបនេះនៅក្នុងពិធីសំណេះសំណាលជាមួយបងប្អូនកម្មករកម្មការិនី ចំនួន ២២.៤៧០ នាក់នៅក្នុងស្រុកបាធាយ និង ស្រុកជើងព្រៃ ខេត្តកំពង់ចាមនាព្រឹកថ្ងៃទី ៦ ខែមិថុនានេះ។
គួរបញ្ជាក់ថា កិច្ចប្រជុំគណៈរដ្ឋមន្ត្រីកាលពីថ្ងៃទី ២៥ ខែ ឧសភា បានពិភាក្សា និង អនុម័តលើសេចក្តីព្រាងច្បាប់ស្តីពីវិសោធនកម្មមាត្រា ៨៧ ចំណងជើងចំណុច «គ»នៃផ្នែកទី៣ ជំពូកទី៤ មាត្រា៨៩ មាត្រា៩០ មាត្រា៩១ មាត្រា៩៤ មាត្រា១១០ មាត្រា១២០ និងមាត្រា ១២២ នៃច្បាប់ស្តីពីការងារដែលត្រូវប្រកាសឲ្យប្រើដោយព្រះរាជ ក្រមលេខ ជស/រកម/០៣៩៧/០១ចុះថ្ងៃទី១៣ខែមីនា ឆ្នាំ១៩៩៧។ ដោយកែសម្រួលបញ្ញត្តិមាត្រា៨៩ ស្តីពីការទូទាត់ប្រាក់បំណាច់បណ្តេញចេញនិងមាត្រាពាក់ព័ន្ធនៃច្បាប់ស្តីពីការងារគឺក្នុងគោលបំណងរក្សាផលប្រយោជន៍ជូនទាំងកម្មករនិយោជិតទាំងនិយោជក និងរាជរដ្ឋាភិបាល។ ការធ្វើវិសោធនកម្មមានដូចជា បង្ការហានិភ័យរបស់កម្មករនិយោជិត ជាពិសេសក្នុងករណីរោងចក្រសហគ្រាសបិទទ្វារដោយម្ចាស់រត់ចោលដោយទទួលបានការទូទាត់ប្រាក់បំណាច់អតីតភាពការងារ ជារៀងរាល់៦ខែម្តង ផ្អែកតាមអតីតភាពការងារដោយមិនមានកំណត់កម្រិតអតិបរមានៃប្រាក់បំណាច់អតីតភាពការងារបើទោះបីជាកម្មករនិយោជិតត្រូវបានបញ្ឈប់ឬលាឈប់ពីការងារ ។ សម្រាលបន្ទុកនិយោជកក្នុងការទូទាត់ប្រាក់បំណាច់អតីតភាពការងារជៀសវាងការរក្សាទុកប្រាក់បំណាច់អតីតភាពរហូតដល់ពេលបញ្ចប់កិច្ចសន្យា។
លើកកម្ពស់ភាពសុខដុមរមនាក្នុងទំនាក់ទំនងវិជ្ជាជីវៈដោយកាត់បន្ថយការតវ៉ាទាមទារការទូទាត់ប្រាក់បំណាច់ផ្សេងៗក៏ដូចជាការកាត់បន្ថយការចំណាយរបស់រាជរដ្ឋាភិបាលក្នុងការចូលរួមដោះស្រាយជាមួយម្ចាស់រោងចក្រ សហគ្រាស ក្នុងករណីម្ចាស់រោងចក្រ សហគ្រាស រត់ចោលកម្មករនិយោជិតជាយថាហេតុ។
សម្តេចតេជោនាយករដ្ឋមន្ត្រីបានមានប្រសាសន៍ថា នៅពេលដែលថៅកែរត់ចោលរោងចក្រម្តងៗ រាជរដ្ឋាភិបាលបានក្លាយជាជនរងគ្រោះ ដំបូងរងគ្រោះចំពោះកម្មករ ដោយសារតែថៅកែជំពាក់កម្មករច្រើនពេក។ រាជរដ្ឋាភិបាលត្រូវបញ្ចេញប្រាក់ទៅដោះស្រាយជូនកម្មករកម្មការិនី ខ្លះមានរហូតរាប់ម៉ឺនដុល្លារដែលទាមទារឲ្យរាជរដ្ឋាភិបាលត្រូវធ្វើវិសោធនកម្មច្បាប់ស្តីពីការងារ។
រាជរដ្ឋាភិបាលពិតជាមិនព្រងើយកន្តើយនៅទេត្រូវបញ្ចេញសាច់ប្រាក់បើកផ្តល់ឲ្យកម្មករជាមុន រួចចាំលក់ឡាយឡុងរោងចក្រនោះយកមកសងរដ្ឋវិញ តែការលក់ឡាយឡុងនោះមិនបានឆ្លើយតបទៅនិងប្រាក់ដែលរាជរដ្ឋាភិបាលចេញសងកម្មករជំនួសថៅកែនោះទេ។ ដូចនេះបានជាមានការធ្វើវិសោធនកម្មច្បាប់ការងារដោយតម្រូវឲ្យម្ចាស់រោងចក្រត្រូវទូទាត់ប្រាក់បំណាច់អតីតភាពការងារជារៀងរាល់៦ខែម្តងឲ្យកម្មករ។
សម្តេចតេជោ ហ៊ុន សែន បានសំដែងការរីករាយជាខ្លាំងដែលបានអញ្ជើញមកជួបជុំជាមួយកូនក្មួយកម្មករកម្មការិនីដែលមានចំនួនប្រមាណជាង២ម៉ឺននាក់។ សម្តេចតេជោនាយករដ្ឋមន្ត្រីបានមានប្រសាសន៍ថា សម្តេចនឹងបន្តនៅក្នុងដំណើរឈានឆ្ពោះទៅជួបកម្មករនៅក្នុងក្របខ័ណ្ឌទូទាំងប្រទេស។ ពិតហើយ សល់ជំនួបប៉ុន្មានលើកទៀតតែប៉ុណ្ណោះនឹងត្រូវផ្អាកជាបណ្តោះអាសន្ននៅក្នុងពេលយុទ្ធនាការបោះឆ្នោត ប៉ុន្តែបន្ទាប់ពីការបោះឆ្នោតចប់ សម្តេចនឹងត្រូវបន្តដើរជួបកម្មករនៅក្នុងក្របខណ្ឌទូទាំងប្រទេស។ សម្តេចបានបន្តថាដរាបណាសម្តេចនៅបន្តជានាយករដ្ឋមន្ត្រីបន្តទៀតការងារទាក់ទងជាមួយនឹងកម្មករនេះត្រូវបន្តធ្វើមិនចេះចប់។ សម្តេចនឹងបន្តចុះជួបជាមួយកូនក្មួយកម្មករកម្មការនីចំនួន៤ លើកទៀតមុននឹងចូលដល់ថ្ងៃយុទ្ធនាការបោះឆ្នោតជ្រើសតាំងតំណាងរាស្ត្រអាណត្តិទី៦នាពេលខាងមុខ។
សម្តេចតេជោនាយករដ្ឋមន្ត្រីបានលើកឡើងថា មានគេនិយាយថា សម្តេចកំពុងស្រឡាញ់តែកម្មករ ហើយឈប់ស្រឡាកសិករហើយជាការពន្យល់ដល់កម្មករសម្តេចតេជោបានថ្លែងថា ក្មួយៗអាចឃើញពូនៅពេលប្រទេសរបស់យើងស្ថិតនៅក្នុងដំណាក់កាលនៃការលិចលង់ទៅក្នុងសង្គ្រាមនិងរបបប្រល័យពូជសាសន៍ពេលនោះនៅឃើញសល់រូបភាពមួយចំនួនដែលពូពាក់ឯកសណ្ឋានយោធាក្នុងសមរភូមិប្រយុទ្ធហើយនៅក្នុងរយៈពេលនៃការគ្រប់គ្រងអំណាចក្នុងឋានៈជានាយករដ្ឋមន្ត្រីពេលនោះ ប្រទេសរបស់យើងមិនទាន់រួចចាកផុតពីសង្គ្រាមនៅឡើយទេ។ គេបានឃើញពូនៅខ្សែត្រៀមជួរមុខជាមួយនឹងកងទ័ពដើម្បីដោះស្រាយការលំបាករបស់កងទ័ពយើងផង និងដោះស្រាយការលំបាកចំពោះប្រជាជននៅក្នុងតំបន់ប្រយុទ្ធផងដែរ។ បន្ថែមលើនោះដើម្បីធានាថា ប្រទេសរបស់យើងបញ្ចប់បានសង្គ្រាម នាំមកនូវការបង្រួបបង្រួមជាតិ ទន្ទឹមនឹងវត្តមាននៅក្នុងឯកសណ្ឋានយោធានៅឯទីតាំងជួរមុខដើម្បីដោះស្រាយការលំបាករបស់កងទ័ព និងប្រជាជននៅទីនោះគេក៏បានឃើញពូនៅក្រៅប្រទេសដើម្បីចូលរួមការចរចាស្វែងរកដំណោះស្រាយនយោបាយស្តីពីបញ្ហាកម្ពុជា។ ចំណុចនេះពេលនោះអាទិភាពរបស់យើងគឺយ៉ាងដូច្នោះឯងធ្វើយ៉ាងណាទប់ស្កាត់ការវិលត្រឡប់នៃរបប ប៉ុល ពត ហ្នឹងម្ខាង ម្ខាងទៀតជំរុញការអភិវឌ្ឍ។ តែដើម្បីដោះស្រាយការបញ្ចប់សង្គ្រាមយើងមិនអាចយកសង្គ្រាមដើម្បីបញ្ចប់សង្គ្រាមទេត្រូវដំណើរការចរចា។ នោះហើយគឺជាកិច្ចការត្រូវធ្វើនៅក្នុងដំណាក់កាលនោះ។
ជាមួយនឹងការធ្វើដំណើរលើកិច្ចការងារនោះបន្ទាប់ទៅយើងត្រូវធានាថា ធ្វើយ៉ាងម៉េចឲ្យប្រជាជនកម្ពុជាយើងមានស្បៀងហូបគ្រប់គ្រាន់។ ពូបានធ្វើសកម្មភាពយ៉ាងច្រើនទាក់ទងជាមួយបញ្ហាវិស័យកសិកម្ម។ ពេលនោះយើងគ្មានជម្រើសណាល្អជាងទេ ព្រោះមិនទាន់មានការជំរុញការវិនិយោគផ្នែកឧស្សាហកម្មចូលមកកាន់ប្រទេសកម្ពុជារបស់យើង(នៅឡើយ)។ ដូច្នេះ ជម្រើសពេលនោះគឺដោះស្រាយបញ្ហាឲ្យកសិកររបស់យើងនៅក្នុងក្របខណ្ឌទូទាំងប្រទេសផ្នែកប្រព័ន្ធធារាសាស្ត្រ ប្រព័ន្ធស្រោចស្រព និងការអភិវឌ្ឍដទៃទៀត។
បច្ចុប្បន្ននេះយើងកំពុងពង្រាយរោងចក្រ សហគ្រា តាមបណ្តាលផ្លូវជាតិ និងតាមបណ្តាខេត្តនានា ដើម្បីជំរុញការអភិវឌ្ឍវិស័យឧស្សាហកម្ម (២០១៥-២០២៥)និងផ្តល់ឱកាសការងារដល់កូនក្មួយកម្មករ។ ការដាក់ពង្រាយរោងចក្រ សហគ្រា នាពេលនេះ គឺប្រៀបបានទៅនឹងការពង្រាយសាលារៀននៅទូទាំងប្រទេសយ៉ាងដូច្នេះដែរ ដោយបច្ចុប្បន្ននេះ រាជរដ្ឋាភិបាលបានដាក់ពង្រាយសាលារៀនមានស្ទើរគ្រប់ទីកន្លែងដើម្បីជាកន្លែងផ្តល់ចំណេះដឹងដល់កូនចៅប្រជាពលរដ្ឋយើង។
សម្តេចតេជោនាយករដ្ឋមន្ត្រីបានបន្តថា ថ្ងៃនេះពូមកជួបក្មួយៗនៅទីនេះដែលមានរោងចក្រចំនួន ៨ នៅស្រុកបាធាយ ១ និង ស្រុកជើងព្រៃ ចំនួន ៧ ដែលមានកម្មករ/ការិនី ២២.៤៧០ នាក់ ដែលនេះក៏ជាចំនួនមួយដែលអាចមើលឃើញថា វាស្ថិតនៅក្នុងផែនការពង្រាយរោងចក្រទៅតាមបណ្តាមូលដ្ឋាន ដែលអាចធ្វើទៅបាន។ ក្មួយៗអាចយល់ដឹងហើយថាកាលពីអតីតកាល យើងខិតខំពង្រាយសាលាទៅតាមមូលដ្ឋាន ដែលមកដល់ពេលនេះក្មួយៗពិតជាប្រាកដហើយថា ក្មួយៗបានរៀនសូត្រនៅក្រោមដំបូលសាលា ដែលគណបក្សប្រជាជននិងរដ្ឋាភិបាលរបស់ពូធ្វើតាំងពីពេលមុនរហូតមកដល់ពេលក្រោយ។ នោះគឺការពង្រាយសាលាដែលអនុញ្ញាតឲ្យក្មួយៗបានសិក្សាគ្រប់ៗគ្នា។ ទាក់ទិននឹងការរៀបចំក្របខ័ណ្ឌគោលនយោបាយ ហើយនេះមិនមែនជាបញ្ហាប្រថុយប្រថាន ហើយមិនមែនជាបញ្ហាធ្វើដោយការឆក់កណ្តៀតនោះទេ។ បើពូមិនច្រឡំពូជាអ្នកតាក់តែងរៀបចំនូវគោលនយោបាយនិងសម្រេចទៅលើបញ្ហា ទាក់ទងនឹងការវិនិយោគ។ យើងបានរៀបចំនូវក្របខណ្ឌគោលនយោបាយ ដើម្បីពង្រីកវិស័យឧស្សាហកម្មរបស់យើងចេញក្រៅទីក្រុង ឆ្ពោះទៅកាន់បណ្តាខេត្តនានា តាំងពីឆ្នាំ ១៩៩៩ ឯណោះ។ គិតមកដល់ពេលនេះ មានរយៈកាលជិត ២០ ឆ្នាំ រួចស្រេចទៅហើយដែលយើងបានបង្កើតនូវវេទិការវាងរាជរដ្ឋាភិបាល និងវិស័យឯកជនតាំងពីពេលនោះ ដែលយើងចាប់ផ្តើមយកចិត្តទុកដាក់។
សម្តេចតេជោ ហ៊ុន សែន បានថ្លែងទៀតថា ចំណុចការធានាបាននូវសន្តិភាព ដើម្បីធានាបាននូវការអភិវឌ្ឍបន្តគឺជារឿងចាំបាច់ ដែលត្រូវរួមគ្នារក្សាអោយខានតែបាន។ ដើម្បីរួមគ្នារក្សាឲ្យបាននោះវាងាយស្រួលទេយើងមានរបស់ហើយស្រេចតើយើងត្រូវរក្សារបស់នេះឬអត់? សន្តិភាពបានផ្សារភ្ជាប់ជាមួយគណបក្សប្រជាជន។ សន្តិភាពបានផ្សារភ្ជាប់ជាមួយ ហ៊ុន សែន។ ការអភិវឌ្ឍបានផ្សារភ្ជាប់ជាមួយគណបក្សប្រជាជនបានផ្សារភ្ជាប់ជាមួយ ហ៊ុន សែន។ តើគួរឲ្យបាត់បង់នូវចំណុចនេះឬទេ? ដូច្នេះដើម្បីធានាទៅដល់ការរក្សាសន្តិភាពដើម្បីធានាទៅដល់ការអភិវឌ្ឍជម្រើសដែលល្អជាងគេ គឺការបោះឆ្នោតអោយគណបក្សប្រជាជនកម្ពុជា។ នេះគឺជាចំណុចដែលធានាច្បាស់ ហើយនេះមិនមែនជាការកញ្ឆក់កណ្ដៀតទេ តែគឺជាការអនុវត្តលើការជាក់ស្ដែងរួចស្រេចទៅហើយក្មួយត្រូវរួមដំណើរជាមួយពូថែរក្សាសន្តិភាពឲ្យបាន វិធីការពារសន្តិភាពនិង ដើម្បីធានាការអភិវឌ្ឍ ធានាការងារនិងមុខរបបគឺក្មួយគ្រាន់តែបោះឆ្នោតឲ្យ គណបក្សប្រជាជនកម្ពុជាគឺពូនិងបន្តធ្វើជានាយករដ្ឋមន្ត្រីបន្តទៀត។ ពូបានរួមដំណើរជាមួយឪពុកម្តាយរបស់ក្មួយៗ នាំមកនៅសុខសន្តិភាព។ ក្មួយៗត្រូវចាំថា មានតែសន្តិភាពមួយទេដែលសំខាន់ជាងគេត្រូវរក្សាឲ្យបាន។ សង្គ្រាមគ្មានផ្តល់ផល ប្រយោជន៍ឲ្យអ្នកណាមួយទេ អ្នកដែលខូចខាតមុនគេគឺឆ្នាំងបាយរបស់កម្មករនេះតែម្តង។
អត្ថប្រយោជន៍ដែលយើងមាន ប្រាក់ចំណូលបានពីរោងចក្រ បែងចែកមួយភាគ ទៅឲ្យឳពុកម្តាយនៅឯផ្ទះក្នុងការទិញគ្រឿងយន្តកសិកម្មជំនួសឲ្យគោក្របី ដែលបច្ចុប្បន្នមានប្រមាណ ៩៨ ភាគរយហើយ។
សម្តេចតេជោបានសំណូមពរក្មួយៗចូលរួមរក្សាស្ថិរភាពនយោបាយ និង រក្សាស្ថិរភាពការងារ ដោយបង្កើតឲ្យមានភាពសុខដុមរមនានៅក្នុងរោងចក្រ ដោយត្រូវរក្សានៅ សាមគ្គីភាពរវាងថៅកែ និង កម្មករ ។ កុំឲ្យមានបងតូចបងធំកាត់ចាក់គ្នា និង គ្រឿងញៀន ។ ក្មួយត្រូវចេះអប់រំគ្នា កុំឲ្យមានភាពអសកម្មកើតឡើង។
រាជរដ្ឋាភិបាលរំពឹងចង់បាននូវសាមគ្គីភាព សុខដុមរមនានៅតាមរោងចក្រ/សហគ្រាសនានា ដែលក្នុងនោះភាគីទាំងពីរមិនអាចខ្វះមួយណាបានទេ។ បើធ្វើជាថៅកែរោងចក្របើមានរោងចក្រតែអត់កម្មករ មិនមែនជាម្ចាស់រោងចក្រទេគឺជាម្ចាស់ឃ្លាំង គ្រាន់តែជាឃ្លាំងដាក់ទំនិញតែប៉ុណ្ណោះ។ ឯចំពោះកម្មករយើង ប្រសិនបើគ្មានរោងចក្រទេក្មួយៗមិនអាចហៅខ្លួនថាជាកម្មករបានទេបើសិនជានៅក្នុងចំណោមការងាររបស់យើង បែរជាស្ថិតនៅជាអ្នកកាន់ចប ឬកាន់នង្គ័លនោះមិនមែនជាកម្មករទេ គឺជាកសិករទៅវិញ។ ដូច្នេះហើយបានជាយើងត្រូវបន្តការយកចិត្តទុកដាក់ អំពាវនាវឲ្យមានសាមគ្គីភាពនៅក្នុងចំណោមរោងចក្រ ជាម្ចាស់រោងចក្រ ជាអ្នកគ្រប់គ្រងរោងចក្រ ថ្នាក់រដ្ឋបាល ជំនួយការ ប្រធានផ្នែក ប្រធានក្រុម ជាមួយនឹងកម្មករធ្វើម៉េច ធានាសាមគ្គីភាពនៅក្នុងរោងចក្ររបស់យើង។ ចំណុចនេះ ពូយល់ថាវាមិនមែនជាការលំបាកក្នុងការធ្វើនោះទេ។
គួរបញ្ជាក់ថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជានៅព្រឹកថ្ងៃ ទី០៦ ខែមិថុនាឆ្នាំ២០១៨នេះបានអញ្ជើញជួបសំណេះសំណាលជាមួយកម្មករ កម្មការិនីសរុប ២២.៤៧០នាក់ មកពីរោងចក្រ សហគ្រាស ចំនួន ៨ នៅក្នុងខេត្តកំពង់ចាម។
ជំនួបនៅថ្ងៃនេះគឺជាជំនួបលើកទី៤៤ហើយគិតចាប់តាំងពីថ្ងៃទី២០ខែសីហាឆ្នាំ២០១៧មក ដែល មានកម្មករ និយោជិតសរុបជាង ៥៦ ម៉ឺននាក់។ ពិធីជួបសំណេះសំណាលប្រារព្ធធ្វើឡើងនៅស្រុកជើងព្រៃ ខេត្តកំពង់ចាម។
កម្មករ កម្មការិនី ទាំងអស់មកពីរោងចក្រ សហគ្រាស នៅស្រុកជើងព្រៃចំនួន ៧និង ស្រុកបាធាយចំនួន ១ដែលមានអ្នកវិនិយោគមកពីប្រទេសចិនចំនួន ៦,កាណាដាចំនួន១និងខ្មែរចំនួន១ ។ រោងចក្រ សហ គ្រាសទាំង៨នេះ មានរោងចក្រកាត់ដេរសម្លៀកបំពាក់ចំនួន ១, ផលិតស្បែកជើងចំនួន ៥, ផលិតស្រោមដៃចំនួន ១និង ផលិតការុងចំនួន១ ។ ផលិតផលផលិតបាន ត្រូវបាននាំចេញទៅកាន់ទីផ្សារអន្តរជាតិ និង ផ្គត់ផ្គង់ទីផ្សារក្នុងប្រទេស។
បច្ចុប្បន្នខេត្តកំពង់ចាមមានរោងចក្រសហគ្រាសគ្រឹះស្ថានចំនួន៤០០មានកម្មករនិយោជិត ៣៥.៤៦០ នាក់ ក្នុងនោះរោងចក្រកាត់ដេរសម្លៀកបំពាក់ និង ផលិតស្បែកជើងមានចំនួន ១៤ មានកម្មករនិយោជិតចំនួន ២៥.៧៧១ នាក់ ដែលមានប្រាក់ឈ្នួលសរុបជាង ៥២ លានដុល្លារក្នុងមួយឆ្នាំ។
មុននឹងបញ្ចប់សម្តេចតេជោ ហ៊ុន សែន នាយករដ្ឋមន្ត្រី បានជូនពរបងប្អូនកូនក្មួយកម្មករ កម្មការិនី និយោជកទាំងអស់ ជួបតែសេចក្តីសុខចម្រើនគ្រប់ៗគ្នា។ ទន្ទឹមនឹងនោះដែរ សម្តេចតេជោ ហ៊ុន សែន បានឧបត្ថម្ភនូវប្រាក់លើកទឹកចិត្តមួយចំនួនដល់កម្មករ និងដល់កម្មការិនីមានផ្ទៃពោះចំនួន ៩៩៧ នាក់ផងដែរ ហើយបន្ទាប់មក សម្តេចតេជោ ហ៊ុន សែន បានថតរូបអនុស្សាវរីយ៍ Free Selfieដែលបង្ហាញការអាណិតស្រឡាញ់ និងយកចិត្តទុកដាក់យ៉ាងស្មោះស្ម័គ្រចំពោះបងប្អូនកូនក្មួយ កម្មករ កម្មការនីនៅក្នុងបរិយាកាសស្និទ្ធស្នាល និងសប្បាយរីករាយក្រៃលែង៕
Source: Kampuchea Thmey Daily
0 Comments