ប្រធាន​ក្លិប​បឹងកេត ស្វែងរក​ដី​សាងសង់​កីឡដ្ឋាន​ផ្ទាល់ខ្លួន​ឲ្យ​បាន​មុន​បោះឆ្នោត​ជ្រើសរើស​តំណាងរាស្ត្រ​មកដល់

​ក្លិប​បឹងកេត ដែល​ធ្លាប់​លើក​ជើងឯក​ពានរង្វាន់​លី​គ​កំពូល​កម្ពុជា ៣​សម័យកាល បានសម្រេច​ផ្លាស់ប្តូរ​ក្បាលម៉ាស៊ីន កាលពីដើម​ខែឧសភា កន្លងទៅ​ក្រោយ លោក ស៊ីវ ថា ដែលជា​ប្រធាន​ក្លិប​ចាស់​បានសម្រេច​ដើរចេញ​កាល​ពី​ដើមឆ្នាំ​កន្លង​ ហើយ​ជំនួស​វិញ​ដោយ​លោកស្រី ពុធ ធីតា ដែលមាន​ម្តាយបង្កើត​របស់​កុម​រា Dome ដែល​ក្លិប​ធ្លាប់​បញ្ជូនទៅ​ហ្វឹកហាត់​នៅ​ក្លិប FC Barcelona​។

នៅ​ពេល​នេះ​លោកស្រី ពុធ ធីតា ម្ចាស់​ថ្មី​ក្លិប​បឹងកេត​ថ្មី បាន​ឲ្យ​ដឹង​ថា ​បច្ចុប្បន្ន លោកស្រី និង ក្រុម​គ្រួសារ ព្រមទាំង​សហការី កំពុង​ខ្នះខ្នែង​ស្វែងរក​ដី​ឲ្យ​បាន​មុន​ការបោះឆ្នោត​ជ្រើសរើស​តំណាងរាស្ត្រ​ខែកក្កដា ខាងមុខ ដើម្បី​ទុក​សង់​កីឡដ្ឋាន​ផ្ទាល់ខ្លួន​។ មាន​ទីតាំង​មួយចំនួន​ដែល​ថ្នាក់ដឹកនាំ​បឹង​កេត កំពុងតែ​ពិចារណា​ថា​នឹង​សាងសង់​កីឡដ្ឋាន​ផ្ទាល់ខ្លួន​នេះ តែ​មិនទាន់​សម្រេចចិត្ត​នៅឡើយ​ទេ​។



ថៅកែ​ក្លិប​បាល់ទាត់​ជា​ស្ត្រី​ដំបូង​គេ​នៅ​កម្ពុជា​រូប​នេះ​ បាន​លើក​ឡើង​ថា «​ថា​ធ្វើ​ម៉េច​ឲ្យ​បាន​មុន​បោះឆ្នោត​ហ្នឹងឯង ពីព្រោះ​អី​ស្តា​ត យើង​ធ្វើ​មិនមែន​ចេះ​តែ​ធ្វើ​ងាយៗ​ទេ ព្រោះ​ត្រូវ​អស់​ដើមទុន​ច្រើន ហើយ​ក្នុងចំណោម​ពីរ​ឆ្នាំនេះ​គឺ​យើង​នឹង​ប្រឹងប្រែង​ធ្វើ​ឲ្យ​ស្តា​ត​មួយ​ចេញ​ជា​រូបរាង​តែម្ដង តែ​ឥឡូវ​យើង​ធ្វើ​ម៉េច​ឲ្យ​បាន​ដី (​ទីតាំង​) មុន​បោះឆ្នោត​សិន​»​។ លោកស្រី​មានបំណង​ចង់បាន​ដី​ប្រមាណ​ទំហំ​ចាប់ពី​២​ហិច​តា​ឡើង​ទៅ​ សម្រាប់​សាងសង់​ហេដ្ឋារចនាសម្ព័ន្ធ​ផ្សេងៗ ដោយ​មិន​ត្រឹមតែ​ទីលាន​បាល់ទាត់​មួយ​ប៉ុណ្ណោះ​ទេ​។



ក្លិប​បឹងកេត ឡើង​មកលេង​ពានរង្វាន់​លី​គ​កំពូល​កម្ពុជា នៅ​ឆ្នាំ​២០១២ ហើយ​ធ្លាប់​ឈ្នះ​ជើងឯក​ចំនួន​៣​លើក​គឺ​នៅ​ឆ្នាំ​២០១២,២០១៦ និង​២០១៧ ខណៈ​នៅ​ឆ្នាំ​២០១៣ និង​២០១៤ ត្រឹម​ឈរជើង​ឯក​រង​។ នៅ​ឆ្នាំ​២០១៧ ក្រុម​នេះ​ឈ្នះ​ពានរង្វាន់ CNCC Cup 2017 ផងដែរ​។ ចំណែក​ពានរង្វាន់​នៅ​ក្រៅ​ស្រុក​វិញ​ក្រុម​ដែលមាន​ប្រភព​មកពី​ខេត្តកំពង់ចាម មួយ​នេះ​ធ្លាប់​ចេញទៅ​ប្រកួត​វគ្គ​ជម្រុះ​តាម​ពូ​ល​ពានរង្វាន់ AFC President's Cup នៅ​ឆ្នាំ​២០១៣ ធ្លាប់​ឡើង​ដល់​វគ្គ​ផ្ដាច់ព្រ័ត្រ​ពានរង្វាន់ Toyota Mekong Club Championship 2015 តែ​ចាញ់​ក្រុម Buriram United របស់​ថៃ និង​ប្រកួត​ក្នុង​ពានរង្វាន់​នៅ​ឆ្នាំ​២០១៦ និង​២០១៧ ផង​ដែរ​។ នៅ​ឆ្នាំ​២០១៨​និង​២០១៨ ក្រុម​នេះ​មានឈ្មោះ​ចេញទៅ​លេង​ពានរង្វាន់​លំដាប់​ទី​២​ប្រចាំ​ទ្វីបអាស៊ី AF Cup ផងដែរ​តែ​ធ្លាក់​ត្រឹម​វគ្គ​ជម្រុះ​តាម​ពូ​ល​ដូចគ្នា​។ គិត​មក​ត្រឹម​ពេលនេះ​ក្លិប​បឹងកេត នៅ​មិន​ទាន់​មាន​កីឡដ្ឋាន​ប្រើប្រាស់​ផ្ទាល់ខ្លួន​នៅឡើយ​ទេ ដោយ​ជួល​កីឡដ្ឋាន​ផ្សេងៗ​ប្រើប្រាស់​បណ្តោះ​អាសន្ន​សិន​៕

 

Source: Kampuchea Thmey Daily