ភ្នំពេញ ៖ បុរសម្នាក់ ត្រូវបានសមត្ថកិច្ចមូលដ្ឋានចាប់ខ្លួនតាមបណ្ដឹងរបស់ប្រជាពលរដ្ឋរងគ្រោះ កាលពីថ្ងៃទី២ ខែកក្កដា ឆ្នាំ២០១៨ ចោទថា ជននេះ បានប្រើកាំបិតបុ័ងតោដេញកាប់ប្លន់យកទ្រព្យសម្បត្តិ ប្រព្រឹត្តនៅភូមិអូរបែកក្អម សង្កាត់អូរបែកក្អម ខណ្ឌសែនសុខ។
ជនដែលត្រូវបានចាប់ខ្លួនខាងលើ ឈ្មោះ ជ័យ រិទ្ឋីឧត្តម អាយុ២៨ឆ្នាំ មុខរបរ និងទីលំនៅមិនពិតប្រាកដស្នាក់នៅបោះតង់លើដីឡូត៍ទំនេរមួយកន្លែងនៅក្នុងភូមិអូរបែកក្អម។
ស្ត្រីឈ្មោះ ជូ លិត អាយុ៣៧ឆ្នាំ មុខរបររើសអេតចាយ ជាជនរងគ្រោះ ស្នាក់នៅពនេចរ បោះតង់នៅលើដីឡូត៍ទំនេរ ក្នុងភូមិអូរបែកក្អម ក្រុមទី៦ក្បែរ។ ជនរងគ្រោះ បានអោយដឹងថា នៅមុនពេលកើតហេតុ នាងនិងកូនចៅបានយកម៉ូតូសម្រាប់អូសរ៉ឺម៉កដើររើសអេតចាយ យកមកចតទុកក្បែរកន្លែងដេក (រោងប្រក់តង់) រួចក៏បាននាំគ្នាចូលដេកលង់លក់។ ក្រោយមកនៅវេលាម៉ោង១រំលងអធ្រាត្រនាថ្ងៃទី០១ ខែកក្កដា ឆ្នាំ២០១៨ ក៏ស្រាប់តែលេចមុខជនសង្ស័យខាងលើ បានដើរមកស្រែកគំរាមទារលុយ ពេលនោះ នាងជនរងគ្រោះក៏បានឆ្លើយតបថា គ្មានលុយទេ ក៏ស្រាប់តែជននេះយកកាំបិតបុ័ងតោដែលកំពុងកាន់ជាប់នៅដៃស្តាំមកកាប់បង្គោលមុងរបស់នាង ហើយបន្តដេញកាប់នាងនិងក្រុមគ្រួសារនាំគ្នារត់គេចខ្លួនដោយក្តីភ័យខ្លាចផ្អើលទាំងយប់។
នាងបន្តថា នៅនាងកំពុងរត់គេខ្លួន ជននេះបានដោះយកម៉ូតូរបស់នាងចេញពីរ៉ឺម៉ក រួចជិះគេចខ្លួនទៅបាត់ មិនដឹងទៅទីណា។ ព្រឹកឡើងនាងបានមកប្តឹងប៉ូលិសមូលដ្ឋានឲ្យជួយអន្តរាគមន៍ និងធ្វើកំណត់ហេតុទុក។ នៅវេលាម៉ោង១១ថ្ងៃដដែល នាងបានឃើញជនខាងលើត្រឡប់មករោងចក្ររបស់គេវិញ ក៏មករាយការណ៍ប្រាប់ប៉ូលិសអោយមកចាប់ខ្លួនតែម្តង។
ជនជាប់ចោទខាងលើបានសារភាពប្រាប់ប៉ូលិសថា ៖ ម៉ូតូរបស់នាងដែលខ្លួនបានប្លន់យកទៅនោះម៉ាកសង់កូរ៉េយកទៅដាក់បញ្ចាំអោយគេនៅឃ្លាំងរំសេវបានលុយ៤០០ ០០០ រៀល តែខ្លួនបានយកចាយវាយអស់ហើយ។ ប៉ូលិសនិយាយថា ៖ គាត់(ជនជាប់ចោទ)មិនបានស្គាល់អ្នកទទួលបញ្ចាំនោះទេ នៅពេលសួររកម៉ូតូដើម្បីទៅយកមកប្រគល់អោយម្ចាស់គេវិញ។
ជនរូបនេះក្រោយចាប់ខ្លួនប៉ូលិសបានរកឃើញសារធាតុញៀន នៅក្នុងល្បាយទឹកនោម របស់គាត់ ដែលបញ្ជាក់ថា គាត់បានពាក់ព័ន្ធក្នុងការប្រើប្រាស់គ្រឿងញៀនខុសច្បាប់ផងដែរ។
លោកនាង ផល្លី នាយប៉ុស្តិ៍នគរបាលរដ្ឋបាល អូរបែកក្អម បានដាក់បន្ទុកចោទមកលើជនល្មើសថា ៖ ជា ជនសង្ស័យ លួចមានស្ថានទម្ងន់ទោស ហើយត្រូវបានបញ្ជូនទៅតុលាការវិនិច្ឆ័យទោស៕
Source: Kampuchea Thmey Daily
0 Comments