ប្រធានកាកបាទក្រហម (ICRC) កាលពីថ្ងៃអាទិត្យបាននិយាយថា វាមិនមានសុវត្ថិភាពទេ សម្រាប់ជនភៀសខ្លួនរ៉ូហ៊ីងយ៉ាក្នុងការវិលត្រឡប់ទៅកាន់លំនៅដ្ឋានរបស់ពួកគេវិញក្នុងប្រទេសមីយ៉ាន់ម៉ាដែលជាកន្លែងគាត់បានរៀបរាប់ថា ភូមិទាំងមូលត្រូវបានគេបោះបង់ និងបំផ្លាញចោល។
លោក Peter Maurer បានធ្វើដំណើរទៅមើលនៅភាគខាងលិចប្រទេសមីយ៉ាន់ម៉ាមុនពេលទៅទស្សនាជំរំជនភៀសខ្លួននៅតាមព្រំដែនក្នុងប្រទេសបង់ក្លាដែសដែលជាកន្លែងមានជនជាតិរ៉ូហ៊ីងយ៉ាជិតមួយលាននាក់បានស្វែងរកការជ្រកកោនដោយគេចពីអំពើហិង្សា។
ជនមូស្លីមដែលត្រូវគេធ្វើទុកបុកម្នេញនេះបានទៅដល់ប្រទេសបង់ក្លាដែសចាប់តាំងពីខែសីហាមកម្ល៉េះដោយគេចចេញពីការបង្ក្រាបដោយកងទ័ពមីយ៉ាន់ម៉ានៅក្នុងរដ្ឋរ៉ាក់ឃីនដែលអង្គការសហប្រជាជាតិបានប្រដូចទៅនឹងការបោសសម្អាតជនជាតិភាគតិច។
នៅថ្ងៃចន្ទ អគ្គលេខាធិការអង្គការសហប្រជាជាតិលោក Antonio Guterres បានធ្វើទស្សនកិច្ចជាលើកដំបូងទៅកាន់ជំរំនោះចាប់តាំងពីការហូរចូលនៃជនជាតិរ៉ូហ៊ីងយ៉ាជិត៧០០,០០០នាក់ដែលបានបង្កឲ្យមានវិបត្តិមនុស្សធម៌នៅភាគអាគ្នេយ៍ប្រទេសបង់ក្លាដែស។
លោក Maurer ដែលជាប្រធានគណៈកម្មាធិការកាកបាទក្រហមអន្តរជាតិបាននិយាយថា ការងារបន្ថែមទៀតគឺត្រូវការជាចាំបាច់ដើម្បីកែលម្អស្ថានភាពដែលលោកបានឃើញនៅក្នុងរដ្ឋរ៉ាក់ឃីនក្នុងអំឡុងពេលនៃដំណើរទស្សនកិច្ចផ្លូវការកាលពីប៉ុន្មានថ្ងៃមុន។
លោក Maurer បានប្រាប់ AFP ក្នុងបទសម្ភាសន៍មួយនៅជំរំជនភៀសខ្លួន Chakmarkul ថា “អ្វីដែលខ្ញុំបានឃើញគឺការបំផ្លិចបំផ្លាញភូមិ ការបោះបង់ចោលស្ថានភាព ការរំខាននៅក្នុងទីផ្សារ រំខានការចិញ្ចឹមជីវិតនិងរំខានសហគមន៍។ ខ្ញុំមិនគិតថា ពេលវេលាបច្ចុប្បន្នគឺជាលក្ខខណ្ឌដ៏ល្អមួយដើម្បីវិលត្រឡប់មកវិញនោះទេ”។
គួរបញ្ជាក់ជាថ្មីថា ប្រទេសបង់ក្លាដែសនិងមីយ៉ាន់ម៉ាបានព្រមព្រៀងគ្នាកាលពីខែវិច្ឆិកាដើម្បីចាប់ផ្តើមការធ្វើមាតុភូមិនិវត្តន៍របស់ជនជាតិរ៉ូហ៊ីងយ៉ាប៉ុន្តែដំណើរការនេះបានផ្អាកដោយសារភាគីទាំងពីរបានចោទប្រកាន់គ្នាទៅវិញទៅមកថាបានរារាំងកិច្ចខិតខំប្រឹងប្រែងនេះ។
មានមនុស្សតិចជាង២០០នាក់ត្រូវបានតាំងទីលំនៅថ្មីហើយភាគច្រើនមិនព្រមវិលត្រឡប់មកវិញទេរហូតទាល់តែសិទ្ធិ ភាពជាពលរដ្ឋនិងសុវត្ថិភាពរបស់ពួកគេត្រូវបានធានា៕ AFP
Source: Kampuchea Thmey Daily
0 Comments