ព្រះវិហារ ៖ ជនសង្ស័យម្នាក់ និងវត្ថុតាងអាវុធចំនួន៣ដើម ត្រូវសមត្ថកិច្ចឃាត់ខ្លួនពីបទជួញដូរគ្រឿងញៀន ដោយឆែករកឃើញនៅជាប់នឹងខ្លួនមានថ្នាំញៀនចំនួន១០កញ្ចប់តូច កាលពីថ្ងៃទី១ខែកក្កដា ឆ្នាំ២០១៨ ស្ថិតនៅភូមិអន្លង់វែង ឃុំកន្ទួត ស្រុកជាំក្សាន្ត។
ភ្នាក់ងារបានឱ្យដឹងថា លទ្ធផលឃាត់ខ្លួននេះដោយមានការសហការល្អរវាងសមត្ថកិច្ចមូលដ្ឋាន និងកម្លាំងទាហានកងពលតូចអន្តរាគមន៍លេខ៨ផងដែរ។
ជនសង្ស័យត្រូវបានឃាត់ខ្លួននៅវេលាម៉ោង១២និង៣០នាទីរសៀលថ្ងៃទី១ ខែកក្កដា ឆ្នាំ២០១៨ ដោយហូតបានថ្នាំញៀនប្រភេទម៉ាទឹកកកក្រាមពណ៌សចំនួន១០កញ្ចប់តូច ,អាវុធចំនួន៣ដើម គ្រាប់អាការ៤៧ចំនួន៣២គ្រាប់ ម៉ូតូវ៉េវ១គ្រឿង និងឧបករណ៍សម្រាប់ជក់គ្រឿងញៀនមួយចំនួនទៀត។
សមត្ថកិច្ចរៀបចំបញ្ជូនជនសង្ស័យរួមទាំងវត្ថុតាងទៅតុលាការនៅថ្ងៃនេះ ដើម្បីផ្តន្ទាទោសទៅតាមផ្លូវច្បាប់។ ជនសង្ស័យឈ្មោះទន់ ឈាន ភេទប្រុស អាយុ៣៦ឆ្នាំ មុខរបរមិនពិតប្រាកដ ជនជាតិខ្មែររស់នៅភូមិអន្លង់វែងឃុំកន្ទួតខាងលើ។
ប្រជាពលរដ្ឋរាយការណ៍ឱ្យដឹងថា ស្រុកជាំក្សាន្តជាសម្បុកសេព និងជួញដូរគ្រឿងធំជាងគេនៅទូទាំងខេត្តព្រះវិហារ ដែលក្រុមជនល្មើសនិងមេខ្លោងគ្រឿងធំនាំចូល មកពីចំណុចមុំ៣ស្រុកជាំក្សាន្តនិងច្រកទ្វារព្រំដែនទ្បាវនៅឃុំកំពង់ស្រទ្បៅ ស្រុកឆែប។ ប្រភពបន្តថា ការបង្ក្រាបខាងលើនេះ មិនប៉ះចំមេខ្លោងគ្រឿងញៀនធំនោះទេ ដូច្នេះខេត្តព្រះវិហារនៅតែជាខេត្តកើតបទល្មើសគ្រឿងខ្លាំងក្លាដដែល៕
Source: Kampuchea Thmey Daily
0 Comments