ភ្នំពេញ ៖ នៅក្នុងជំនួបជាមួយ លោក Panyarak Poolthup ឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រថៃប្រចាំព្រះរាជាណាចក្រកម្ពុជា ដែលទើបតែទទួលសារតាំងជាឯកអគ្គរាជទូតថ្មី នៅទីស្តីការក្រសួង កាលពីរសៀលថ្ងៃព្រហស្បតិ៍ ២រោច ខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៣១ ខែឧសភា គ.ស ២០១៨ លោកវេង សាខុន រដ្ឋមន្ត្រី សង្ឃឹមនិងជឿជាក់ថា ប្រទេសថៃនឹងបន្តការគាំទ្រ ផ្តល់កិច្ចសហប្រតិបត្តិការឲ្យកាន់តែរឹងមាំ និងល្អប្រសើរថែមទៀត ពិសេសការធ្វើពាណិជ្ជកម្មលើផលិតផលកសិកម្ម។
មានប្រសាសន៍នាឱកាសនេះ លោក រដ្ឋមន្ត្រីបានសម្តែងនូវកិច្ចស្វាគមន៍ និងអបអរសាទរជូនចំពោះលោក ឯកអគ្គរាជទូតដែលត្រូវបានតែងតាំងឲ្យមកបំពេញការងារការទូតក្នុងព្រះរាជាណាចក្រកម្ពុជា។ លោក រដ្ឋមន្ត្រីបានសម្តែងនូវអំណរគុណយ៉ាងជ្រាលជ្រៅជូនចំពោះរាជរដ្ឋាភិបាលថៃ ដែលកន្លងមកបានជួយគាំទ្រនិងផ្តល់កិច្ចសហប្រតិបត្តិការលើគ្រប់វិស័យ ជាពិសេសវិស័យកសិកម្មក្នុងនោះមានកិច្ចសហប្រតិបត្តិការលើការងារសុខភាពសត្វ និងផលិតកម្មសត្វ ការបណ្តុះបណ្តាលធនធាន មនុស្សទាក់ទងនឹងវិស័យកសិកម្ម ការទទួលទិញកសិផលកម្ពុជា ពិសេសផលិតផលដំឡូងមី។ល។ លោក រដ្ឋមន្ត្រី សង្ឃឹមនិងជឿជាក់ថា ប្រទេសថៃនឹងបន្តការគាំទ្រ ផ្តល់កិច្ចសហប្រតិបត្តិការឲ្យកាន់តែរឹងមាំ និងល្អប្រសើរថែមទៀត ពិសេសការធ្វើពាណិជ្ជកម្មលើផលិតផលកសិកម្ម។
លោកឯកអគ្គរាជទូត បានកោតសរសើរពីការរីកចម្រើនរបស់ប្រទេសកម្ពុជា ដែលក្នុងនោះវិស័យហេដ្ឋារចនាសម្ព័ន្ធគ្រប់បែបយ៉ាង ដែលជាចលករមួយដ៏សំខាន់ជួយជំរុញកំណើនសេដ្ឋកិច្ចរបស់កម្ពុជាតាមរយៈការនាំចេញផលិតផល និងកសិផលទៅកាន់ទីផ្សារអន្តរជាតិ។ លោកឯកអគ្គរដ្ឋទូតបានវាយតម្លៃខ្ពស់លើកិច្ចសហប្រតិបត្តិការរវាងប្រទេសទាំងពីរនាពេលកន្លងមក ពិសេសលើវិស័យកសិកម្ម ហើយលោក ឯកអគ្គរដ្ឋទូតបានសម្តែងនូវអំណរគុណយ៉ាងជ្រាលជ្រៅជូនចំពោះលោក រដ្ឋមន្ត្រី លោក ថ្នាក់ដឹកនាំក្រសួងគ្រប់លំដាប់ថ្នាក់ដែលបានផ្តល់កិច្ចសហប្រតិបត្តិការជាមួយរាជរដ្ឋាភិបាលថៃ ក្រុមការងារបច្ចេកទេសថៃ និងវិនិយោគិនថៃបានយ៉ាងល្អប្រសើរ។ ក្នុងឱកាសបំពេញបេសកកម្មការទូតនៅព្រះរាជាណាចក្រកម្ពុជា លោកឯកអគ្គរដ្ឋទូតបានសន្យាថានឹងខិតខំអស់លទ្ធភាព ធ្វើយ៉ាងណាជួយជំរុញ ពង្រឹងនិងពង្រីកកិច្ចសហប្រតិបត្តិការរវាងប្រទេសទាំងពីរឲ្យបាន់តែល្អប្រសើរមួយកម្រិតទៀត។
ក្នុងជំនួបនាថ្ងៃនេះ ភាគីទាំងពីរបានលើកយកប្រធានបទសំខាន់ៗមួយចំនួនមកពិភាក្សាមានជាអាទិ៍៖ ទី១.កិច្ចសហប្រតិបត្តិការលើការកំណត់តំបន់ដាំដុះឲ្យបានសមស្របតាមស្ថានភាព គុណភាពដី ប្រភេទពូជ ភាពអំណោយផលនៃទឹក និងការប្រែប្រួលអាកាសធាតុ ដែលប្រទេសថៃធ្លាប់មានបទពិសោធន៍កន្លងមក ទី២. ការគ្រប់គ្រងសហគមន៍ព្រៃឈើឲ្យមាននិរន្តរភាព ការធ្វើឲ្យប្រសើរឡើងនូវកម្រិតជីវភាពរបស់ប្រជាសហគមន៍តាមរយៈការបង្កើតមុខរបស់ថ្មី ដើម្បីកាត់បន្ថយការពឹងផ្អែកលើផលនិងអនុផលព្រៃឈើតែមួយមុខ ទី៣. ការសហការលើការអនុវត្តកសិកម្មតាមកិច្ចសន្យា (Contract Farming) រវាងប្រទេសទាំងពីរឲ្យកាន់តែមានប្រសិទ្ធភាព ទី៤. ជំរុញកិច្ចសហប្រតិបត្តិការលើវិស័យជលផល តាមរយៈការចុះអនុស្សរណៈយោគយល់គ្នារវាងប្រទេសទាំងពីរ ដើម្បីធ្វើការគ្រប់គ្រង និងទប់ស្កាត់បទល្មើសនេសាទឲ្យមានប្រសិទ្ធភាព។
សូមរំលឹកថា ត លោក Panyarak Poolthup ឯកអគ្គរាជទូតវិសាមញ្ញនិងពេញសមត្ថភាពនៃព្រះរាជាណាចក្រថៃប្រចាំព្រះរាជាណាចក្រកម្ពុជា ដែលទើបតែទទួលសារតាំងជាឯកអគ្គរាជទូតថ្មីកាលពីថ្ងៃទី១៩ ខែមេសា ឆ្នាំ២០១៨ កន្លងមកនេះ៕
Source: Kampuchea Thmey Daily
0 Comments