ភ្នំពេញ ៖ លោក តេស រុក្ខាផល អគ្គលេខាធិការរងនៃគណៈកម្មាធិការដោះស្រាយបញ្ហាកូដកម្មបាតុកម្មគ្រប់មុខសញ្ញា បានមានប្រសាសន៍ប្រាប់កាលពីព្រឹកថ្ងៃទី១ ខែមិថុនាថា ក្រុមការងារក្រសួងការងារនឹងបង្កើនការចុះបើកប្រាក់សំណងដល់កម្មករនៅតាមរោងចក្រដែលនៅសេសសល់និងថ្មីមួយចំនួនទៀតនៅខេត្តកំពង់ស្ពឺ រាជធានីភ្នំពេញ និងខេត្តកណ្តាលប្រមាណជាង១ពាន់នាក់ដែលថៅកែរត់ចោលដើម្បីឲ្យពួកគាត់យកទៅដោះស្រាយជីវភាពប្រចាំថ្ងៃ។
លោកបន្តថា ក្រសួងប្តេជ្ញាថា នឹងបង្កើនការបើកប្រាក់សំណងដល់កម្មករនិយោជិតដែលថៅកែរត់ចោលឲ្យបានរួចរាល់នៅចុងខែមិថុនានេះ បន្ទាប់ពីបើកលើកទី២ជិតបាន១០០ភាគរយរួចនោះ។
ការបង្កើនការបើកប្រាក់សំណងដល់កម្មករនេះ បានធ្វើឡើង បន្ទាប់ពីប្រមុខរាជរដ្ឋាភិបាលកម្ពុជាសម្តេចតេជោហ៊ុនសែនកាលពីព្រឹកថ្ងៃទី៣០ ឧសភាកន្លងទៅក្នុងពិធីជួបសំណេះសំណាលជាមួយកម្មករ កម្មការិនី ១៦,៤៧៤នាក់នៅស្រុកស្អាង ខេត្តកណ្តាល បានជំរុញឲ្យរដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈពន្លឿនការដោះស្រាយបញ្ហាជូនកម្មករ-កម្មការិនីដែលត្រូវថៅកែរត់ចោលឲ្យបានឆាប់រហ័សបំផុត ហើយប្រសិនបើខ្វះថវិកាសម្ដេចនឹងផ្តល់ថវិកាបន្ថែមទៀត ខណៈរាជរដ្ឋាភិបាលបានបញ្ចេញសាច់ប្រាក់ចំនួន៤លាន៦សែនដុល្លាររួចហើយសម្រាប់បើកដោះស្រាយការងារ។
សម្ដេចតេជោនាយករដ្ឋមន្ត្រី បានថ្លែងយ៉ាងដូច្នេះថា «ខ្ញុំបានផ្ដល់ប្រាក់បុរេប្រទានឲ្យក្រសួងការងារ និងបណ្ដុះបណ្ដាលវិជ្ជាជីវៈ ៤លាន៦សែនដុល្លាររួចហើយ ដើម្បីដោះស្រាយជូនកម្មករដែលថៅកែរោងចក្ររត់ចោល។ ក៏ប៉ុន្តែតំបន់ចក្រអង្រែ តំបន់ក្បែរខាងយើងនេះ នៅតែមានរឿងនេះ។ តើមកពីអ្វី ខ្ញុំសុំរបាយការណ៍។ តើមកពីអ្វីបានជាអស់លោកមិនបញ្ចប់ ហើយទុកឲ្យក្មួយៗខ្លះចង់ដាក់ញ្ញត្តិនៅផ្ទះខ្ញុំ។ ក្មួយៗបោះតង់ តើរឿងនោះវាជារឿងអីឲ្យប្រាកដ សូមឲ្យខ្ញុំបានដឹងផងបានទេអំពីបញ្ហានេះ។ តើយើងអាចបុរេប្រទានលុយបន្ថែម ដើម្បីដោះស្រាយបញ្ចប់រឿងហ្នឹងបានទេ? ខ្ញុំតែងតែនិយាយថា ឲ្យអស់លោកអនុវត្តតាមច្បាប់ កុំអនុវត្តន៍តាមបទបញ្ជា»។
លោក តេស រុក្ខាផល បានពន្យល់ថាមូលហេតុដែលក្រសួងនៅមិនទាន់បើកប្រាក់សំណងដល់កម្មករនៅរោងចក្រដែលនៅសល់ទាំងនេះគឺដោយសារតែក្រសួងកំពុងធ្វើការស្រង់ស្ថិតិនិងឯកសារមួយចំនួនរបស់កម្មករព្រោះថាមានកម្មករខ្លះបានបាត់ឯកសារទាំងអស់តែម្តងនៅពេលថៅកែរត់ចោលដែលទាមទារស្វែងរកឯកសារមកបញ្ជាក់ឲ្យបានច្បាស់លាស់។
លោកតេស រុក្ខាផល បានបន្តទៀតថា ការបើកប្រាក់សំណងដល់កម្មករ ដែលថៅកែរត់ចោលនេះរួមមានប្រាក់ខែប្រចាំឆ្នាំ ប្រាក់ឈប់សម្រាកចុងក្រោយ និងប្រាក់ដែលថៅកែបណ្តេញចេញឬអតីតភាពការងារជាដើម។
លោកបានណែនាំដល់ក្រុមការងារក្រសួងត្រូវពិនិត្យលិខិតស្នាមរបស់កម្មករដែលត្រូវថៅកែរត់ចោលឲ្យបានច្បាស់លាស់ដើម្បីធានាបាននូវតម្លាភាពនិងគណនីយភាពជួនដល់កម្មករ។
ជាមួយគ្នានេះដែរលោកក៏បានណែនាំដល់កម្មករដែលត្រូវទទួលបានប្រាក់សំណងត្រូវភ្ជាប់មកជាមួយនូវឯកសារសំខាន់ៗ ដូចជា កាតសម្គាល់ខ្លួនកម្មករក្នុងរោងចក្រ សៀវភៅការងារ ប័ណ្ណបេឡាជាតិរបបសន្តិសុខសង្គម អត្តសញ្ញាណប័ណ្ណសញ្ជាតិខ្មែរ លិខិតឆ្លងដែនឬកិច្ចសន្យាការងារនិងប័ណ្ណបើកប្រាក់ឈ្នួលប្រចាំខែបើមាន។
សូមរំលឹកថា ការបើកប្រាក់សំណងលើកទី២ បានចាប់ផ្តើមកាលពីដើមខែឧសភាទៅលើរោងចក្រចំនួន៥ ខណៈលើកទី១បានបើករួចរាល់ហើយកាលពីខែមេសាទៅលើរោងចក្រចំនួន៤ដែលមានកម្មករ២៥៤២នាក់។
គួរបញ្ជាក់ថាថៅកែរោងចក្រដែលរត់ចោលកម្មករភាគច្រើនគឺដោយសារតែមិនមានប្រាក់គ្រប់គ្រាន់សម្រាប់បើកប្រាក់បំណាច់ឆ្នាំនិងប្រាក់អតីតភាពការងារដល់កម្មករដែលមានចំនួនដ៏ច្រើនខណៈដែលមានកម្មករខ្លះអាចទទួលបានរហូតដល់រាប់ពាន់ដុល្លារបើសិនជាធ្វើការចាប់ពី៥ទៅ១០ឆ្នាំ៕
Source: Kampuchea Thmey Daily
0 Comments