ភ្នំពេញ ៖ មន្ត្រីជាន់ខ្ពស់ក្រសួងពាណិជ្ជកម្មបានអះអាងថា រាជរដ្ឋាភិបាលកម្ពុជា មិនដែលធ្វើច្បាប់គាបសង្កត់ដល់អ្នកវិនិយោគបរទេស ដែលមកបណ្តាក់ទុនរកស៊ីនៅប្រទេសកម្ពុជាឡើយ ពោលគឺមានតែជួយគាំទ្រ និងការពារដល់អ្នកវិនិយោគគ្រប់ពេលវេលាទាំងអស់។
ថ្លែងនៅក្នុងពិធីសម្ពោធផលិតផលមីហ្គោល ដែលសហការជាមួយក្រុមហ៊ុន ស៊ូន ស៊ូន គ្រុប ក្រុមហ៊ុន Mamee Double Decker និងក្រុមហ៊ុន Eragold (Singapore) Corporation កាលពីរាត្រីថ្ងៃទី៣១ ខែឧសភា ឆ្នាំ២០១៨ នៅមជ្ឈមណ្ឌលកោះពេជ្រ លោក ឈួន ដារ៉ា រដ្ឋលេខាធិការក្រសួងពាណិជ្ជកម្ម បានមានប្រសាសន៍ថា រាជរដ្ឋាភិបាលកម្ពុជា តែងតែផ្ដល់ភាពងាយស្រួល ចំពោះអ្នកវិនិយោគ និងពាណិជ្ជករ ហើយកម្ពុជា តែងតែធ្វើច្បាប់ដើម្បីបើកផ្លូវឲ្យអ្នករកស៊ីមានភាពកាន់ងាយស្រួលជាពិសេសសម្រាប់បរទេស ។
លោកបានបន្តថា «កម្ពុជានឹងមិនធ្វើច្បាប់ ដើម្បីប្រែក្រឡាស់គាបសង្កត់ អ្នកវិនិយោគ នៅស្រុកខ្មែរនិងបរទេសឡើយ គឺរដ្ឋាភិបាលកម្ពុជាមានតែផ្ដល់ ឱកាសជាច្រើនសម្រាប់ អ្នកវិនិយោគនៅប្រទេសកម្ពុជានិងតែងតែគាំទ្រអ្នកវិនិយោគ គ្រប់ពេលវេលា ដូច្នេះកម្ពុជាតែងតែរៀបចំ វេទិការវាងរាជរដ្ឋាភិបាល ជាមួយវិស័យឯកជន ដើម្បីជួយដោះស្រាយ ជាមួយគ្នាទៅវិញទៅមក»។
លោករដ្ឋលេខាធិការបានបញ្ជាក់ថា កម្ពុជាផ្ដល់លទ្ធភាពគ្រប់ បែបយ៉ាងសម្រាប់អ្នកវិនិយោគ ដែលបានចូលមកបណ្តាក់ទុនរកស៊ីនៅកម្ពុជា ហើយក៏អាចផ្ទេរភាគហ៊ុន ឬលក់ភាគហ៊ុន ទៅឲ្យអ្នកផ្សេងវិញបាន ហើយក៏អាចដកលុយ ទៅប្រទេសខ្លួនឯងវិញបានដែរ ដោយមិនចាំបាច់សុំច្បាប់ ពីរាជរដ្ឋាភិបាលនោះទេ។
លោក ឈួន ដារ៉ា បានបន្ថែមថា ចំពោះក្រុមហ៊ុន ដែលបានមកធ្វើការចាប់ដៃ ផលិតផល មីហ្គោល នៅក្នុងពេលនេះ សូមជឿជាក់ថា កម្ពុជានឹងមិនធ្វើច្បាប់អ្វី ដើម្បីប្រែក្រឡាស់ទៅ គាបសង្កត់អ្នកវិនិយោគ ដើម្បីដកដើមទុននោះទេ។
លោក ឈួន ដារ៉ា ចាត់ទុកថា នេះជាឱកាសដ៏ល្អសម្រាប់កម្ពុជា ដែលក្រុមហ៊ុន នៅម៉ាឡេស៊ី បានចាប់ដៃគូជាមួយ ក្រុមហ៊ុនអេរ៉ា ហូធែល និងស៊ូន ស៊ូន គ្រុបវិនិយោគទៅលើ ផលិតផលមីហ្គោលនៅកម្ពុជា។
លោក គី ទីគា អគ្គនាយកក្រុមហ៊ុនអេរ៉ា ហូធែល និងស៊ូន ស៊ូន គ្រុប បានមានប្រសាសន៍ថា ដោយទទួលបានការគាំទ្រពីប្រជាពលរដ្ឋកម្ពុជាកាលឆ្នាំ២០១៧ មីហ្គោល ទទួលបានការលក់ចេញប្រមាណជិត ៣០លានដុល្លារអាមេរិក ហើយលោកសង្ឃឹមថានៅឆ្នាំ២០១៨នេះ ក្រុមហ៊ុននឹងធ្វើ យ៉ាងណាឲ្យផលិតផល មីហ្គោលលក់កើនជាង៤០លានដុល្លារអាមេរិក។
លោកបន្ដថា ការដែលប្រជាពលរដ្ឋជឿជាក់ទៅលើផលិតផល មីហ្គោលនេះ ដោយសារតែវាជាផលិតផលមួយបានផលិតយ៉ាងផ្ចិតផ្ចង់ ដោយសសៃរមីផលិតឡើងពីម្សៅមីសុទ្ធធម្មជាតិ១០០% និងទឹកស៊ុបរសជាតិឆ្ងាញ់ កំរិតស្តង់ដាខ្ពស់របស់ (Mamee & Eragold Singapore) ក្រោមទិសដៅ ៣ចំបងគឺ គុណភាពខ្ពស់ អនាម័យល្អ និងសុខភាព។
នៅក្នុងឱកាសនោះដែរលោកឈួនដារ៉ាបានណែនាំដល់ក្រុមហ៊ុនអេរ៉ា ហូធែល និងស៊ូន ស៊ូន គ្រុបត្រូវធ្វើយ៉ាងណារថែរក្សានូវគុណភាពនៃរស់ជាតិមីហ្គោលនេះឲ្យបានល្អជារៀងរហូតតែម្តងដើម្បីជួយលើកកម្ពស់សុខភាពដល់ប្រជាពលរដ្ឋកម្ពុជាឲ្យបានទទួលនូវសុខភាពល្អ៕
Source: Kampuchea Thmey Daily
0 Comments