ក្រសួងការបរទេសអាមេរិកបាននិយាយថា ស្ថានកុងស៊ុលសហរដ្ឋអាមេរិកនៅទីក្រុងយេរូសាឡឹមដែលបម្រើដល់ប្រជាជនប៉ាឡេស្ទីននឹងត្រូវប្រែក្លាយទៅជាស្ថានទូតអាមេរិកថ្មីប្រចាំប្រទេសអ៊ីស្រាអែលដែលការច្របាច់បញ្ចូលនេះបានបង្កជាកំហឹងដល់មេដឹកនាំប៉ាឡេស្ទីន។
ការសម្រេចចិត្តបង្កើតបេសកកម្មការទូតតែមួយនៅទីក្រុងយេរូសាឡឹមត្រូវបានប្រកាសកាលពីខែតុលាដោយរដ្ឋមន្ត្រីក្រសួងការបរទេសលោក Mike Pompeo ហើយត្រូវបានគេរំពឹងទុកយ៉ាងទូលំទូលាយនៅដើមខែមីនា។
ការច្របាច់បញ្ចូលនេះបានធ្វើឲ្យមានការភ័យខ្លាចពីប៉ាឡេស្ទីនថា រដ្ឋបាលរបស់លោក Trump កំពុងបន្ទាបការដោះស្រាយក្តីកង្វល់របស់ពួកគេនៅក្នុងទីក្រុងយេរូសាឡឹមដែលមានជម្លោះ។
ប្រធានាធិបតីសហរដ្ឋអាមេរិកលោក Donald Trump បានបង្កឲ្យពិភពអារ៉ាប់មានការខឹងសម្បានិងជំរុញឲ្យមានការរិះគន់ជាអន្តរជាតិដោយសារតែគាត់ទទួលស្គាល់ក្រុងយេរូសាឡឹមថាជារដ្ឋធានីរបស់ប្រទេសអ៊ីស្រាអែលនៅខែធ្នូឆ្នាំ២០១៧ហើយបានរើស្ថានទូតសហរដ្ឋអាមេរិកពីទីក្រុងតែលអាវីវទៅទីក្រុងយេរូសាឡឹមកាលពីខែឧសភា។
មេដឹកនាំប៉ាឡេស្ទីនបានផ្អាកទំនាក់ទំនងការទូតជាមួយរដ្ឋបាលអាមេរិកក្រោយពីការរើស្ថានទូតនិងបានធ្វើពហិការក្នុងកិច្ចខិតខំប្រឹងប្រែងរបស់សហរដ្ឋអាមេរិកដើម្បីបង្កើតផែនការសន្តិភាពអ៊ីស្រាអែល-ប៉ាឡេស្ទីនដោយចោទប្រកាន់ក្រុងវ៉ាស៊ីនតោនថាលំអៀងទៅរកអ៊ីស្រាអែល។
អ្នកនាំពាក្យក្រសួងការបរទេសអាមេរិកលោក Robert Palladino បានថ្លែងថា ការសម្រេចចិត្តនេះត្រូវបានជំរុញដោយប្រសិទ្ធភាពប្រតិបតិ្តការហើយនឹងមានសកម្មភាពការទូតអាមេរិកនិងសេវាកុងស៊ុលជាបន្ត។
លោកបានថ្លែងក្នុងសេចក្តីថ្លែងការណ៍មួយថា “វាមិនបានបង្ហាញពីការផ្លាស់ប្តូរគោលនយោបាយរបស់សហរដ្ឋអាមេរិកលើទីក្រុងយេរូសាឡឹម តំបន់វេសបេងឬតំបន់ហ្គាហ្សាស្ទ្រីបទេ។ ព្រំដែនជាក់លាក់នៃអធិបតេយ្យភាពរបស់អ៊ីស្រាអែលនៅទីក្រុងយេរូសាឡឹមគឺស្ថិតនៅក្រោមការចរចាចុងក្រោយរវាងភាគីទាំងពីរ”។
គួរបញ្ជាក់ថា ស្ថានភាពរបស់ទីក្រុងយេរូសាឡឹមគឺជាជម្លោះដ៏ធំបំផុតមួយរវាងអ៊ីស្រាអែលនិងប៉ាឡេស្ទីន៕ REUTERS
Source: Kampuchea Thmey Daily
0 Comments