ភ្នំពេញ ៖ សាកលវិទ្យាល័យវិទ្យាសាស្ត្រសុខាភិបាល កាលពីថ្ងៃទី៤ ខែមីនា ឆ្នាំ២០១៩ បានរៀបចំកិច្ចប្រជុំស្តីពីការឆ្លើយតបរួមគ្នាក្នុងការអន្តរាគមន៍ជំងឺអេដស៍ និងគ្រឿងញៀន នៅកម្ពុជានៅសាកលវិទ្យាល័យដើម្បីពិភាក្សាស្វែងរកវិធីសាស្ត្រសមស្រប ឆ្លើយតបនឹងអន្តរាគមន៍ទៅលើជំងឺទាំងនេះឲ្យមានប្រសិទ្ធភាពខ្ពស់។
កិច្ចប្រជុំនេះបានប្រព្រឹត្តិទៅក្រោមអធិបតីភាព លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ដោយមានការចូលរួមពី លោក មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងនឹងគ្រឿងញៀន អ្នកជំនាញការឯកទេសមកពីប្រទេសថៃ វៀតណាមនិងសហរដ្ឋអាមេរិក និងអង្គការក្រៅរដ្ឋាភិបាលនានាផងដែរ។
លោកសាស្ត្រាចារ្យ សាផុន វឌ្ឍនៈ សកលវិទ្យាធិការ នៃសាកលវិទ្យាល័យវិទ្យាសាស្ត្រសុខាភិបាលបានមានប្រសាសន៍នៅក្នុងកិច្ចប្រជុំថាកិច្ចប្រជុំនេះធ្វើឡើងក្នុងគោលបំណងដើម្បីស្វែងរកវិធីសាស្ត្រឆ្លើយតបរួមគ្នាក្នុងការអន្តរាគមន៍ជំងឺអេដស៍ និងគ្រឿងញៀននៅកម្ពុជានិងពិភាក្សាពីតួនាទីរបស់សាកលវិទ្យាល័យវិទ្យាសាស្ត្រសុខាភិបាលក្នុងការចូលរួមក្នុងវគ្គបណ្ដុះបណ្ដាលបន្តមួយប្រកបដោយប្រសិទ្ធភាពជួនដល់មន្ត្រី និងបុគ្គលិកដែលកំពុងផ្តល់សេវាថែទាំជំងឺអេដស៍ នៅតាមបណ្តាមូលដ្ឋានសុខាភិបាលនានានៅកម្ពុជា។
លោកសាស្ត្រាចារ្យ សាផុន វឌ្ឍនៈ បានបន្តថា គិតរហូតមកដល់ខែធ្នូឆ្នាំ២០១៨ កម្ពុជា មានអ្នកជំងឺចំនួន៣៥៩២៧នាក់ កំពុងទទួលបានការព្យាបាលឱសថប្រឆាំងនឹងមេរោគអេដស៍ និងប្រឆាំងនឹងជំងឺឱកាសនិយម។ ក្នុងចំណោមអ្នកជំងឺទាំងនោះមាន១៣៧០នាក់ ត្រូវជា៣.៨ភាគរយ បានប្រាប់ថា ពួកគាត់ធ្លាប់បានប្រើប្រាស់គ្រឿងញៀនហើយ ក្នុងចំណោមនោះមាន២០០នាក់ បានបញ្ជាក់ថាគាត់កំពុងប្រើប្រាស់គ្រឿងញៀន។
លោកសាស្ត្រាចារ្យ សាផុន វឌ្ឍនៈ បានបន្ថែមថា ហេតុនេះ ការធ្វើអន្តរាគមន៍រួមគ្នាលើការព្យាបាលជំងឺអេដស៍ និងបន្សាបគ្រឿងញៀន ដល់ពួកគាត់នឹងជួយលើកកម្ពស់ការប្រើប្រាស់ថ្នាំប្រឆាំងនឹងមេរោគអេដស៍ បានជាប់លាប់ល្អ និងកាត់បន្ថយការបរាជ័យក្នុងការព្យាបាលជំងឺអេដស៍។
លទ្ធផលអន្តរាគមន៍នេះ នឹងជួយឲ្យកម្ពុជា សម្រេចបាននូវគោលដៅ៩០.៩០.៩០ ជាពិសេសក្នុងចំណោមក្រុមគោលដៅដែលប្រឈមនឹងការឆ្លងជំងឺអេដស៍ខ្ពស់ដូចជា ក្រុមប្រើប្រាស់គ្រឿងញៀនជាដើម។
លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលបានមានប្រសាសន៍ថា ថ្ងៃនេះគឺជាទំព័រប្រវត្តិសាស្ត្រថ្មីមួយទៀត ដែលក្រសួងសុខាភិបាល និងអាជ្ញាធរជាតិប្រយុទ្ធប្រឆាំងគ្រឿងញៀននិងដៃគូពាក់ព័ន្ធនានា បានស្វែងរកអភិក្រមថ្មីៗក្នុងការធ្វើអន្តរាគមន៍ឆ្លើយតបរួមគ្នាទៅនឹងជំងឺអេដស៍និងគ្រឿងញៀនឲ្យសមស្រប និងមានប្រសិទ្ធភាពខ្ពស់។
ជាមួយគ្នានេះដែរ លោករដ្ឋមន្ត្រី បានណែនាំឲ្យមជ្ឈមណ្ឌលជាតិប្រយុទ្ធនឹងជំងឺអេដស៍សើស្បែកកាមរោគ និងនាយកដ្ឋានសុខភាពផ្លូវចិត្ត និងការបំពានគ្រឿងញៀន ត្រូវរៀបចំឲ្យមានអភិក្រមថ្មីដើម្បីឆ្លើយបតបទៅនឹងជំងឺអេដស៍ និងគ្រឿងញៀន។
ពង្រឹងសមត្ថភាពជាប្រចាំដល់អ្នកផ្តល់សេវាព្យាបាលជំងឺអេដស៍ និងគ្រឿងញៀន រៀបចំឲ្យមានប្រព័ន្ធគ្រប់គ្រងទិន្នន័យ នៃមេរោគអេដស៍ជំងឺអេដស៍ និងការប្រើប្រាស់គ្រឿងញៀនឲ្យមានលក្ខណៈរស់រវើក និងទាន់ពេលវេលា។
លោករដ្ឋមន្ត្រីបានបន្ថែមទៀតថា ចំណែកសាកលវិទ្យាល័យវិទ្យាសាស្ត្រសុខាភិបាល ត្រូវខិតខំដាក់បញ្ចូលការអន្តរាគមន៍មេរោគអេដស៍ ជំងឺអេដស៍ និងគ្រឿងញៀន ទៅក្នុងកម្មវិធីបណ្ដុះបណ្ដាលវេជ្ជសាស្ត្រគ្រប់កម្រិត និងស្នើឲ្យគ្រប់ភាគីពាក់ព័ន្ធ សូមជួយលើកកម្ពស់ការស្រាវជ្រាវតាមបែបវិទ្យាសាស្ត្រ ក្នុងការស្វែងរកវិធីសាស្ត្រ ឬអន្តរាគមន៍ផ្សេងៗ ដើម្បីធ្វើឲ្យអន្តរាគមន៍ ឆ្លើយតបនឹងជំងឺអេដស៍ និងគ្រឿងញៀនមានប្រសិទ្ធភាព៕
Source: Kampuchea Thmey Daily
0 Comments