កណ្តាល ៖ នៅថ្ងៃទី២១ ខែមករា ឆ្នាំ២០១៩ លោក អ៊ី សុវណ្ណ និង លោក គឹម ម៉េង ចៅក្រមស៊ើបសួរសាលាដំបូងខេត្តកណ្តាល បានសម្រេចចេញដីកាឃុំខ្លួន ក្រុមជួញដូរគ្រឿងញៀនដ៏កក្រើកនៅស្រុកកៀនស្វាយ ដាក់ពន្ធនាគារបណ្ដោះអាសន្ន ពីបទ"ជួញដូរដោយខុសច្បាប់នូវសារធាតុញៀន" តាមមាត្រា៤០ នៃច្បាប់ ស្តីពីការត្រួតពិនិត្យគ្រឿងញៀន ដែលប្រព្រឹត្តនៅភូមិឫស្សីស្រុក ឃុំឈើទាល និងភូមិព្រែកដូង ឃុំកំពង់ស្វាយ ស្រុកកៀនស្វាយ ខេត្តកណ្តាល កាលពីថ្ងៃទី១៩ ខែមករា ឆ្នាំ២០១៩។
ជនជាប់ចោទ ទី០១-ឈ្មោះ អៀម ភារម្យ ហៅម៉ក់ ភេទប្រុស អាយុ៣១ឆ្នាំ ជនជាតិខ្មែរមានទីលំនៅ ភូមិព្រែកដូង ឃុំកំពង់ស្វាយ ស្រុកកៀនស្វាយ ខេត្តកណ្តាល មុខរបរ ពុំពិតប្រាកដ។ ទី០២-ឈ្មោះ គ្រី ចាន់នី ភេទប្រុស អាយុ៣៥ឆ្នាំ ជនជាតិខ្មែរ មានទីលំនៅភូមិព្រែកដូង ឃុំកំពង់ស្វាយ ស្រុកកៀនស្វាយ ខេត្តកណ្តាល មុខរបរពុំពិត។ ទី០៣-ឈ្មោះ សារី យូសេង ភេទប្រុស អាយុ៣១ឆ្នាំ ជនជាតិខ្មែរ មានទីលំនៅភូមិព្រែកដូង ឃុំកំពង់ស្វាយ ស្រុកកៀនស្វាយ ខេត្តកណ្តាល មុខរបរមិនពិតប្រាកដ។ ទី០៤-ឈ្មោះ នួន ចាន់ធី ភេទប្រុស អាយុ២៥ឆ្នាំ ជនជាតិខ្មែរ មានទីលំនៅ ភូមិភូមិធំ ឃុំភូមិធំស្រុកកៀនស្វាយ ខេត្តកណ្តាល មុខរបរ ពុំពិតប្រាកដ។ ទី០៥-ឈ្មោះ ផាត ឌីណា ហៅម៉ុក ភេទប្រុស អាយុ២០ឆ្នាំ ជនជាតិខ្មែរ មានទីលំនៅភូមិ ឈើទាល២ ឃុំឈើទាល ស្រុកកៀនស្វាយ ខេត្តកណ្ដាល មុខរបរ ពុំពិត (ឃាត់ខ្លួន)។ ទី០៦-ឈ្មោះ លឹម មករា ភេទប្រុស អាយុ១៩ឆ្នាំ ជនជាតិខ្មែរ មានទីលំនៅភូមិស្រុកចេក ស្រុកបាទី ខេត្តតាកែវ មុខរបរ កម្មករ និងទី០៧-ឈ្មោះ លាង ស៊ីវម៉េង ភេទស្រី អាយុ២០ឆ្នាំ ជនជាតិខ្មែរ មានទីលំនៅភូមិទួលត្នោត ឃុំគគីរ ស្រុកកៀនស្វាយ ខេត្តកណ្តាល មុខរបរ មិនពិតប្រាកដ។
ក្រុមជួញដូរគ្រឿងញៀនទាំង៧នាក់ ត្រូវសមត្ថកិច្ចនគរបាលស្រុកកៀនស្វាយ ចាប់ឃាត់ខ្លួន នៅថ្ងៃទី១៩ ខែមករា ឆ្នាំ២០១៩ ដោយចាប់យកវត្ថុតាងមាន ម្សៅក្រាម ពណ៌សថ្លា សង្ស័យមានសារធាតុញៀន ចំនួន១៦កញ្ចប់(ធំ៥កញ្ចប់ មធ្យម១កញ្ចប់ តូច១០កញ្ចប់)ប្រភេទ យ៉ាម៉ា១គ្រាប់ ពណ៌ផ្កាឈូក, ជញ្ជីងថ្លឹង២ ទូរស័ព្ទដៃសរុប១៨គ្រឿង ដាវច្នៃ១ដើម ដបច្នៃសម្រាប់ប្រើប្រាស់១ ចម្ពាមកៅស៊ូ១ រួមទាំងសម្ភារៈវេចខ្ចប់ ចែកចាយ និងប្រើប្រាស់១ចំនួនទៀត។
នគរបាលស្រុកកៀនស្វាយបានឲ្យដឹងថា នៅវេលាម៉ោងកើតហេតុខាងលើ ក្រោយពីទទួលព័ត៌មានពីកម្លាំងមូលដ្ឋានល្អថា មានករណីជួញដូរនូវសារធាតុញៀនដោយខុសច្បាប់ នៅក្នុងឃុំកំពង់ស្វាយ ចំណុចដីទូលបារាំង ស្ថិតក្នុងភូមិព្រែកដូង និងផ្ទះជួល១ ស្ថិតក្នុងភូមិឫស្សី ស្រុក/ឃុំ ឈើទាលភ្លាមនោះ លោកអធិការស្រុកបានបញ្ជាឲ្យកម្លាំងផ្នែកប្រឆាំងបទល្មើសគ្រឿងញៀន សហការជាមួយកម្លាំងនគរបាលប៉ុស្តិ៍កំពង់ស្វាយ និងឈើទាល ចុះបង្ក្រាបជាបន្ទាន់ក្នុងកិច្ចប្រតិបត្តិការនេះ សមត្ថកិច្ចយើងបង្ក្រាបបានចំនួន០៣គោលដៅ រួមមាន ឃុំកំពង់ស្វាយ គោលដៅទី ១-នៅវេលាម៉ោង១០និង៤០នាទី បង្ក្រាបបាននៅចំណុចផ្ទះរបស់ ឈ្មោះ អៀម ភារម្យ ហៅ ម៉ក់ ភេទប្រុស ស្ថិតក្នុងភូមិព្រែកដូង ឃុំកំពង់ស្វាយ ស្រុកកៀនស្វាយ ខេត្តកណ្តាល។ គោលដៅទី២ -នៅវេលាម៉ោង១០និង៤០នាទី បង្ក្រាបបាននៅផ្ទះរបស់ ឈ្មោះ សារី យូសេង ភេទប្រុស ស្ថិតនៅភូមិព្រែកដូង ឃុំកំពង់ស្វាយ ស្រុកកៀនស្វាយ ខេត្តកណ្តាល និងគោលដៅទី០៣-ឃុំឈើទាលនៅវេលាម៉ោង១១និង២៥នាទី បង្ក្រាបបាន០១គោលដៅ នៅចំណុចបន្ទប់ជួល ភូមិឫស្សីស្រុក ឃុំឈើទាល ស្រុកកៀនស្វាយ ខេត្តកណ្តាល៕
Source: Kampuchea Thmey Daily
0 Comments