ភ្នំពេញ ៖ ថ្ងៃនេះ ប្រៃសណីយ៍កម្ពុជាបានសម្ពោធដាក់ឲ្យប្រើប្រាស់ សេវាប៉ុស្តិ៍ផ្ញើប្រាក់ ដំណើរការនៅលើ App ដែលមានឈ្មោះថា posTTransfer ដែលផ្តោតសំខាន់ទៅលើការផ្តល់សេវា ផ្ញើលុយក្នុងស្រុក និងក្រៅប្រទេស ព្រមទាំងការទូទាត់ទំនិញផ្សេងៗ។
លោក អោក បូរ៉ា ប្រតិភូរាជរដ្ឋាភិបាលទទួលបន្ទុកអគ្គនាយកប្រៃសណីកម្ពុជាបានមានប្រសាសន៍ឲ្យដឹងនៅក្នុងពិធីសម្ពោធដាក់ឲ្យប្រើប្រាស់ សេវាប៉ុស្តិ៍ផ្ញើប្រាក់នាព្រឹកថ្ងៃទី៨ខែមិថុនាឆ្នាំ២០១៨ ថាជាមួយ posTTransfer នេះបង្កលក្ខណៈសម្បត្តិ ឲ្យប្រៃសណីយ៍បានពង្រីកសក្ដានុពលនៅក្នុងប្រទេស ក្នុងការពង្រីកភ្នាក់ងារផ្ទេរប្រាក់ អ្នកប្រើប្រាស់សេវាដោយផ្ទាល់ ហើយកាត់បន្ថយក្នុងការប្រើប្រាស់ឯកសារជាតម្រូវការបញ្ជាក់អត្តសញ្ញាណ គឺបញ្ជាក់តែម្តងនៅពេលចុះឈ្មោះ ហើយប្រើបានរហូត។
សូមបញ្ជាក់ថា posTTransfer នេះ ជាសេវាថ្មីបំផុត ដែលបានអភិវឌ្ឍន៍កែលម្អឲ្យកាន់តែប្រសើរឡើងថែមទៀតដោយ UPU បានបង្កើតឡើងទៅជា App សម្រាប់ប្រើបាននៅគ្រប់ទំរង់នៃទូរស័ព្ទវ័យឆ្លាត និងកុំព្យូទ័រ ដែលបានចុះបញ្ជីដោយ UPU នៅឆ្នាំ២០១៧។ ក្នុងនោះប្រៃសណីយ៍កម្ពុជាបានចុះកិច្ចព្រមព្រៀងរួចហើយលើ ការប្រើប្រាស់និម្មិតសញ្ញា PosTransfer trademark ជាអន្តរជាតិសម្រាប់វិស័យប្រៃសណីយ៍។ ហើយជាចុងក្រោយនៅឆ្នាំ២០១៨ នេះ ប្រៃសណីយ៍កម្ពុជាក៏បានចុះហត្ថលេខាពហុភាគីក្នុងការដាក់ឲ្យប្រើប្រាស់ សេវាផ្ទេរប្រាក់ ដោយប្រើប្រព័ន្ធ PosTransfer។ បច្ចុប្បន្ន UPU និង PosTranfer Group កំពុងរៀបចំផែនការយុទ្ធសាស្ត្រ និងជំរុញឲ្យប្រើប្រាស់សេវាផ្ទេរប្រាក់ ឆ្លងប្រទេសឲ្យកាន់តែទូលំទូលាយ ដើម្បីឆ្លើយទៅនឹង សេដ្ឋកិច្ចសាកល ដែលមានចលនាពលករចំណាកស្រុកច្រើន អន្តោប្រវេសន្ត ធ្វើការនៅក្រៅប្រទេស ក៏ដូចជាកំណើនទេសចរបម្លាស់ទី គ្រប់ទីកន្លែង ហើយពួកគេអាចផ្ទេរប្រាក់កំរិតប្រើប្រាស់ក្នុងគ្រួសារ ដែលមានកម្រៃសេវាទាប ប្រកបដោយសុវត្ថិភាព និងតម្លាភាព។
លោក សារ៉ាក់ ខាន់ រដ្ឋលេខាធិការក្រសួងប្រៃសណីយ៍និងទូរគមនាគមន៍ បានមានប្រសាសន៍បញ្ជាក់ថា ការដែលប្រៃសណីយ៍កម្ពុជាដាក់ឲ្យប្រើប្រាស់សេវា posTTransfer ក្នុងគោលបំណង ដើម្បីកែលម្អគុណភាពសេវារបស់ស្ថាប័នសាធារណៈ ប្រកបដោយភាពជឿជាក់ រហ័ស ធ្វើសេវាខ្លួនឯង ផាត់ចោល ការចំណាយពេលវេលា និងមធ្យោបាយធ្វើដំណើរទៅបង់ថ្លៃសេវា អគ្គីសនី ទឹក ពន្ធការបង់ថ្លៃសិក្សាដែលឆ្លើយតបទៅនឹង តម្រូវការនៃការផ្តល់សេវាប្រៃសណីយ៍សកល របស់ UPU ។
ជាមួយគ្នានេះដែរ លោករដ្ឋលេខាធិការក៏បានជំរុញដល់ស្ថាប័នសាធារណៈមានដូចជា អគ្គីសនីកម្ពុជារដ្ឋករទឹក អាជ្ញាធរអប្សរា ពិចារណាក្នុងការប្រើប្រាស់សេវា posTTransfer និង ចាប់ផ្តើមពិភាក្សាជាមួយប្រៃសណីយ៍កម្ពុជាលើការទូរទាត់វិក្កយបត្រ អគ្គីសនី ប្រើប្រាស់ទឹក របស់ប្រជាពលរដ្ឋ និង លក់សំបុត្រជូនភ្ញៀវទេសចរណ៍។
លោកថា បច្ចេកវិទ្យាថ្មីមួយនេះអាចជួយកាត់បន្ថយថ្លៃដើមរបស់ស្ថាប័នខាងលើនេះបានខ្លះទៀត ដូចជាមិនចាំបាច់បោះពុម្ពវិក្កយបត្រ មិនចាំបាច់ចំណាយលើអ្នកចែកវិក្កយបត្រដល់ផ្ទះអ្នកប្រើប្រាស់ និងមិនបាច់បង់ថ្លៃសេវាប្រមូល ឬទទួលលុយពីអតិថជន និងក៏ជួយផាត់ការចំណាយផ្សេងៗរបស់អតិថិជនទៅលើមធ្យោបាយបង់ថ្លៃ ប្រើប្រាស់សេវាកម្ម ដោយគ្រាន់តែស្ថាប័នខាងលើ ផ្តល់ការងារនេះមកឲ្យប្រៃសណីយ៍កម្ពុជាជាអ្នកចែកវិក្កយបត្រ និងប្រមូលចំណូលជូនវិញ។ តែស្ថាប័នខ្លួន ត្រូវផ្តល់កម្រៃសេវាចំនួនណាមួយដែលអាចទាបជាងការចំណាយលើការផលិតវិក្កយបត្រ+ថ្លៃចែកចាយវិក្កយបត្រ + ថ្លៃសេវា ក្នុងការទទួលការបង់ថ្លៃសេវាកម្មរបស់ស្ថាប័ន ដើម្បីឲ្យប្រៃសណីយ៍កម្ពុជាបានអនុវត្តនូវតួនាទីរបស់ខ្លួនផង និងបង្កើនចំណូលចូលថវិកាជាតិផង៕
Source: Kampuchea Thmey Daily
0 Comments