ប៉ូលិស​មី​យ៉ាន់​ម៉ា​រឹបអូស​ថ្នាំ​គ្រាប់​មេ​តំ​ហ្វេ​តា​មីន​ក្នុង​ចំនួន​ដ៏​ធំ

ប៉ូលិស​បាន​និយាយ​កាលពី​ថ្ងៃ​ចន្ទ​ថា អាជ្ញាធរ​មី​យ៉ាន់​ម៉ា​បាន​រឹបអូស​ថ្នាំ​គ្រាប់​មេ​តំ​ហ្វេ​តា​មីន​ជាង​១០​លាន​គ្រាប់​ដែលមាន​តម្លៃ​១៣.៣​លាន​ដុល្លារ​កាលពី​ចុង​សប្តាហ៍​ដែល​នេះ​ជាការ​រឹបអូស​ដ៏​ធំ​មួយទៀត​នៅក្នុង​ប្រទេសមួយ​ដែល​ត្រូវបាន​គេ​ជឿជាក់​យ៉ាង​ទូលំទូលាយ​ថា​ជា​អ្នក​ផលិត​មេ​តំ​ហ្វេ​តា​មីន​ធំជាងគេ​បំផុត​នៅលើ​ពិភពលោក​។​

មេ​តំ​ហ្វេ​តា​មីន​គ្រី​ស្តា​ល់​ឬ​ទឹកកក​ត្រូវបាន​ជួញដូរ​ចេញពី​ប្រទេស​មី​យ៉ាន់​ម៉ា​តាមរយៈ​បណ្តាញ​ទំនើបៗ​ទៅកាន់​ទីផ្សារ​ដែលមាន​ការរីកចម្រើន​ដូចជា​នៅ​ប្រទេស​ជប៉ុន កូរ៉េខាងត្បូង​និង​អូស្ត្រាលី​ជាដើម​។​

ថ្នាំ​គ្រាប់​មានគុណ​ភាព​ទាប​និង​ត្រូវបាន​គេ​ស្គាល់​ថា​ជា​យ៉ាម៉ា​ឬ​ថ្នាំ​ឆ្កួត​គឺ​ត្រូវបាន​នាំ​ចេញទៅ​ដើម្បី​ផ្គត់ផ្គង់​ទីផ្សារ​ក្នុងស្រុក​ក៏ដូចជា​សហគមន៍​គ្រឿងញៀន​ធំៗ​នៅ​ថៃ​និង​បង់​ក្លា​ដែ​ស​ផងដែរ​។​

ប្រព័ន្ធ​ផ្សព្វផ្សាយ​រដ្ឋ​បាន​និយាយ​កាលពី​ថ្ងៃ​ចន្ទ​ថា ប្រតិ​ប​ត្ដិ​ការ​ផ្សេងគ្នា​ចំនួន​ពីរបាន​ធ្វើឡើង​នៅ​ភាគ​ខាងលិច​ប្រទេស​កាលពី​ចុង​សប្តាហ៍​ដោយ​មួយ​នៅ​តំបន់ Magway និង​មួយទៀត​នៅ Maungdaw ក្នុង​រដ្ឋ​រ៉ា​ក់​ឃី​ន​។​

វរសេនីយ៍ឯក Win Ko Ko បាន​ប្រាប់ AFP ថា “​វា​ជាការ​រឹបអូស​ថ្នាំញៀន​ធំជាងគេ​បង្អស់​ក្នុងឆ្នាំនេះ​នៅក្នុង​ប្រទេស​ហើយ​ធំ​បំផុត​មិន​ធ្លាប់មាន​នៅក្នុង​តំបន់ Maungdaw នៃ​រដ្ឋ​រ៉ា​ក់​ឃី​ន​”​។​

ថ្នាំ​គ្រាប់​ទាំងនេះ​ទំនងជា​មាន​គោលដៅ​ទៅ​ប្រទេស​បង់​ក្លា​ដែ​ស​ដែលជា​កន្លែង​ពួកគេ​បានក្លាយ​ទៅជា​ប្រភព​ប្រាក់ចំណូល​ដ៏​ងាយស្រួល​សម្រាប់​ជនភៀសខ្លួន​មូស្លីម​រ៉ូ​ហ៊ីង​យ៉ា​ដែល​បាន​ឆ្លងកាត់​ព្រំដែន​ចាប់តាំងពី​ការបង្ក្រាប​ដោយ​យោធា​ក្នុង​ឆ្នាំ​២០១៧​។​

ទោះបីជា​យ៉ាងណាក៏ដោយ ការផលិត​គ្រឿងញៀន​ភាគច្រើន​គឺ​កើតមានឡើង​នៅ​ម្ខាង​ទៀត​នៃ​ប្រទេស​មី​យ៉ាន់​ម៉ា​ពោលគឺ​នៅ​រដ្ឋ​សាន​ភាគ​ខាងកើត​ដែល​ញាំញី​ដោយ​ជម្លោះ​។​

តួលេខ​ផលិតកម្ម​ត្រឹមត្រូវ​គឺ​មិនអាច​ត្រូវបាន​គេ​រកឃើញ​ទេ​ប៉ុន្តែ​អ្នកជំនាញ​បាន​និយាយថា ការ​រឹបអូស​ដ៏​ធំ​បែបនេះ​មិនមាន​ឥទ្ធិពល​លើ​តម្លៃ​ថ្នាំញៀន​នោះទេ​ដោយ​បង្ហាញថា ពួកគេ​គ្រាន់តែ​ជាមួយ​ភាគ​តូច​នៃ​ចំនួន​សរុប​ប៉ុណ្ណោះ​៕ AFP


Source: Kampuchea Thmey Daily