អង្គការសហប្រជាជាតិបាននិយាយថា រដ្ឋាភិបាលមីយ៉ាន់ម៉ា បានយល់ព្រមកាលពីថ្ងៃព្រហស្បតិ៍ក្នុងការអនុញ្ញាតឲ្យខ្លួនចូលទៅក្នុងរដ្ឋរ៉ាក់ឃីន ដែលរងគ្រោះដោយវិបត្តិ បន្ទាប់ពីមានជម្លោះរាប់ខែអំពីរបៀបធ្វើមាតុភូមិនិវត្តន៍ជនភៀសខ្លួនមូស្លីមរ៉ូហ៊ីងយ៉ារាប់ម៉ឺននាក់។
រដ្ឋភាគខាងលិចមួយនេះត្រូវបានរារាំងបន្ទាប់ពីមានយុទ្ធនាការបង្ហូរឈាមដឹកនាំដោយយោធាកាលពីឆ្នាំមុនដែលបានបង្ខំឲ្យជនជាតិរ៉ូហ៊ីងយ៉ាប្រមាណ៧០០,០០០នាក់រត់ភៀសខ្លួនទៅកាន់ប្រទេសបង់ក្លាដែសដែលស្ថិតនៅជិតខាង។
អង្គការសហប្រជាជាតិនិងសហរដ្ឋអាមេរិកបានហៅការបង្ក្រាបនោះថា “ការបោសសម្អាតជនជាតិភាគតិច” ខណៈកងទ័ពនិយាយថា ខ្លួនកំពុងប្រយុទ្ធប្រឆាំងនឹងសកម្មប្រយុទ្ធរ៉ូហ៊ីងយ៉ា។
មីយ៉ាន់ម៉ានិងបង់ក្លាដែសបានចុះហត្ថលេខាលើកិច្ចព្រមព្រៀងធ្វើមាតុភូមិនិវត្តន៍មួយកាលពីខែវិច្ឆិកាប៉ុន្តែរហូតមកដល់ពេលនេះមានតែជនភៀសខ្លួនរាប់សិបនាក់ប៉ុណ្ណោះដែលបានវិលត្រឡប់ទៅវិញខណៈភាគច្រើននៃជនជាតិភាគតិចដែលរងការគាបសង្កត់យូរអង្វែងនិងគ្មានរដ្ឋមួយនេះបានបដិសេធវិលត្រឡប់ទៅវិញលុះត្រាតែសុវត្ថិភាពនិងភាពជាពលរដ្ឋរបស់ពួកគេត្រូវបានធានា។
អង្គការសហប្រជាជាតិបាននិយាយថា លក្ខខណ្ឌនៅរដ្ឋរ៉ាក់ឃីនមិនទាន់រួចរាល់សម្រាប់ការវិលត្រឡប់ទៅវិញដោយសុវត្ថិភាព ស្ម័គ្រចិត្តនិងថ្លៃថ្នូរនោះទេប៉ុន្តែសេចក្តីព្រាងកាលពីថ្ងៃព្រហស្បតិ៍គឺនឹងអនុញ្ញាតឲ្យភ្នាក់ងាររបស់ខ្លួនទទួលបានសិទ្ធិចូលទៅកាន់រដ្ឋរ៉ាក់ឃីន។
ការចូលនេះនឹងអនុញ្ញាតឲ្យទីភ្នាក់ងារជនភៀសខ្លួនអង្គការសហប្រជាជាតិ “វាយតម្លៃលក្ខខណ្ឌនៅនឹងកន្លែងនិងអនុវត្តសកម្មភាពការពារ”។
ប្រទេសមីយ៉ាន់ម៉ាបាននិយាយថា ខ្លួនត្រៀមរួចរាល់ហើយដើម្បីទទួលជនភៀសខ្លួនរ៉ូហ៊ីងយ៉ា ហើយបានចោទប្រកាន់បង់ក្លាដែសថាជាអ្នកដែលទទួលខុសត្រូវចំពោះការពន្យារពេលនេះ។
បេសកជនថ្មីរបស់អង្គការសហប្រជាជាតិសម្រាប់ប្រទេសមីយ៉ាន់ម៉ាលោកស្រី Christine Schraner Burgener គ្រោងនឹងធ្វើទស្សនកិច្ចលើកដំបូងទៅកាន់ប្រទេសនេះនៅខែនេះសម្រាប់កិច្ចពិភាក្សាស្តីពីវិបត្តិជនភៀសខ្លួនរ៉ូហ៊ីងយ៉ាបន្ទាប់ពីដំណើរទស្សនកិច្ចរបស់ក្រុមប្រឹក្សាសន្តិសុខ៕ AFP
Source: Kampuchea Thmey Daily
0 Comments