បាត់ដំបង ៖ រថយន្តយីឌុប ប្រភេទភ្លៅ៥ មួយគ្រឿង ដែលមានដឹកឈើចំនួន២ប្រភេទ ត្រូវបានប្រភពទម្លាយអោយដឹងថា មានការដោះលែងអោយមានសេរីភាពឡើងវិញជាថ្នូរនឹងទឹកប្រាក់ប្រមាណជាង២ម៉ឺនដុល្លារ បន្ទាប់ពីកម្លាំងរដ្ឋបាលព្រៃឈើ ជាច្រើនរូបបានឡោមព័ទ្ធ និងស្ទាក់ចាប់រថយន្តនេះនៅលើកំណាត់ផ្លូវវាងក្រុង។
យោងតាមប្រភពច្បាស់ការណ៍មួយបានទម្លាយអោយដឹងថា នៅរសៀលថ្ងៃទី ២៦ខែ ឧសភា ឆ្នាំ ២០១៨ នៅតាមបណ្តោយផ្លូវវាងក្រុង ខាងមុខទីតាំង វិមានសុភមង្គលស្ថិតក្នុងសង្កាត់ ទួលតាឯក ក្រុងបាត់ដំបង ខេត្តបាត់ដំបង គឺកម្លាំងអង្គភាពជំនាញ( មេព្រៃ ) បាន ស្ទាក់ចាប់រថយន្តប្រភេទ យីឌុប ភ្លៅ៥ មួយគ្រឿង ម៉ាកហ៊ីយ៉ាន់ដាយ ដែលមានពាក់ស្លាកលេខ ក្រចេះ ០៣៦៧ ដោយសារតែរថយន្តនេះ មានដឹកបទល្មើស។
ប្រភពដដែលបានបង្ហើបបន្តថា ភ្លាមៗនោះដែរ គេសង្កេតឃើញថា នៅលើរថយន្តមានដឹកឈើចំនួន២ប្រភេទ និងពេញទ្រុងរថយន្តផងដែរ គឺមានឈើ ធ្នង់ និង គ្រញូងក្នុងទិសដៅ ចេញពីខេត្ត ឧត្តរមានជ័យ ទៅកាន់ទីក្រុងភ្នំពេញ។
នៅពេលនោះដែរក៏មានការចរចារគ្នាដោយជំហានដំបូងយើងទទួលបានពីប្រភពក្រៅផ្លូវការថា ទឹកប្រាក់ប្រមាណជាង២ម៉ឺនដុល្លារ ត្រូវបានប្រគល់ជាថ្នូរក្នុងការដោះលែងទាំងរថយន្ត និងឈើ ដោយតម្រូវអោយរថយន្តនេះសំងំលាក់ខ្លួននៅជាយក្រុង ពី២ ទៅ៣ថ្ងៃ សិនទើបអាចចាកចេញបាន។
ពាក់ព័ន្ធទៅនឹងភាគហ៊ុនរកស៊ីឈើទាំងនេះ ប្រភពក៏បានបង្ហើបថា ឈ្មួញទាំងនោះគឺមានអ្នកបាត់ដំបង និងបន្ទាយមានជ័យ ដោយអ្នកបាត់ដំបង មានពី៣ ទៅ ៤ នាក់ ដែលក្នុងនោះមួយចំនួនជាមន្ត្រីប៉ូលិសថែមទៀតផង ដែលជាមុខសញ្ញាប្រព្រឹត្តបទល្មើសព្រៃឈើនេះ ហើយរហូតមកទល់នឹងថ្ងៃនេះ រថយន្តឈើអាចចេញផុតពីទឹកដី ខេត្តបាត់ដំបង ហើយ។
កាលពីព្រឹកថ្ងៃទី៣១ខែឧសភា ឆ្នាំ២០១៨ លោក ពិត ភារក្ស នាយខណ្ឌរដ្ឋបាលព្រៃឈើ បាត់ដំបង បានបញ្ជាក់ប្រាប់កម្ពុជាថ្មី តាមរយៈទូរស័ព្ទថា លោកទទួលស្គាល់ថា ពិតជាបានចាប់រថយន្តដឹកឈើនេះមែន ដោយមិនមានការដោះលែងតាមមជ្ឈដ្ឋាននានាដែលបានលើកឡើងនោះឡើយ ហើយនៅពេលនេះដែរ រថយន្តត្រូវបានរក្សាទុកនៅខណ្ឌ ដោយកម្លាំងកំពុងកសាងសំណុំរឿងដើម្បីបញ្ជូន។
លុះពេលដែលអ្នកសារព័ត៌មានយើង បានព្យាយាមសុំចូលផ្តិតយករូបភាព ដើម្បីសរសេរស្តីពីកិច្ចប្រតិបត្តិការបង្ក្រាបបទល្មើសរបស់មេព្រៃ ស្រាប់តែ លោក នាយខណ្ឌ ពិត ភារក្សបានឆ្លើយបង្វែថា រហូតមកទល់និងពេលនេះ ខាងសង្កាត់មិនទាន់បញ្ជូនមកដល់ខណ្ឌនៅឡើយទេ។ ជុំវិញការឆ្លើយបែបនេះ តើកិច្ចប្រតិបត្តិការបង្ក្រាបបទល្មើសរបស់អស់លោកមេព្រៃ ធ្វើតាមបែបសម្ងាត់មិនចង់អោយអ្នកណាដឹង នាំតែជាឆ្អឹងទទឹង ក ឬក៏រាល់កិច្ចប្រតិបត្តិការ ត្រូវតែហ៊ានលាតត្រដាង ដែលជាស្នាដៃបម្រើអោយសង្គម ?
បើការងារទាំងនេះ វាជាការងាររបស់ជំនាញ ដែលបានអនុវត្តតាមការណែនាំរបស់ក្រសួង ក៏ដូចជាប្រមុខ នៃរាជរដ្ឋាភិបាល មិនគួរនាំគ្នាលាក់លៀមបែបនេះនោះឡើយ ព្រោះរឿងដែលនាំអោយមានការធ្លាយអាថ៌កំបាំង និងឈានដល់ការបង្ក្រាបរថយន្តនេះបើតាមប្រភពក្រៅផ្លូវការបាននិយាយថា ដោយសារតែភាគីរថយន្តនេះចង់ស៊ីឡាក់ ជំនាញខេត្តបន្ទាយមានជ័យ ដោយមិនព្រមបង់លុយអោយ ទើបមានការផ្តល់ព័ត៌មានអោយកម្លាំងខណ្ឌរដ្ឋបាលព្រៃឈើ បាត់ដំបង ស្ទាក់ចាប់បែបនេះ៕
Source: Kampuchea Thmey Daily
0 Comments