ចិន​មិន​ខ្វល់​នឹង​កំហឹង​ជុំវិញ​ទោស​ប្រហារជីវិត ​ខណៈ​កាណាដា​វាយបក​ទៅវិញ​

ប្រទេស​ចិន​បាន​និយាយ​កាលពី​ថ្ងៃ​ពុធ​ថា ខ្លួន​មិន​ខ្វល់​សូម្បីតែ​បន្តិច​ចំពោះ​ការ​ព្រួយបារម្ភ​ជា​អន្តរជាតិ​លើ​ទោស​ប្រហារជីវិត​ដែល​ផ្តល់​ទៅ​ឲ្យ​ជនជាតិ​កាណាដា​ម្នាក់​សម្រាប់​ការរត់ពន្ធ​គ្រឿងញៀន​។​

ការផ្តន្ទាទោស​លោក Robert Schellenberg កាលពី​ថ្ងៃ​ចន្ទ​ពីបទ​រត់ពន្ធ​មេ​តំ​ហ្វេ​តា​មីន​ចំនួន​២២២​គីឡូក្រាម​បាន​ជំរុញ​ឲ្យ​នាយករដ្ឋមន្ត្រី​កាណាដា​លោក Justin Trudeau ចោទប្រកាន់​ប្រទេស​ចិន​ថា​បានដាក់​ទណ្ឌកម្ម​តាម​អំពើ​ចិត្ត​។​
​
ក្នុង​រយៈពេល​ប៉ុន្មាន​ថ្ងៃ​ថ្មីៗ​នេះ លោក Trudeau បាន​អំពាវនាវ​ឲ្យ​មេដឹកនាំ​ពិភពលោក​មួយចំនួន​ចែករំលែក​ការព្រួយបារម្ភ​អំពី​ករណី​របស់លោក Schellenberg និង​ជនជាតិ​កាណាដា​២​នាក់​ដែល​ទីក្រុង​ប៉េកាំង​ឃាត់ខ្លួន​កាលពី​ខែ​មុន​បន្ទាប់ពី​នាយក​ប្រតិបត្តិ​ជាន់ខ្ពស់​របស់​ចិន​ម្នាក់​ត្រូវបាន​ចាប់ខ្លួន​នៅ​ទីក្រុង Vancouver លើ​ដីកា​បង្គាប់​របស់​ស​ហ​រដ្ឋ​អាមេរិក​។​
​
ថ្លែង​នៅក្នុង​សន្និសីទកាសែត​ប្រចាំថ្ងៃ អ្នកនាំពាក្យ​ក្រសួងការបរទេស​ចិន​លោកស្រី Hua Chunying បាន​និយាយថា សម្ព័ន្ធមិត្ត​របស់​ប្រទេស​កាណាដា​អាច​រាប់​ម្រាមដៃ​ដប់​ហើយ​មិនបាន​តំណាង​ឲ្យ​ទស្សនៈ​របស់​សហគមន៍​អន្តរជាតិ​ទូលំទូលាយ​នោះទេ​។​
​លោកស្រី Hua បាន​និយាយ​អំពី​ការរិះគន់​នេះ​ថា “​ខ្ញុំ​អាច​និយាយ​យ៉ាងច្បាស់​ថា យើង​មិន​ព្រួយបារម្ភ​សូម្បីតែ​បន្តិច​”​។ លោកស្រី​បាន​បន្ថែមថា ភាគច្រើន​នៃ​ជនជាតិ​ចិន​បាន​គាំទ្រ​ការដាក់ទណ្ឌកម្ម​ធ្ងន់ធ្ងរ​ចំពោះ​ឧក្រិដ្ឋកម្ម​គ្រឿងញៀន​។​
​
ការកាត់ទោស​លោក Schellenberg បានធ្វើ​ឲ្យ​ប៉ះពាល់​កាន់តែ​ធ្ងន់ធ្ងរ​ដល់​ទំនាក់ទំនង​រវាង​ប្រទេស​ចិន​និង​កាណាដា​ដែលមាន​បញ្ហា​រួចទៅហើយ​ដោយ​ការចាប់ខ្លួន​លោកស្រី Meng Wanzhou ដែលជា​ប្រធាន​ផ្នែក​ហិរញ្ញវត្ថុ​របស់​ក្រុមហ៊ុន Huawei Technologies Co Ltd តាម​សំណើ​របស់​សហរដ្ឋអាមេរិក​កាលពី​ខែធ្នូ​។​
​
នៅពេល​សាកសួរ​អំពី​ការកត់សម្គាល់​របស់លោក​ស្រី Hua, រដ្ឋមន្ត្រីការបរទេស​កាណាដា​លោកស្រី Chrystia Freeland បាន​កត់សម្គាល់ថា សហភាព​អឺរ៉ុប​មាន​២៨​ប្រទេស​បានផ្តល់​ការគាំទ្រ​ដល់ទី​ក្រុង​អូ​តា​វ៉ា​។​
​
លោកស្រី​បាន​ប្រាប់​ក្រុម​អ្នកសារព័ត៌មាន​ថា “​យើង​មាន​សេចក្តី​រីករាយ​ណាស់​ដែល​ទទួល​បានការ​គាំទ្រ​ពី​សហភាព​អឺរ៉ុប​ហើយ​កាណាដា​ជឿ​លើ​នីតិរដ្ឋ​”​។​
​
ទោះបីជា​យ៉ាងណាក៏ដោយ សម្រាប់​ថ្ងៃទី​២​ជាប់ៗ​គ្នា លោកស្រី​បាន​សង្កត់ធ្ងន់ថា ប្រទេស​កាណាដា​និង​ចិន​នៅតែមាន​ទំនាក់ទំនង​យ៉ាង​ទូលំទូលាយ​និង​ជ្រាលជ្រៅ​៕ REUTERS

​

Source: Kampuchea Thmey Daily