ភ្នំពេញ ៖ នេះជាដំណឹងដ៏ក្រៀមក្រំនិងគួrឲ្យសោកស្ដាយបំផុត ខណៈដែលម្ចាស់បទ ជីវិតក្មេងវត្ត និងទំនួញផ្លូវលំលោកគ្រូ យិន សារិន បានទទួលមរណភាពហើយកាលពីរសៀលថ្ងៃទី៣១ ខែឧសភា ឆ្នាំ២០១៨ បន្ទាប់ពីធ្លាក់ខ្លួនឈឺមានរយៈពេលជាច្រើនខែកន្លងមកនោះ។
បើតាមការបញ្ជាក់ឲ្យដឹងពីព្រះតេជគុណព្រះនាម ព្រះព្រហ្មវិជ្ជា នីសុវណ្ណមុនីរ៉េតបានសរសេររៀបរាប់ថា ដំណឹងដ៏សែនក្រៀមក្រំដែលអាត្មាភាពទទួលបានថាញោម យិន សារិន សិល្បករជើងចាស់ម្ចាស់បទ ជីវិតក្មេងវត្ត ពេលវេលានេះញោមបានទទួលមរណភាពហើយអាត្មាភាពពិតជាក្តុកក្តួលក្នុងចិត្តខ្លាំងណាស់។
ព្រះតេជគុណព្រះព្រហ្មវិជ្ជានីសុវណ្ណមុនីរ៉េតបន្ថែមថា សូមចូលរួមរំលែកទុក្ខដល់ក្រៀមក្រំនៃគ្រួសារសពសូមវិញ្ញាណក្ខន្ធញោមផុតទុក្ខសោកទាំងឡាយឆ្ពោះទៅកាន់ឋានបរមសុខកុំបីឃ្លៀងឃ្លាតឡើយរូបំ ទុក្ខំ អនត្តា មានរូប មានទុក្ខ កើតចាស់ ឈឺស្លាប់ ជាច្បាប់ធម្មជាតិ គ្មានអ្នកណាម្នាក់គេចផុតនោះទេគ្រាន់តែមុន នឹងក្រោយប៉ុណ្ណោះ។
តាមរយៈដំណឹងមរណភាព និងសោកសៅពីសំណាក់ក្រុមគ្រួសាររបស់លោកគ្រូ យិន សារិន នេះដែរ បានធ្វើឲ្យមហាជននិងអ្នកសិល្បៈជាច្រើនសម្តែងអារម្មណ៍សោកស្ដាយ និងចូលរួមរំលែកទុក្ខដល់ក្រុមគ្រួសាររបស់លោកគ្រូផងដែរ ខណៈត្រូវបានបាត់បង់ធនធានមនុស្សដ៏មានសមត្ថភាពជំនាន់ដើមរូបនេះ។
សូមបញ្ជាក់ថា លោកគ្រូយិនសារិន បានធ្លាក់ខ្លួនឈឺជំងឺជាច្រើនមុខដូចជា៖ ទឹកនោមផ្អែម ក្រពះ ពោះវៀននិងពុកឆ្អឹងជាដើម។ បើយោងតាមកម្រងសៀវភៅដែលដឹកនាំស្រាវជ្រាវដោយលោក ឆយ យីហ៊ាង ក្នុងចំណោមបទចម្រៀង១១៥បទដែលនិពន្ធដោយសម្តេចតេជោ ហ៊ុន សែន ចន្លោះពីឆ្នាំ១៩៩០ដល់ឆ្នាំ២០០៤គឺលោក យិន សារិនបានច្រៀងរហូតដល់ទៅ៥៥បទ។ បទល្បីៗមួយចំនួនដែលលោកគ្រូ យិន សារិន ច្រៀងនោះរួមមាន ៖ ជីវិតក្មេងវត្ត, ផ្លូវឆ្លងកាត់វាល, ក្បាលអូរអភិវឌ្ឍន៍, ស្រឡាញ់គ្នាក្នុងគ្រាក្រ,កិត្តិនាមព្រះដុង្គម៉ែជ័យ,ព្រះគុណម៉ែខ្ញុំ, បៅដោះអ្នកណា?បណ្តាំឪពុកកត់ទុក្ខណាកូន និងបណ្តាំស្ពានដែក៕
Source: Kampuchea Thmey Daily
0 Comments