ភ្នំពេញ ៖ លោក អូស្មាន ហាស្សាន់ រដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការក្រសួងការងារ បណ្ដុះបណ្ដាលវិជ្ជាជីវៈ បានធ្វើការស្នើសុំឲ្យប្រធានមូលនិធិស្ដ្រីមេផ្ទះមុស្លិមថៃ បន្ដកិច្ចសហប្រតិបត្ដិការឲ្យបានល្អចំពោះ ស្ដ្រីនៅសហគមន៍ ទទួលបានភាពសុខដុមរមនា ផ្នែកអាជីវកម្ម ទាំងខ្នាតតូច និងមធ្យម តែម្ដង។
លោក អូស្មាន ហាស្សាន់ បានស្នើបែបនេះ ខណៈលោកបានទទួលជួបគណៈប្រតិភូថៃ ដឹកនាំដោយ Hajah Dara Kattiya-Aree ប្រធានមូលនិធិស្ត្រីមេផ្ទះមុស្លិមថៃ កាលពីល្ងាចថ្ងៃព្រហស្បតិ៍ ២រោច ខែជេស្ឋ ឆ្នាំចសំរឹទ្ធិស័កព.ស២៥៦២ត្រូវនឹងថ្ងៃទី៣១ ឧសភា ឆ្នាំ ២០១៨ នៅស្នាក់ការកណ្ដាលអង្គការមូលនិធិអភិវឌ្ឍន៏មុស្លិមកម្ពុជា។
ក្នុងជំនួបនេះ លោកHajah Dara Kattiya-Aree ក៏បាន កោតសរសើរ អំពីគោលនយោបាយសុខដុមបនីយកម្មរបស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី និងបានសង្កត់ធ្ងន់ថា សាសនិកឥស្លាមកម្ពុជា មានភ័ព្វសំណាងជាងសាសនិកឥស្លាមបណ្តាប្រទេសក្នុងតំបន់មួយចំនួនផ្សេងទៀត ព្រោះនៅកម្ពុជា មានមេដឹកនាំដែលមានសមត្ថភាពដឹកនាំពិតប្រាកដ ជាមេដឹកនាំដែលមានលក្ខណៈសម្បត្តិគ្រប់គ្រាន់ ក្នុងការស្តារប្រទេសជាតិពីថ្លុកសង្គ្រាមរ៉ាំរ៉ៃ រាប់ទសវត្សរ៍ បានក្លាយជាប្រទេសដែលមានការរីកចម្រើន ការធ្វើសមាហរណកម្មសន្តិភាព ក៏ទទួលបានជោគជ័យត្រចះត្រចង់ ដែលជាគំរូល្អដល់ឆាកអន្តរជាតិ ដែលមិនអាចលាក់បាំងបានឡើយ។
លោក អូស្មាន ហាស្សាន់ បានបញ្ជាក់ថា តាមការបញ្ជាក់ឲ្យដឹងពីសកម្មភាពរបស់ មូលនិធិស្ត្រីមេផ្ទះមុស្លិម ថៃ បានកំពុងដំណើរការល្អ ក្នុងការសង្គ្រោះ និងផ្តល់ហិរញ្ញប្បទាន ដល់ស្ត្រីទន់ខ្សោយគ្មានទីពឹង ស្ត្រីមេម៉ាយ ដើម្បីទទួលបានដើមទុនខ្នាតតូច និងមធ្យម យកទៅប្រកបអាជីវកម្មកសាងជីវភាព ដោយមានការបណ្តុះបណ្តាលត្រឹមត្រូវ។ ក្រៅពីនេះ មូលនិធិ បានកំពុងផ្តល់អាហាររូបករណ៍ដល់ និស្សិត នារីក្រីក្រជាច្រើន នៅកម្ពុជាឲ្យទទួលបាន ការអប់រំបញ្ចប់កម្រិតឧត្តមសិក្សា និង ទទួលបានការងារល្អជា មន្ត្រីរាជការ បុគ្គលិកក្រុមហ៊ុន និង សហគ្រិន ផងដែរ។
លោកអូស្មាន ហាស្សាន់ ក៏បានថ្លែងអំណរគុណដល់គណៈប្រតិភូ ដែលបានចំណាយពេលវេលាដ៏មានតម្លៃចូលរួមអបអរសាទរ និងជ្រោមជ្រែងចំពោះពិធីទទួលទានអាហារស្រាយបួសរ៉ាម៉ាឌន របស់សាសនា អ៊ីស្លាមកម្ពុជា ដែលរៀបចំដោយប្រមុខរាជរដ្ឋាភិបាលកម្ពុជា។
សូមបញ្ជាក់ថា គណៈប្រតិភូមូលនិធិស្ត្រីមេផ្ទះមុស្លិមថៃក៏បានអញ្ជើញចូលរួមក្នុងពិធីទទួលទានអាហារស្រាយបួសរ៉ាម៉ាឌន របស់សាសនាឥស្លាមកម្ពុជា កាលពីថ្ងៃទី២៩ ខែឧសភា ២០១៨ នៅមជ្ឈមណ្ឌលកោះពេជ្រ ដែលរៀបចំដោយរាជរដ្ឋាភិបាលកម្ពុជាក្រោមវត្តមានដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។ នៅរសៀលថ្ងៃទី៣១ ខែឧសភា ឆ្នាំ២០១៨ លោកក៏បានអញ្ជើញគណៈប្រតិភូ មកទទួលទានអាហារស្រាយបួសរ៉ាម៉ាឌន នៅឯព្រះវិហារឥស្លាមអន្តរជាតិ អាល់សារកាល បឹងកក់ រាជធានីភ្នំពេញមួយពេល ដើម្បីបន្តភាពស្និទ្ធស្នាលទទួល ភាពរាក់ទាក់ និងដឹងគុណពីសំណាក់សហគមន៍ខ្មែរអ៊ីស្លាម៕
Source: Kampuchea Thmey Daily
0 Comments