ឯកអគ្គរដ្ឋទូតសហរដ្ឋអាមេរិកលោកស្រី Nikki Haley បាននិយាយមុនថ្ងៃបោះឆ្នោតក្រុមប្រឹក្សាសន្តិសុខថា សហរដ្ឋអាមេរិកនឹង “បដិសេធដោយមិនអាចប្រកែកបាន” ចំពោះពង្រាងសេចក្តីសម្រេចរបស់អង្គការសហប្រជាជាតិដែលអំពាវនាវឲ្យមានការការពារប្រជាជនប៉ាឡេស្ទីននៅតំបន់ហ្គាហ្សានិងវេសប៊េង។
លោកស្រី Haley បានចាត់ទុកអត្ថបទដែលដាក់ដោយប្រទេសគុយវ៉ែតជំនួសមុខឲ្យបណ្តាប្រទេសអារ៉ាប់ថា ជា “វិធីសាស្ត្រតែម្ខាងដែលមិនបានការ ហើយនឹងធ្វើឲ្យខូចយ៉ាងធ្ងន់ធ្ងរដល់កិច្ចប្រឹងប្រែងដែលកំពុងបន្តឆ្ពោះទៅរកសន្តិភាពរវាងអ៊ីស្រាអែលនិងប៉ាឡេស្ទីន”។
យោងតាមអត្ថបទដែលមើលឃើញដោយទីភ្នាក់ងារសារព័ត៌មាន AFP បានឲ្យដឹងថា សហរដ្ឋអាមេរិកបានផ្សព្វផ្សាយពង្រាងសេចក្តីសម្រេចរបស់ខ្លួនផ្ទាល់ដោយបានស្តីបន្ទោសដល់ក្រុមហាម៉ាស់ចំពោះការផ្ទុះឡើងនៃជម្លោះនាពេលថ្មីៗនេះនៅតំបន់ហ្គាហ្សានិងទាមទារឲ្យក្រុមហាម៉ាស់និងឥស្លាមជីហាដបញ្ឈប់សកម្មភាពហិង្សានិងសកម្មភាពបង្កហេតុទាំងអស់រួមទាំងនៅតាមរបងព្រំដែនផងដែរ។
ទោះបីជាយ៉ាងណាក៏ដោយ វាមិនច្បាស់ទេថាតើនឹងមានការបោះឆ្នោតមួយលើអត្ថបទរបស់សហរដ្ឋអាមេរិកដែលអាចបរាជ័យក្នុងការប្រមូលបានការគាំទ្រគ្រប់គ្រាន់ដែរឬទេ។
ប្រទេសគុយវ៉ែតបានបង្ហាញសេចក្តីព្រាងរបស់ខ្លួនកាលពីពីរសប្តាហ៍មុនដោយអំពាវនាវជាបឋមឲ្យមានបេសកកម្មការពារអន្ដរជាតិមួយសម្រាប់ប្រជាជនប៉ាឡេស្ទីនខណៈដែលការតវ៉ាបានប្រែក្លាយទៅជាអំពើហិង្សានៅលើព្រំដែនអ៊ីស្រាអែល - ហ្គាហ្សា។
ជនជាតិប៉ាឡេស្ទីនយ៉ាងតិច១២២នាក់ត្រូវបានសម្លាប់ដោយការវាយប្រហាររបស់អ៊ីស្រាអែលនៅក្នុងភាពចលាចលចាប់តាំងពីចុងខែមីនាមក។
វានឹងក្លាយជាលើកទី២ហើយដែលលោកស្រី Haley ប្រើអំណាចវេតូរបស់អាមេរិកដើម្បីទប់ស្កាត់វិធានការរបស់អង្គការសហប្រជាជាតិលើជម្លោះអ៊ីស្រាអែល - ប៉ាឡេស្ទីន។
កាលពីខែធ្នូ លោកស្រី Haley បានវេតូលើវិធានការមួយដែលច្រានចោលការសម្រេចចិត្តរបស់លោកប្រធានាធិបតី Donald Trump ក្នុងការផ្លាស់ទីតាំងស្ថានទូតអាមេរិកទៅក្រុងយេរូសាឡឹមបន្ទាប់ពីសមាជិកក្រុមប្រឹក្សាចំនួន១៤រូបផ្សេងទៀតបានគាំទ្រវា៕ AFP
Source: Kampuchea Thmey Daily
0 Comments