កសិករនៅភូមិដំណាក់ព្រីង ចិញ្ចឹមមាន់ស្រែយកសាច់លក់អោយចំណីធម្មជាតិ៣ខែបានទទួលផល

កំពង់ឆ្នាំង ៖ កសិករវ័យក្មេងម្នាក់ ក្រោយពីរៀនចប់ទទួលបានបរិញ្ញាប័ត្រពីសកលវិទ្យាល័យ កសិកម្ម ជំនាញផ្នែកពេទ្យសត្វមក គាត់បានចាប់យកមុខរបរចិញ្ចឹមមាន់ស្រែយកសាច់លក់ដោយផលិតចំណីធម្មជាតិអោយមាន់ស៊ី គឺចិញ្ចឹម៣ខែទទួលផលបានមាន់១ៗ មានទម្ងន់ពី១,៥០ ទៅ១,៨០គីឡូក្រាម ហើយមានម៉ូយមកកុម៉្មង់ទិញច្រើន គឺចិញ្ចឹមមាន់នៅតិចលក់អោយគេមិនទាន់ឡើយ ដោយទាមទារអោយគាត់ពង្រីកមុខរបរនេះអោយធំថែមទៀត។

លោក ណក់ ផល្លី អាយុ៣០ឆ្នាំ ជាម្ចាស់កសិដ្ឋានចិញ្ចឹមមាន់ស្រែ នៅក្នុងភូមិដំណាក់ព្រីង ឃុំស្វាយជុក ស្រុកសាមគ្គីមានជ័យ និងជាអតីតនិស្សិតសកលវិទ្យាល័យកសិកម្មចំការដូង បាននិយាយអោយដឹងថា ៖ លោកបានចាប់យកមុខរបរចិញ្ចឹមមាន់ស្រែយកសាច់លក់ រយៈពេលជិត២ឆ្នាំហើយ ដោយមានទ្រុងមាន់ធំៗទំហំ១០ម គុណ៦០ម ចំនួន២ខ្នង និងមានមាន់ស្រែកំពុងចិញ្ចឹមចំនួនជាង៣ពាន់ក្បាល ដោយកាលពីខែមេសាពេលចូលឆ្នាំខ្មែរមុននេះលោក បានលក់មាន់ចេញអស់ជាង២ពាន់ក្បាលទៅហើយ។

លោក ណក់ ផល្លី បានអោយដឹងទៀតថា ៖ រៀបចិញ្ចឹមមាន់ស្រែនេះ គឺជាដំបូងលោកបានទិញកូនមាន់ស្រែដែលមានអាយុ៣អាទិត្យពីអ្នកស្រុកនៅតាមមូលដ្ឋាន ដោយមានតម្លៃក្នុង១ក្បាល៤៥០០រៀល មកចិញ្ចឹមថែបំប៉ននៅក្នុងទ្រុង ដោយអោយចំណីគ្រាប់ៗការ៉ុងទិញពីទីផ្សារអោយវាស៊ីតិចតួចតែប៉ុណ្ណោះ ហើយភាគច្រើនលោកផលិតចំណីធម្មជាតិដោយខ្លួនឯងអោយមាន់ស៊ីទើបវាឆាប់ធំធាត់។ ចំណីធម្មជាតិដែលលោកផលិតនោះមាន ពោត សណ្ដែក សៀង ម្សៅត្រី កាល់ស្យូម បាស់ស្មិច យកមកកិនលាយជាមួយកន្ទក់អោយមាន់ស៊ី គឺអោយវាស៊ីក្នុងរយៈពេល៣ខែគឺវានឹងធំធាត់ ដែលបើមាន់ឈ្មោលក្នុង១ក្បាលវាមានទម្ងន់ ពី១,៦០ ទៅ១,៨០គីឡូ ចំណែកមាន់ញីវាមានទម្ងន់១ក្បាលៗ ១,៤០ ទៅ១,៦០គីឡូ។

លោក ណក់ ផល្លី បានបញ្ជាក់អោយដឹងថា ៖ ការចិញ្ចឹមមាន់មិនងាយស្រួលឡើយដោយត្រូវមានដើមទុនច្រើន ត្រូវរៀនបច្ចេកទេសចិញ្ចឹម ត្រូវចេះផលិតចំណីធម្មជាតិ និងមានអ្នកថែទាំអោយចំណីវាស៊ី ទឹកវាផឹកជាប្រចាំ និងក៏ត្រូវចាក់វ៉ាក់សាំងអោយវាទៅតាមដំណាក់កាលវាធំ និងនៅពេលវាមានជំងឺជាដើមគឺគ្មានពេលទំនេរឡើយ មិនតែប៉ុណ្ណោះ ក៏ត្រូវការជួលកម្មករ៣ទៅ៤នាក់ អោយជួយធ្វើការនេះផងដែរទើបអាចចិញ្ចឹមវាបាន។

ដោយឡែក នៅពេលលក់ចេញយើងអាចលក់បានតម្លៃក្នុង១គីឡូ ពី១៥០០០រៀលទៅ
១៦០០០រៀល ដោយមានម៉ូយនៅលក់ទីផ្សារ ម៉ូយធ្វើម្ហូបការ មកទិញដល់កសិដ្ឋាន។ ទន្ទឹមគ្នានេះដែរ ក៏មានក្រុមហ៊ុនមួយនៅភ្នំពេញ បានកុម្ម៉ង់ទិញមាន់ស្រែនេះក្នុង១ថ្ងៃៗ ២០០ក្បាល ប៉ុន្តែលោកមិនទាន់ហ៊ានទទួលទេ ដោយលោកនឹងត្រូវពង្រីកមុខរបររដូវនេះ៣ដងទៀតក្នុងរយៈពេល៦ខែទៀត ទើបទទួលការកុម្ម៉ង់ទិញរបស់ក្រុមហ៊ុននេះបាន៕