ភ្នំពេញ ៖ បុរសម្នាក់ ដែលគេស្គាល់ថា ជាអ្នកស៊ីឈ្នួលចាំចំការ ត្រូវបានឃាតករ ដែលជាចោរលួចមាន់ កាប់សម្លាប់ ខណៈពេលដែលជនរងគ្រោះស្រែកចាប់ចោរ។
ហេតុការណ៍នេះ បានកើតឡើងកាលពីវេលាម៉ោង២០និង៤០នាទីយប់ថ្ងៃទី៣១ ខែឧសភា នៅចំណុចដីចំការស្វាយភូមិមិត្តភាព សង្កាត់ព្រែកឯង ខណ្ឌច្បារអំពៅ រាជធានីភ្នំពេញ។
ជនរងគ្រោះឈ្មោះ មាស ចន្ថា ហៅ ឌៀប ភេទប្រុស អាយុ ៥១ឆ្នាំ ជនជាតិ ខ្មែរ មុខរបរ ចាំចំការឲ្យគេ ស្នាក់នៅ ចំណុចកើតហេតុខាងលើ។
ជនសង្ស័យឃាត់ខ្លួនឈ្មោះជា ហៃ ភេទប្រុស អាយុ១៦ឆ្នាំ ជនជាតិ ខ្មែរ មុខរបរ មិនពិតប្រាកដ ស្នាក់នៅមិនពិតប្រាកដ។
តាមប្រភពព័ត៌មានបានអោយដឹងថា កាលពីថ្ងៃទី ៣១-០៥-២០១៨ វេលាម៉ោង២០និង៤០នាទី ជនសង្ស័យ០៣នាក់ ឈ្មោះ ជា ហៃ, ឈ្មោះ តួ និងម្នាក់ទៀតមិនស្គាល់ឈ្មោះនាំគ្នាផ្លោះរបងចូលទៅក្នុងដីឡូត៍ចំការស្វាយ (ចំណុចកើតហេតុខាងលើ) ដើម្បី លួចមាន់ ពេលនោះជនរងគ្រោះឮឆ្កែព្រុសក៏បញ្ចាំងភ្លើងពិលឃើញជនសង្ស័យកំពុងទាញសំណាញ់លួចមាន់ ក៏ងើបពី គ្រែដេកស្ទុះចេញទៅចាប់ជនសង្ស័យ រួចពួកជនសង្ស័យនាំគ្នាវាយជនរងគ្រោះដួលទៅលើដី ហើយជនសង្ស័យឈ្មោះ តួ ស្ទុះទៅយកកាំបិតផ្គាក់របស់ជនរងគ្រោះនៅក្រោមគ្រែកាប់ទៅលើជនរងគ្រោះចំកញ្ចឹងក, ចំថ្ពាល់ខាងស្តាំ និងចំ ក្បាលរបួសធ្ងន់ រួចនាំគ្នាគេចខ្លួនបោះកាំបិតផ្គាក់ចោលនៅកន្លែងកើតហេតុ។
ចំណែកជនរងគ្រោះត្រូវបានក្រុមគ្រួសារ បញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត រួចក៏បានស្លាប់។ រហូតដល់ម៉ោង២២និង០០នាទី ថ្ងៃដដែល សមត្ថកិច្ចស្រាវជ្រាវឃាត់ខ្លួនបានបក្ខពួកជនសង្ស័យម្នាក់ឈ្មោះ ជា ហៃ នៅភូមិកើតហេតុខាងលើ បញ្ជូនមកអធិការដ្ឋាន នគរបាលខណ្ឌច្បារអំពៅ ចាត់ការតាមច្បាប់៕
Source: Kampuchea Thmey Daily
0 Comments