ព្រះបរមរាជវាំង ​៖​ ព្រះ​ចៅ​អធិរាជ​ជប៉ុន ​កំពុង​ព្យាបាល​ជំងឺ​ខួរក្បាល

អ្នកនាំពាក្យ​រដ្ឋាភិបាល​កំពូល​របស់​ប្រទេស​ជប៉ុន​បាន​និយាយថា ព្រះ​ចៅ​អធិរាជ Akihito ព្រះជន្ម​៨៤​វស្សា​ បាន​លុបចោល​ព្រះរាជកិច្ច​ផ្លូវការ​របស់​ទ្រង់​កាលពី​ថ្ងៃ​ចន្ទ​ បន្ទាប់ពី​ទ្រង់​ប្រឈួន។

លោក Yoshihide Suga បាន​ប្រាប់​អ្នកយកព័ត៌មាន​ថា “​ព្រះ​ចៅ Akihito ទ្រង់​ប្រឈួន​ភ្លាមៗ ​និង​បែកញើស​យ៉ាង​ខ្លាំង​នៅពេល​ព្រឹក​ព្រលឹម​ ហើយ​អធិរាជ​នី Michiko បាន​នាំ​ទ្រង់​ទៅ​ជួប​ពេទ្យ​វាំងជា​បន្ទាន់​”​។​
​
លោក Suga ដែលជា​ប្រធាន​គណៈរដ្ឋមន្ត្រី​បាន​និយាយ​នៅក្នុង​សន្និសីទកាសែត​មួយ​ថា គ្រូពេទ្យ​បានធ្វើ​រោគវិនិច្ឆ័យ​ព្រះ​ចៅ​អធិរាជ​ថា​មាន​រោគសញ្ញា​នៃ​ការវិល​មុខ​និង​ចង់​ក្អួត​ដោយសារតែ​ភាពស្លេកស្លាំង​ខួរក្បាល​ដែល​តម្រូវ​ឲ្យ​មានការ​សម្រាក​គ្រប់​គ្រន់​និង​ការត្រួតពិនិត្យ​តាមដាន​។​
​
ជំងឺ​ស្លេកស្លាំង​ខួរក្បាល​គឺ​បណ្តាលមកពី​លំហូរ​ឈាម​មិន​គ្រប់គ្រាន់​ទៅក្នុង​ខួរក្បាល​។​
​អ្នកនាំពាក្យ​របស់​ភ្នាក់ងារ​រាជវាំង Imperial House បាន​ប្រាប់ AFP ថា ព្រះ​ចៅ​អធិរាជ Akihito នឹងត្រូវ​ជួប​ជាមួយ​ចៅស្រី Ayako ដើម្បី​ស្តាប់​អំពី​ការភ្ជាប់​ពាក្យ​របស់​ព្រះ​នាង​។​
​
លោក​បាន​បន្ថែមថា “​យើង​មិនមាន​ព័ត៌មាន​លម្អិត​បន្ថែមទៀត​ទេ​អំពី​ស្ថានភាព​សុខភាព​របស់​ព្រះ​ចៅ​អធិរាជ​”​។ គេ​មិន​ច្បាស់​ទេ​ថា​នៅពេលណា​ទើប​ព្រះ​ចៅ​នឹង​បន្ត​ព្រះរាជកិច្ច​សាធារណៈ​របស់​ទ្រង់​ឡើងវិញ​។​
​
ព្រះ​ចៅ​អធិរាជ Akihito បានធ្វើ​ឲ្យ​ប្រទេស​នេះ​មានការ​ភ្ញាក់ផ្អើល​យ៉ាងខ្លាំង​នៅក្នុង​ឆ្នាំ​២០១៦​នៅពេលដែល​ទ្រង់​បានបង្ហាញ​ពី​បំណង​ដាក់រាជ្យ​បន្ទាប់ពី​បំពេញ​ព្រះរាជកិច្ច​អស់​រយៈពេល​ជិត​៣០​ឆ្នាំ​ដោយ​លើកឡើង​ពី​បញ្ហា​ព្រះជន្ម​និង​សុខភាព​របស់​ទ្រង់​។​
​
ព្រះអង្គ​នឹង​ក្លាយជា​ព្រះ​ចៅ​អធិរាជ​ដំបូង​គេ​ដែល​ចូលនិវត្តន៍​ក្នុង​រយៈពេល​ជាង​ពីរ​សតវត្ស​ម​នេះ​នៅក្នុង​គ្រួសារ​អធិរាជ​ចាស់​ជាងគេ​របស់​ពិភពលោក​៕ AFP
​

[caption id="attachment_940166" align="aligncenter" width="700"]  [/caption]

​

Source: Kampuchea Thmey Daily