ភ្នំពេញ ៖ លោក ហេង វ៉ាន់ដា ប្រធានសមាគមគ្រឹះស្ថានឧត្តមសិក្សាកម្ពុជាលើកឡើងបែបនេះ នៅក្នុងពិធីមួយ ដែលមានឈ្មោះថា “ថ្ងៃប្តេជ្ញាចិត្តពណ៌ខៀវ” ស្តីពីការចូលរួមធ្វើជាអ្នកសង្កេតការណ៍ជាតិ សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៦ ដែលបានរៀបចំធ្វើឡើងកាលពីថ្ងៃអាទិត្យ ទី០១ ខែកក្កដា ឆ្នាំ២០១៨។
លោក ហេង វ៉ាន់ដា លើកឡើងថា មូលហេតុដែលសមាគមចូលរួមសង្កេតការណ៍នៅក្នុងការបោះឆ្នោតជ្រើសតាំងតំណាងរាស្ត្រនីតិកាលទី៦ មានបំណងចំនួន៣ គឺ ទី១, សមាគមចង់លើកស្ទួយលទ្ធិប្រជាធិបតេយ្យ សេរីពហុបក្សនៅកម្ពុជា តាមរយៈហិបឆ្នោត ទី២, សមាគមចង់ចូលរួមថែរក្សាសន្តិភាព ស្ថិរភាពនយោបាយ និងកំណើនសេដ្ឋកិច្ចនៅកម្ពុជា ដើម្បីប្រជាពលរដ្ឋយើងទទួលបាននូវសុខដុមរមនា និងទី៣, សមាគមចង់តាមដានមើល តាមឃ្លាំមើលពីដំណើការបោះឆ្នោតនៅកម្ពុជា និងតាមឃ្លាំមើលគណៈកម្មាធិការជាតិរៀបចំការបោះឆ្នោតផងដែរ ដើម្បីឲ្យសមាគមចេញសេចក្តីថ្លែងការណ៍មួយទទួលស្គាល់ ឬទទួលស្គាល់ក្នុងកម្រិតណា ឬមិនទទួលស្គាល់តែម្តង។
ទាក់ទងដំណើរការបោះឆ្នោតនាពេលខាងមុខ និងការលើកឡើងរបស់អង្គការសង្គមស៊ីវិលមួយចំនួននោះ លោកឧកញ៉ាប្រធានបានលើកឡើងថា វាជាល្បែងប្រជាធិបតេយ្យ សេរីពហុបក្សនៅកម្ពុជា ហើយក៏ជាល្បែងប្រជាធិបតេយ្យនៅក្នុងពិភពលោកផងដែរ ដែលមានគណបក្សខ្លះចូលរួម គណបក្សខ្លះក៏ពហិកា អ្នកសង្កេតការណ៍ខ្លះចូលរួម ខ្លះក៏មិនចូលរួម ដែលនេះហើយជាល្បែងប្រជាធិបតេយ្យ ហើយអ្វីដែលសមាគមកំពុងធ្វើ ដោយរួមគ្នា១០៣ គ្រឹះស្ថាននេះ ក៏មានច្បាប់ត្រឹមត្រូវ ដោយបានដាក់ពាក្យទៅ គ.ជ.ប ដើម្បីក្លាយជាអ្នកសង្កេតការណ៍ជាតិ ហើយនៅ គ.ជ.ប ទទួលស្គាល់ សមាគម និងចាប់ផ្តើមមើលបរិស្ថាននយោបាយ និងបរិយាកាសគ្រប់បែបយ៉ាងនៅក្នុងដំណើការបោះឆ្នោត។ ដូច្នេះការចេញចូលរបស់អ្នកនយោបាយ របស់សង្គមស៊ីវិល ចូលរួម ឬមិនចូលរួម គឺជាល្បែងប្រជាធិបតេយ្យ។
ដោយឡែកការចូលរួមរបស់សមាគម ទូទាំងប្រទេសអាចបញ្ជាក់បានថា កម្ពុជាមានសន្តិភាពគ្រប់គ្រាន់អាចដំណើការបោះឆ្នោតទៅបានដោយរលូន ហើយបើប្រៀបធៀបជាមួយការបោះឆ្នោតក្រុមប្រឹក្សាឃុំ សង្កាត់ គឺបរិយាកាសពេលនេះល្អជាង ប្រជាពលរដ្ឋប្រកបមុខរបររកស៊ី យ៉ាងស្ងាត់ស្ងៀម គ្មានអ្វីកើតឡើងទេ ហើយការការអំពាវនាវមិនឲ្យទៅបោះឆ្នោតពីអ្នកនយោបាយផ្សេងៗនោះ លោកឧកញ៉ាប្រធាន បានលើកឡើងថា “លទ្ធិប្រជាធិបតេយ្យគេឲ្យយើងទៅបោះឆ្នោត កាលណាយើងមិនទៅបោះឆ្នោត ជួនកាលក៏អាចជាល្បែងប្រជាធិបតេយ្យ ប៉ុន្តែបើសិនជាប្រកាស ហាមឃាត់ ឬមួយបន្ទច់បង្អាក់មិនឲ្យទៅបោះឆ្នោត នោះគឺអ្នកសម្លាប់ប្រជាធិបតេយ្យ។
សូមបញ្ជាក់ថា ដំណើរការបោះឆ្នោតជ្រើសតាំងតំណាងរាស្ដ្រនីតិកាលទី៦ ឆ្នាំ២០១៨ នឹងប្រព្រឹត្តិទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខ ហើយគណបក្សនយោបាយ ដែលបានចូលរួមប្រកួតប្រជែងមានចំនួន២០ រួមមាន គណបក្ស “គណបក្សខ្មែររួបរួមជាតិ” លេខរៀងទី១, គណបក្ស “គណបក្សមាតុភូមិយើង” លេខរៀងទី២, គណបក្ស “គណបក្សពន្លឺថ្មី” លេខរៀងទី៣, គណបក្ស “សញ្ជាតិកម្ពុជា” លេខរៀងទី៤, គណបក្ស “ខ្មែរក្រោក” លេខរៀងទី៥, គណបក្ស “សំបុកឃ្មុំសង្គមប្រជាធិបតេយ្យ” លេខរៀងទី៦, គណបក្ស “ប្រជាធិបតេយ្យមូលដ្ឋាន” លេខរៀងទី៧, គណបក្ស “ខ្មែរសាធារណរដ្ឋប្រជាធិបតេយ្យ” លេខរៀងទី៨, គណបក្ស “រស្មីខេមរា” លេខរៀងទី៩, គណបក្ស “សម្ព័ន្ធដើម្បីប្រជាធិបតេយ្យ” លេខរៀងទី១០, គណបក្ស “ខ្មែរសាធារណរដ្ឋ” លេខរៀងទី១១, គណបក្ស “ខ្មែរឈប់ក្រ” លេខរៀងទី១២, គណបក្ស “ហ៊្វុនស៊ិនប៉ិច” លេខរៀងទី១៣, គណបក្ស “ខ្មែរអភិវឌ្ឍន៍សេដ្ឋកិច្ច” លេខរៀងទី១៤, គណបក្ស “យុវជនកម្ពុជា” លេខរៀងទី១៥, គណបក្ស “ធម្មាធិបតេយ្យ” លេខរៀងទី១៦, គណបក្ស “ឆន្ទៈខ្មែរ” លេខរៀងទី១៧, គណបក្ស “ជនជាតិដើមប្រជាធិបតេយ្យកម្ពុជា” លេខរៀងទី១៨, គណបក្ស “ខ្មែរតែមួយ” លេខរៀងទី១៩ និងគណបក្ស “ប្រជាជនកម្ពុជា” លេខរៀងទី២០៕
Source: Kampuchea Thmey Daily
0 Comments