ភ្នំពេញ ៖ លោកបណ្ឌិត ម៉ី កល្យាណ ប្រធានក្រុមប្រឹក្សាភិបាលសាកលវិទ្យាល័យភូមិន្ទភ្នំពេញបានមានប្រសាសន៍ថា កម្ពុជាត្រូវការពេលរយៈពេល១០ឆ្នាំទៀតដើម្បីផលិតវត្ថុធាតុដើមផលិតផលសូត្រដើម្បីផ្គត់ផ្គង់នៅក្នុងស្រុក ដែលមានតម្រូវការប្រមាណ៤០០តោនក្នុង១ឆ្នាំៗ ខណៈបច្ចុប្បន្នការផ្គត់ផ្គង់បានតែ១តោនប៉ុណ្ណោះ។
លោកបណ្ឌិតម៉ីកល្យាណបានបន្តថា «ក្តីសុបិន របស់ខ្ញុំម្តុំ១០ឆ្នាំទៀតគឺថាដើម្បីធ្វើបាន៤០០តោនយើងត្រូវធ្វើមន ពី១ទៅ២ម៉ឺនហិកតាដែលបច្ចុប្បន្នធ្វើតែ២០ហិកតា។ ដូចនេះអាស្រ័យទៅលើការចូលរួមនិងការយល់ដឹងរបស់ប្រជាជនរួមទាំងការផ្សព្វផ្សាយពីចំណេះដឹងស្តីពីរបៀបដាំដុះមននិងចិញ្ចឹមដង្កូវនាងទទួលបានទិន្នផលខ្ពស់បន្ថែមទៀតដើម្បីឲ្យកសិករមានចំណេះដឹងចូលរួមដាំដំណាំមននិងចិញ្ចឹមដង្កូវនាងនេះឲ្យកាន់តែច្រើនថែមទៀត។
ថ្លែងក្រោយពិធីប្រគល់ពូជដង្កូវនាងជូនកសិករបង្គោលកាលពីព្រឹកថ្ងៃទី៣កក្កដានៅមជ្ឈមណ្ឌលសហប្រតិបត្តិការកម្ពុជាកូរ៉េលោកបណ្ឌិត ម៉ី កល្យាណបានជំរុញឲ្យនិស្សិតសាកលវិទ្យាល័យសហការជាមួយមន្ត្រីជំនាញក្រសួងកសិកម្មបង្កើនការស្រាវជ្រាវបង្កើតពូជដង្កូវនាងល្អៗឲ្យបានច្រើនថែមទៀតចែកចាយដល់កសិករដើម្បីផលិតឲ្យបានទិន្នផលខ្ពស់។
លោកបណ្ឌិតបានបន្តថា ការបង្កើតពូជដង្កូវនាងល្អៗដែលមិនមានជំងឺនេះនឹងជួយឲ្យកសិករចិញ្ចឹមដង្កូវនាងទទួលបានទិន្នផលខ្ពស់ដើម្បីឆ្លើយតបទៅតាមតម្រូវការក្នុងស្រុក ប្រមាណ៤០០តោ នក្នុង១ឆ្នាំ ខណៈដែលបច្ចុប្បន្នកសិករផលិតបានតែ១តោនប៉ុណ្ណោះដើម្បីកាត់បន្ថយការនាំចូលផលិតផលសូត្រពីបរទេស។
លោកបណ្ឌិត បានបន្ថែមថា ការផលិតសូត្របានទិន្នផលតិចនេះគឺដោយសារពូជដង្កូវនាងដែលកសិករយកមកចិញ្ចឹមមានជំងឺដោយក្នុង១០០កូនដង្កូវនាងអាចរស់បានតែ២០ក្បាលប៉ុណ្ណោះតែពូជដង្កូវនាងដែលស្រាវជ្រាវដោយនិស្សិតសាកលវិទ្យាល័យភូមិន្ទភ្នំពេញ អាចនៅរស់រហូតដល់ទៅជាង៩០ដង្កូវនាង ហើយអាចហូតសូត្របានប្រវែង៣០០ម៉ែត្រ។
លោកបណ្ឌិតបានឲ្យដឹងទៀតថា សាកលវិទ្យាល័យ នឹងបណ្តុះបណ្តាលបច្ចេកទេសស្តីពីរបៀបចិញ្ចឹមដង្កូវនាងឲ្យបានល្អនិងទទួលបានទិន្នផលខ្ពស់ដល់គ្រូបង្គោលឬកសិករគំរូឲ្យពួកគាត់ទៅបង្ហាត់បង្រៀនបន្តដល់កសិករផ្សេងៗទៀតដើម្បីពង្រីកការដាំដុះមន និងការចិញ្ចឹមដង្កូវនាងឲ្យកាន់តែផុលផុសថែមទៀតដើម្បីលើកស្ទួយដល់វិស័យសូត្រឲ្យកាន់តែរីកចម្រើនឡើងវិញ។
ចំណែកលោក ហួត សុខា តំណាងសហគមន៍សូត្រអូរ៉ាល់ខេត្តកំពង់ស្ពឺដែលទទួលពូជដង្កូវនាងពីសាកលវិទ្យាល័យភូមិន្ទភ្នំពេញបានសន្យាថា នឹងយកពូជដង្កូវនាងនេះទៅចិញ្ចឹមទៅតាមបច្ចេកទេស។ តែលោកស្នើសុំឲ្យសាកលវិទ្យាល័យបន្តការផ្សព្វផ្សាយស្តីពីបច្ចេកទេសនៃរបៀបការចិញ្ចឹមដង្កូវនាងដល់គ្រូបង្គោលឲ្យបានច្រើនបន្ថែមទៀតដើម្បីឲ្យកសិករទទួលបានចំណេះដឹងចូលរួមដាំមននិងចិញ្ចឹមដង្កូវនាងឲ្យបានច្រើនព្រោះថាការដាំមន នៅមានកម្រិតនៅឡើយដោយសារខ្វះបច្ចេកទេសនៃការដាំដុះនិងចិញ្ចឹមដង្កូវនាង។
ទាក់ទងនឹងការចិញចិញ្ចឹមដង្កូវនាងនេះលោកបានបញ្ជាក់ទៀតថា ដង្កូវនាងវាស៊ីស្លឹកមនជាចំណីរហូតដល់រយៈពេល៤០ថ្ងៃទើបចេញសំបុកដែលយើងអាចហូតសូត្របាន។
យ៉ាងណាក៏ដោយលោកស្នើឲ្យសាកលវិទ្យាល័យបង្កើនការស្រាវជ្រាវពូជថ្មីៗដែលអាចហូតសូត្របានវែងដល់១ពាន់ម៉ែត្រខណៈបច្ចុប្បន្នហូតបានត្រឹមតែ៣០០ម៉ែត្រប៉ុណ្ណោះ។
គួរបញ្ជាក់ថា ផលិតសរសៃសូត្រនេះអាចឆ្នៃជាសំលៀកបំពាក់ គ្រឿងសម្អាង សាប៊ូ និងបរិក្ខារផ្នែកវិស័យសុខាភិបាលជាដើម៕
Source: Kampuchea Thmey Daily
0 Comments