លោកលឹម គានហោ ទទួលបានសញ្ញាប័ត្រកិត្តិបណ្ឌិតផ្នែកគ្រប់គ្រងធនធានទឹក ពីរាជបណ្ឌិតសភាកម្ពុជា

ភ្នំពេញ ៖ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម ត្រូវបានរាជបណ្ឌិតសភា កម្ពុជា ប្រគល់ជូននូវសញ្ញាប័ត្រកិត្តិបណ្ឌិត ផ្នែកគ្រប់គ្រងធនធានទឹក ជាការតបស្នង នូវ គុណបំណាច់ និងស្នាដៃជាប្រយោជន៍ចំពោះជាតិ មាតុភូមិក្នុងការ អភិវឌ្ឍន៍សង្គម វប្បធម៌ សាសនា សេដ្ឋកិច្ចជាតិ ក្រោមការដឹកនាំរបស់ សម្តេច តេជោ ហ៊ុន សែន ប្រមុខរាជរដ្ឋាភិបាល កម្ពុជា។

ពិធីប្រគល់ សញ្ញាប័ត្រ «កិត្តិបណ្ឌិត ផ្នែកគ្រប់គ្រងធនធានទឹក » បាន ធ្វើឡើងកាលពីថ្ងៃទី៣ ខែកក្កដា ឆ្នាំ២០១៨ នៅទីស្តីការ ក្រសួងធនធាន ទឹកក្រោមវត្តមាន លោកបណ្ឌិត សុខ ទូច ប្រធានរាជបណ្ឌិតសភាកម្ពុជា និងជាអនុប្រធានប្រចាំការនៃក្រុមប្រឹក្សាបណ្ឌិតសភាចារ្យ។

ប្រធានរាជបណ្ឌិតសភាកម្ពុជា លោកបណ្ឌិត សុខ ទូច បានថ្លែងបញ្ជាក់ថា ការផ្តល់ជូននូវសញ្ញាប័ត្របណ្ឌិតផ្នែកគ្រប់គ្រងធនធានទឹកដល់លោក លឹម គានហោ នេះគឺដោយសារតែលោកបានបញ្ចេញនូវស្នាដៃជា ច្រើនក្នុងការអភិវឌ្ឍប្រទេសលើគ្រប់វិស័យ សំខាន់វិស័យធនធានទឹកនៅកម្ពុជា។ ទន្ទឹមនោះ លោកកិត្តិបណ្ឌិត លឹម គានហោ តែងតែគោរព និងអនុវត្តដោយឥតងាករេ នូវមាគ៌ាដឹកនាំប្រកប ដោយគតិបណ្ឌិតព្រមទាំងចក្ខុវិស័យវែងឆ្ងាយរបស់សម្តេច ហ៊ុន សែន ប្រមុខរាជរដ្ឋាភិបាល កម្ពុជា ក្នុងការដឹកនាំមាតុភូមិកម្ពុជាឲ្យចាកចេញផុតពីសោកនាដកម្មរហូតទទួលបាននូវសុខ សន្តិភាព ឯកភាពជាតិ និងសុខដុមរមនារហូតដល់បច្ចុប្បន្ននេះ។

លោកបណ្ឌិត សុខ ទូច បានបញ្ជាក់ថា សញ្ញាប័ត្រកិត្តិបណ្ឌិតជាសញ្ញាប័ត្រកិត្តិយសដ៏ ឧត្តុង្គឧត្តមរបស់រាជបណ្ឌិតសភាកម្ពុជា។ លោកថា សញ្ញាប័ត្រនេះសម្រាប់ផ្តល់ជូនដល់ឥស្សរជន ឬបញ្ញាជនដែលមានគុណបំណាច់ និងស្នាដៃជាប្រយោជន៍ចំពោះជាតិ មាតុភូមិក្នុងការ អភិវឌ្ឍន៍សង្គម វប្បធម៌ សាសនា សេដ្ឋកិច្ចជាតិ។ ទន្ទឹមនោះក៏ជាបុគ្គលដែលត្រូវបានទទួល ស្គាល់ដោយមហាជនថែមទៀត។

លោកថា ការផ្តល់ជូនសញ្ញាប័ត្រកិត្តិបណ្ឌិតផ្នែកគ្រប់គ្រងធនធានទឹកដល់លោក លឹម គានហោនាពេលនេះគឺត្រូវបានឆ្លងកាត់នូវការវាយតម្លៃយ៉ាងយកចិត្តទុកដាក់បំផុតអំពីស្នាដៃ និងសមិទ្ធផល រួមទាំងទស្សនវិជ្ជាដឹកនាំដែលជាគុណវុឌ្ឍចម្បងរបស់លោក លឹម គានហោ ពីសំណាក់ក្រុម បណ្ឌិតសភាចារ្យ នៃរាជបណ្ឌិតសភាកម្ពុជា។

លោក សុខ ទូច បញ្ជាក់បន្ថែមថា លោក លឹម គានហោ ជាបេក្ខជនជ័យលាភីមួយរូប ដែលត្រូវរាជបណ្ឌិតសភាកម្ពុជាបានកត់ត្រាទុកក្នុងបញ្ជីថា ជាឥស្សរជនជាន់ខ្ពស់របស់ជាតិ ដែលបានកសាងស្នាដៃនិងគុណបំណាច់ចំពោះមាតុភូមិនិងបំរើផលប្រយោជន៍ប្រជាជនស្ទើរតែ ពេញមួយជីវិតរបស់លោក ។ លោក លឹម គានហោ ក៏បានចូលរួមយ៉ាងសកម្មនៅក្នុងការអនុវត្ត គោលនយោបាយស្តារនិងកសាងជាតិក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា ដែលបានផ្តោតជាអាទិភាពទៅលើយុទ្ធសាស្ត្រនយោបាយ៤ យ៉ាងគឺ ផ្លូវ ភ្លើង ទឹក និងមនុស្សដែលជាសេចក្តីត្រូវការឥតឈប់ឈររបស់សង្គមមនុស្សជាតិ។

បន្ទាប់ពី ទទួល លោកកិត្តិបណ្ឌិត លឹម គានហោ រដ្ឋមន្ត្រីក្រសួងធនធានទឹក និងឧតុនិយមបានបង្ហាញនូវក្តីរំភើប រីករាយយ៉ាងខ្លាំងដោយត្រូវបានរាជបណ្ឌិតសភាកម្ពុជា ដែលជាស្ថាប័នស្រាវជ្រាវជាន់ខ្ពស់បំផុត របស់ជាតិផ្តល់នូវសញ្ញាប័ត្រកិតិ្តបណ្ឌិតផ្នែកគ្រប់គ្រង់ធនធានទឹក។ លោកថា សញ្ញាប័ត្រដែល លោកបានទទួលនូវពេលនេះ មិនគ្រាន់តែជាការបញ្ជាក់នូវចំណេះដឹងជំនាញនៃការដឹកនាំគ្រប់ គ្រងរួមទាំងដោះស្រាយនៅបញ្ហាទឹកប៉ុណ្ណោះទេ ប៉ុន្តែសញ្ញាប័ត្រនេះនឹងក្លាយជាកម្លាំងចលករ ជំរុញ និងលើកទឹកចិត្តលោក និងមន្ត្រី ថ្នាក់ក្រោម បន្តកិច្ចខិតខំប្រឹងប្រែងបំពេញភារកិច្ចជូនជាតិមាតុភូមិ ក្រោមការដឹកនាំប្រកបដោយកិត្តិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាលកម្ពុជា ។

លោកបានបន្ថែមទៀតថា «សញ្ញាបត្រដែលខ្ញុំ បានទទួលនៅពេលនេះ មិនត្រឹមតែជាការសបញ្ជាក់ នូវចំណេះដឹងជំនាញ លើការដឹកនាំគ្រប់គ្រង និងដោះស្រាយលើបញ្ហាទឹក ប៉ុណ្ណោះទេ ប៉ុន្តែសញ្ញាបត្រនេះ ក៏នឹងក្លាយជាកម្លាំងចលករមួយជំរុញលើកទឹកចិត្តខ្ញុំ ក្នុងការបន្ដកិច្ចខិតខំប្រឹងប្រែង បំពេញភារកិច្ចជូនប្រទេសជាតិមាតុភូមិ ពិសេសក្នុងបរិបទដែល «ទឹក» បាននិងកំពុងក្លាយជារបៀបវារៈដ៏សំខាន់ទាំងក្នុងក្របខ័ណ្ឌកម្ពុជា តំបន់ និងពិភពលោក ទន្ទឹមនឹងការប្រែប្រួលអាកាសធាតុ ដែលបង្កឲ្យមានគ្រោះធម្មជាតិផ្សេងៗ ដូចជាគ្រោះទឹកជំនន់ គ្រោះរាំងស្ងួត កើតឡើងកាន់តែធ្ងន់ធ្ងរទៅៗ ពីមួយឆ្នាំទៅមួយឆ្នាំ»។

លោកថា យោងទៅលើកត្តាភូមិសាស្ត្រ កត្តាអាកាសធាតុ និងកត្តាជាក់ស្តែង បានបង្ហាញថា ព្រះរាជាណាចក្រកម្ពុជា ជាប្រទេសមួយ ដែលសម្បូរទៅដោយធនធានទឹក ទាំងទឹកលើដី និងទឹកក្រោមដី។ ទឹកលើដី ដែលបាន មកពីទន្លេ មេគង្គ ព្រមទាំងបឹងទន្លេសាប ដែលជាបឹងទឹកសាបធំជាងគេនៅអាស៊ីអាគ្នេយ៍ រួមជាមួយនឹងស្ទឹង ព្រែក អូរ ដែលជាដៃនៃបឹងនេះ មិនត្រឹមតែជាប្រភពទឹក ដ៏សំខាន់ប៉ុណ្ណោះទេ តែវាបានក្លាយជាគោលដៅ នៃការប្រើប្រាស់ប្រកបដោយសក្តានុពលច្រើនវិស័យដូចជា វិស័យកសិកម្ម ធនធានជលផលជីវចម្រុះ នាវាចរណ៍ វារីអគ្គសនី អេកូទេសចរណ៍-ល-។

លោក លឹម គានហោ បន្ដថា បើទោះបី ជាកម្ពុជា មានសក្តានុពលធនធានទឹកសម្បូរបែប បែបនេះក្តី ប៉ុន្តែមិនមែនមានន័យថា កម្ពុជា ជាប្រទេសដែលមាន សន្តិសុខទឹករៀងរហូតមកនោះទេ។ ផ្ទុយទៅវិញ សូម្បីតែក្នុងកំឡុងពេល២០ឆ្នាំ កន្លងទៅនេះ ក៏កម្ពុជានៅតែជាប្រទេសប្រឈម នឹងបញ្ហាទឹកស្ទើររៀងរាល់ឆ្នាំ ពោលគឺសម្បូរទឹក រហូតមានពេលខ្លះ បង្កជាជំនន់នៅរដូវវស្សា និងខ្វះខាតទឹកនៅរដូវប្រាំង។

ជាមួយគ្នានោះ រដ្ឋមន្ត្រីក្រសួងធនធានទឹក គាំទ្រអស់ពីដួងចិត្ដដល់រាជបណ្ឌិត្យសភាកម្ពុជា ដើម្បីលើកទឹកចិត្តបន្ថែមទៀត ដល់ស្ថាប័នដ៏សំខាន់របស់ជាតិមួយនេះ ក្នុងគោលដៅពង្រឹងនូវតួនាទី ជាមជ្ឈមណ្ឌលស្រាវជ្រាវវិទ្យាសាស្ត្រ ជាមជ្ឈមណ្ឌលអនុវត្ដផ្សារភ្ជាប់នឹងទ្រឹស្ដី និងជាកន្លែងបណ្ដុះបណ្ដាលធនធានបញ្ញាញាណជាន់ខ្ពស់របស់ជាតិ ឲ្យកាន់តែវឹងមាំថែមទៀត៕