ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា បានបង្ហាញនូវការជឿជាក់ថា ចំណងមិត្តភាពនិងកិច្ចសហប្រតិបត្តិការរវាងកម្ពុជា-ចិន នឹងរួមចំណែកកសាងសហគមន៍ ដែលមានជោគវាសនាល្អប្រសើររួមគ្នាសម្រាប់មនុស្សជាតិទាំងមូលដូចដែលលោកប្រធានាធិបតីចិន ស៊ី ជីនពីង ធ្លាប់បានលើកឡើងកាលពីថ្មីៗនេះ។
ប្រមុខរាជរដ្ឋាភិបាលកម្ពុជា បានថ្លែងបែបនេះ នៅក្នុងពិធីអបអរសាទរខួបអនុស្សាវរីយ៍លើកទី៦០ឆ្នាំ នៃការបង្កើតទំនាក់ទំនងការទូតរវាងកម្ពុជា-ចិន នាល្ងាចថ្ងៃទី២ ខែកក្កដា ឆ្នាំ២០១៨ នៅវិមាន ស៊ីធី ហោស នៃមជ្ឈមណ្ឌលសន្និបាតនិងពិព័រណ៍កោះពេជ្រ។
លោក ស្យុង ព័រ ឯកអគ្គរដ្ឋទូតចិនប្រចាំនៅកម្ពុជា មន្ត្រីជាន់ខ្ពស់រាជរដ្ឋាភិបាលកម្ពុជា ថ្នាក់ដឹកនាំសមាគមកម្ពុជា-ចិន ក៏ដូចជាអ្នកវិនិយោគធំរបស់កម្ពុជា និងចិនជាច្រើនរូបទៀតក៏បានចូលរួមនៅក្នុងកម្មវិធីនេះផងដែរ។
កម្ពុជា និងចិន បានបង្កើតទំនាក់ទំនងការទូតជាផ្លូវការនៅថ្ងៃទី១៩ កក្កដា ១៩៥៨ បន្ទាប់ពីជំនួប ទ្វេភាគីលើកទី ១ រវាងព្រះករុណា ព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ និង លោក ជូ អេនឡាយ អតីតនាយករដ្ឋមន្ត្រីចិនក្នុងអំឡុងពេលចូលរួមសន្និសីទទីក្រុងបានឌុងនៅខែមេសា១៩៥៥ នៅទីក្រុងបានឌុង ប្រទេសឥណ្ឌូណេស៊ី និង ការបំពេញទស្សនកិច្ចទៅវិញទៅមករវាងថ្នាក់ដឹកនាំជាន់ខ្ពស់ នៃប្រទេសទាំងពីរក្នុងអំឡុងឆ្នាំ ១៩៥៦។ ទំនាក់ទំនងមិត្តភាពជាប្រវត្តិសាស្ត្រនេះ បានកសាងឡើងរួមគ្នាដោយព្រះករុណាព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ និងឯកឧត្តមប្រធាន ម៉ៅ សេទុង លោកនាយករដ្ឋមន្ត្រី ជូ អេនឡាយ ព្រមទាំងថ្នាក់ដឹកនាំចិនជំនាន់មុនៗដែលធ្វើឲ្យមានការរីកចម្រើនជាបន្តបន្ទាប់ រហូតក្លាយទៅជាកិច្ចសហប្រតិបត្តិការ ភាពជាដៃគូយុទ្ធសាស្ត្រគ្រប់ជ្រុងជ្រោយនៅ ថ្ងៃទី១៣ ខែធ្នូ ឆ្នាំ២០១០។
សម្តេចតេជោនាយករដ្ឋមន្ត្រីបានមានប្រសាសន៍ថា ក្នុងរយៈពេល ៦០ ឆ្នាំ កន្លងទៅនេះថ្នាក់ដឹកនាំនៃប្រទេសទាំងពីរ តែងតែខិតខំប្រឹងប្រែងរក្សាចំណងមិត្តភាព និងពុះពារឧបសគ្គជាច្រើនដើម្បីដឹកនាំប្រទេស និងប្រជាជនឆ្ពោះទៅកាន់វឌ្ឍនភាព វិបុលភាព និងភាពសុខដុមរមនា។ ទន្ទឹមនេះ ការរីកចម្រើនរបស់ប្រទេសចិនមិនត្រឹមតែបានលើកកម្ពស់ជីវភាពប្រជាជនចិនប៉ុណ្ណោះទេ ប៉ុន្តែថែមទាំងបាននឹងកំពុងចូលរួមចំណែកដល់ការអភិវឌ្ឍសង្គម-សេដ្ឋកិច្ចកម្ពុជា និងបណ្តាប្រទេសក្នុងតំបន់និងក្នុងពិភពលោកទៀតផង។
ជាក់ស្តែងក្នុងក្របខណ្ឌតំបន់ ប្រទេសចិនបានដាក់ចេញនូវគំនិតផ្តួចផ្តើម «ខ្សែក្រវាត់មួយ និងផ្លូវមួយ» បង្កើត «មូលនិធិផ្លូវសូត្រ» និង «ធនាគារវិនិយោគហេដ្ឋារចនាសម្ព័ន្ធឤស៊ី » ដើម្បីពង្រឹងភាពជាដៃគូ និង ជំរុញការអភិវឌ្ឍបែប«ឈ្នះឈ្នះ» រវាងប្រទេសក្នុងរង្វង់តំបន់ខ្សែក្រវាត់ និងផ្លូវសូត្រតាមរយៈកិច្ចសហប្រតិបត្តិការតភ្ជាប់ហេដ្ឋារចនាសម្ព័ន្ធ រូបវន្ត ស្ថាប័ន និង ប្រជាជន វិស័យធុរកិច្ច ហិរញ្ញវត្ថុ វប្បធម៌ និងវិស័យគន្លឹះផ្សេងៗទៀត ដែលកម្ពុជាសូមគាំទ្រគំនិតផ្តួចផ្តើមដ៏មានសារៈសំខាន់នេះ។
សម្តេចតេជោនាយករដ្ឋមន្ត្រីបានមានប្រសាសន៍ថា “ខ្ញុំជឿជាក់ថា ចំណងមិត្តភាព និងកិច្ចសហប្រតិបត្តិការ រវាងប្រទេសយើងទាំងពីរនឹងរួមចំណែកកសាងសហគមន៍ ដែល មានជោគវាសនាល្អប្រសើររួមគ្នាសម្រាប់មនុស្សជាតិទាំងមូល ដូចដែលលោកប្រធានាធិបតីចិន ស៊ី ជីនពីង ធ្លាប់បានលើក ឡើងកាលពីថ្មីៗនេះ”។
សម្តេចតេជោនាយករដ្ឋមន្ត្រីបានបន្តថា ការអញ្ជើញមកបំពេញទស្សនកិច្ចផ្លូវការនិងធ្វើជាសហប្រធាននៃកិច្ចប្រជុំកំពូល មេគង្គ-ឡានឆាង លើកទី២ របស់ លោក លី កឺឈាង នាយករដ្ឋមន្ត្រីចិន នៅរាជធានីភ្នំពេញ នាថ្ងៃទី ១០-១១ ខែមករា កន្លងទៅ គឺជាការបើកឆាកនៃការប្រារព្ធខួប ៦០ ឆ្នាំ នៃទំនាក់ទំនងការទូតកម្ពុជា-ចិន ។ ចាប់ពីដើមឆ្នាំ ២០១៨ កម្ពុជាបានរៀបចំការសម្តែងសិល្បៈចម្រុះកម្ពុជា-ចិន ស្របពេលជាមួយពិធីបុណ្យចូលឆ្នាំចិន ការរៀបចំពិព័រណ៍រូបថត វេទិកាធុរកិច្ចកម្ពុជា-ចិនឆ្នាំ ២០១៨ និងវេទិកាកំពូលទេសចរណ៍កម្ពុជា-ចិនលើកទី ១ និងបន្តមានសកម្មភាពផ្សេងៗទៀតរហូតដល់ចុងឆ្នាំ ដូចជាការផ្លាស់ប្តូរ ទស្សនកិច្ច គ្រប់កម្រិត រួមទាំងការផ្លាស់ប្តូររវាងប្រជាជន និងប្រជាជន យុវជន និង យុវជន ការរៀបចំសិក្ខាសាលាស្តីពីការជំរុញវិស័យទេសចរណ៍ ពាណិជ្ជកម្ម និងវិនិយោគជាដើម។
ចំពោះកិច្ចសហប្រតិបត្តិការសេដ្ឋកិច្ច ប្រទេសចិនជាដៃគូពាណិជ្ជកម្មនិងវិនិយោគិនដ៏ចម្បងរបស់កម្ពុជា។ ទំហំពាណិជ្ជកម្មទ្វេភាគីក្នុងឆ្នាំ២០១៧ មានចំនួន ៥.៥៧៧ លានដុល្លារកើនឡើងជាង ២១,៧% បើធៀបនឹងឆ្នាំ ២០១៦។ ក្នុងឆ្នាំ ២០១៧ ទំហំវិនិយោគចិនសរុបនៅកម្ពុជាឈរលំដាប់លេខ ១ ធៀបនឹងទំហំវិនិយោគទុនពីប្រទេសដទៃទៀត ដែលមានទំហំសរុបប្រមាណ១.៦៤៤ លានដុល្លារ។ លើសពីនេះ ប្រទេសយើងទាំងពីរក៏បានឯកភាពគ្នាជំរុញទំហំពាណិជ្ជកម្មឲ្យកើនឡើងដល់ ៦.០០០ លានដុល្លារ នៅឆ្នាំ២០២០។
ចំពោះវិស័យទេសចរណ៍ មានក្រុមហ៊ុនអាកាសចរណ៍ចំនួន ១៥ កំពុងធ្វើប្រតិបត្តិការហោះហើរទៀងទាត់រវាង កម្ពុជា និង ចិន។ នៅឆ្នាំ២០១៧ ទេសចរចិនមានប្រមាណ ១,២ លាននាក់។ គិតត្រឹមត្រីមាសទី១ ឆ្នាំ ២០១៨ នេះ កម្ពុជាបានទទួលភ្ញៀវទេសចរអន្តរជាតិសរុប ១,៧ លាននាក់ ដែលក្នុងនោះទេសចរចិន មានចំនួនជាង ៥០ ម៉ឺននាក់។
សម្តេចតេជោនាយករដ្ឋមន្ត្រីបានមានប្រសាសន៍ថា កម្ពុជាសូមវាយតម្លៃខ្ពស់ចំពោះរដ្ឋាភិបាលចិនក្នុងការគោរព ឯករាជ្យ អធិបតេយ្យ និង ការចាត់វិធានការនានារបស់រាជរដ្ឋាភិបាលកម្ពុជា ដើម្បីការការពារសន្តិសុខនិងស្ថិរភាពសង្គម។
កម្ពុជាសូមអបអរសាទរចំពោះលទ្ធផលជាវិជ្ជមាន នៃកិច្ចសហប្រតិបត្តិការនិង ផ្លែផ្កាដែលទទួលបាននាពេលកន្លងមកនិងប្តេជ្ញាបន្តលើកកម្ពស់វិសាលភាពនៃកិច្ចទំនាក់ទំនងកិច្ចសហ ប្រតិបត្តិការជាដៃគូយុទ្ធសាស្ត្រគ្រប់ជ្រុងជ្រោយកម្ពុជា-ចិន ឲ្យឈានដល់កម្រិតកាន់តែខ្ពស់ថែមទៀត ដើម្បីផលប្រយោជន៍នៃប្រជាជនយើងទាំងពីរ។
លោក ស្យុង ព័រ ឯកអគ្គរដ្ឋទូតចិនប្រចាំនៅកម្ពុជា បានមានប្រសាសន៍ថា អ្នកទំនងមិត្តភាពចិន-កម្ពុជា មានប្រវត្តិសាស្ត្រនិងប្រពៃណីវប្បធម៌យើងវែងជិតពីរពាន់ឆ្នាំហើយប្រទេសទាំងពីរសុទ្ធតែជាប្រទេស មានប្រវត្តិសាស្ត្រនិងវប្បធម៌រុងរឿងតាំងពីបុរាណសុទ្ធតែជាប្រទេសមានវប្បធម៌ជាច្រើននិងបានកសាងប្រទេសទាំងពីរទៅជាប្រទេសជិតខាងល្អប្រកបដោយភាពស្និទ្ធស្នាលស្មោះត្រង់រវាងគ្នានិងគ្នាទៅវិញទៅមកប្រកបដោយសន្តិភាពព្រមទាំងទទួលយកលក្ខណៈសម្បត្តិរបស់ជនជាតិនីមួយៗ។
ទំនាក់ទំនងរវាងប្រទេសចិននិងប្រទេសកម្ពុជា ត្រូវបានបង្កើតនិងថែទាំយ៉ាងយកចិត្តទុកដាក់ដោយថ្នាក់ដឹកនាំជំនាន់មុននៃប្រទេសទាំងពីរ “នៅពេលយើងផឹកទឹក យើងគិតដល់អ្នកដែលជីកអណ្ដូង”។ ជាមួយនឹងសមិទ្ធិផលនៃទំនាក់ទំនងចិន-កម្ពុជា បច្ចុប្បន្ន យើងមិនគួរភ្លេចគុណូបការៈរបស់លោកប្រធាន ម៉ៅ សេងទុង លោកនាយករដ្ឋមន្ត្រី ជួ អេនទ្បាយព្រះវររាជបិតា នរោត្តមសីហនុ និងមេដឹកនាំផ្សេងទៀតនៃប្រទេសទាំងពីរ ហើយជាច្រើនឆ្នាំមកនេះ សម្តេចនាយករដ្ឋមន្ត្រី ហ៊ុន សែន ក៏បានរួមចំណែកយ៉ាងសំខាន់ក្នុងការធ្វើឲ្យទំនាក់ទំនងចិន-កម្ពុជាកាន់តែរីកចម្រើនឡើងផងដែរ៕
Source: Kampuchea Thmey Daily
0 Comments