ឆ្លងចរន្តអគ្គិសនីឆេះផ្ទះសំអាងការ ឃ្វីនអែសធើរ នៅជាន់ទី៣ ខណៈមេឃ កំពុងភ្លៀងតែពន្លត់ទាន់ពេល

Cambodia News July 03, 2018

ភ្នំពេញ ៖ កុំព្យូទ័រ សាឡុង តុ និងសម្ភារៈមួយចំនួនទៀត ត្រូវបានអគ្គិភ័យឆាបឆេះ ខណៈមេឃកំពុងភ្លៀង ប៉ុន្តែករណីនេះមិនបានឆាបឆេះរាលដាលធ្ងន់ធ្ងរនោះទេ ព្រោះត្រូវបានសមត្ថកិច្ចជួយអន្តរាគមន៍ទាន់ពេល។

ហេតុការណ៍នេះ បង្កការភ្ញាក់ផ្អើលកាលពីវេលាម៉ោង១និង៥០នាទីរសៀល ថ្ងៃទី៣ ខែកក្កដា ឆ្នាំ២០១៨ នៅចំណុចផ្ទះលេខ៤៦ ផ្ទះសំអាងការ ឃ្វីនអែសធើរ នៅជាន់ទី៣ ផ្លូវ១៣៨ ក្រុម២៦ ភូមិ៧ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ។

តាមប្រភព ព័ត៌មានពី លោកវរសេនីយ៍ឯក ព្រហ្ម យ៉ន នាយការិយាល័យ បង្ការ ពន្លត់ អគ្គិភ័យ និង សង្គ្រោះ នៃស្នងការដ្ឋានគរបាលរាជធានីភ្នំពេញ បានអោយដឹងថា នៅមុនពេលកើតហេតុ ម្ចាស់ផ្ទះ ឈ្មោះស្រី បូពារ ភេទប្រុស អាយុ៥៣ឆ្នាំ នៅផ្ទះកើតហេតុជាមួយកូនៗ បើកសំអាងការ នៅផ្ទះជាន់ក្រោម ចំណែកជាន់ទី៣ ដែលឆេះ ជាបន្ទប់ធ្វើការរបស់កូនចាក់សោទុក ខណៈនោះ ក៏បានឆ្លងចរន្តអគ្គិសនី ឆាបឆេះ ឡើងតែម្ដង ហើយបងប្អូនប្រជាពលរដ្ឋរស់នៅក្បែរនោះ បាននាំគ្នាយកបំពង់ ពន្លត់អគ្គិភ័យជួយបាញ់ពន្លត់ តែមិនរលត់។

លោកបានបន្តទៀតថា ពេលទទួលបានសេចក្ដីរាយការណ៍ លោកបានចេញ រថយន្តពន្លត់អគ្គិភ័យចំនួន៤គ្រឿង ចេញជួយអន្តរាគមន៍បាញ់ពន្លត់ទាន់ពេលវេលា មិនបង្កឲ្យមានមនុស្សរងរបួស និងរាលដាលដល់ផ្ទះផ្សេង និងខូចខាតសម្ភារៈច្រើនឡើយ។

សូមបញ្ជាក់ផងដែរថា ខណៈអគ្គិភ័យ កំពុងឆាបឆេះមេឃ ក៏ភ្លៀងខ្លាំងផងដែរ អាជ្ញាធរជំនាញ បានជួយអន្តរាគមន៍បាញ់ពន្លត់ទាំងភ្លៀង រលត់ជាស្ថាពរ។ ក្រោយបញ្ចប់ កម្លាំងនគរបាល បានប្រើប្រាស់រថយន្តពន្លត់អគ្គិភ័យចំនួន១គ្រឿងរលត់តែម្ដង៕