ភ្នំពេញ ៖ នៅវេលាម៉ោង១៥ និង១០នាទី នារសៀលថ្ងៃទី ៣១ ខែ ឧសភា ឆ្នាំ ២០១៨ គណៈបញ្ជាការឯកភាពខណ្ឌមានជ័យ បានចុះបង្ក្រាបមេកត់ឆ្នោតវៀតណាម (កន្ទុយលេខ) មួយទីតាំង ដែលមានលក្ខណៈទ្រង់ទ្រាយធំ ស្ថិតនៅតាមបណ្តោយផ្លូវបេតុង (ចំណុចផ្សារក្រមួន មុខវត្តអង្គពោធិ៍ញ្ញាណ) ភូមិត្នោតជ្រុំ៦ សង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ។
ពាក់ព័ន្ធនឹងសកម្មភាពនេះ អង្គភាពសារព័ត៌មានរបស់យើងខ្ញុំ បានស្នើសុំការបកស្រាយផ្ទាល់ពីលោក ពេជ្រ កែវមុនី អភិបាលខណ្ឌមានជ័យ និងជាប្រធានគណៈបញ្ជាការឯកភាពរដ្ឋបាលខណ្ឌមានជ័យ បានឲ្យដឹងថា ការចុះប្រតិបត្តិការណ៍បង្ក្រាបទីតាំងមួយនេះ គឺយោងតាមប្រភពព័ត៌មានពីមូលដ្ឋានរបស់ប្រជាពលរដ្ឋនៅតំបន់នោះ ក៏ដូចជាការចង្អុលបង្ហាញក្នុងអង្គប្រជុំរបស់គណៈបញ្ជាការឯកភាពរដ្ឋបាលខណ្ឌមានជ័យ និងដោយមានការឯកភាពពីលោក អ៊ុំ សុភក្ត្រ័ ព្រះរាជអាជ្ញារងអមសាលាដំបូងរាជធានីភ្នំពេញ លោក ពេជ្រ កែវមុនី ក៏បានដឹកនាំបញ្ជាឲ្យលោកអភិបាលរងខណ្ឌ ឌី រ័ត្នខេមរុណ ដឹកនាំកម្លាំង សមត្ថកិច្ច និងអាជ្ញាធរសង្កាត់ពាក់ព័ន្ធ ចុះបង្ក្រាបភ្លាមៗ ដោយបានធ្វើការឃាត់ខ្លួនមនុស្សប្រុសស្រីចំនួន០៣នាក់ រួមមាន ៖ ១-ឈ្មោះ ញឹម កុសល ភេទប្រុស អាយុ៤៥ឆ្នាំ ។ ២-ឈ្មោះ សុខ មួយហៀង ភេទស្រី អាយុ៣៥ឆ្នាំ (ជាប្រពន្ធ ញឹម កុសល ខាងលើ) ៣-ឈ្មោះ ណយ ពិសិដ្ឋ ភេទប្រុស អាយុ១៦ឆ្នាំ។
វត្ថុតាងដកហូត រួមមានលុយដុល្លារ, ៣៧៥ដុល្លារ , លុយខ្មែរ7,070,000រៀល, តុ១ , កៅអី២ រួមជាមួយសន្លឹកឆ្នោតវៀតណាមដែលកត់រួចជាច្រើនទៀតផងដែរ។ ជនសង្ស័យ និងវត្ថុតាង ត្រូវបានបញ្ចូនទៅកាន់ប៉ុស្តិ៍រដ្ឋបាលនគរបាល បឹងទំពុនទី២ ដើម្បីបន្តនីតិវិធីច្បាប់។
លោក ពេជ្រ កែវមុនី អភិបាលខណ្ឌ និងជាប្រធានគណៈបញ្ជាការឯកភាពខណ្ឌមានជ័យ បានបញ្ជាក់បន្ថែមថា ទីតាំងមួយនេះ ជាទីតាំងអានាធិបតេយ្យមួយ ដែលផ្គើនទៅនឹងអាជ្ញាធរមូលដ្ឋានម្តងហើយម្តងទៀត បើទោះជាមានការហាមឃាត់ និងណែនាំពីអាជ្ញាធរដែនដីជាច្រើនលើកក៏ដោយ ក៏ពីរនាក់ប្តីប្រពន្ធខាងលើ នៅតែមិនក្រែងញញើតអ្នកជិតខាង និងអាជ្ញាធរឡើយ ហើយនេះ គឺជាលើកទី២ហើយដែលអាជ្ញាធរខណ្ឌមានជ័យបានធ្វើការចាប់ឃាត់ខ្លួនពីបទលួចបង្កើតល្បែងស៊ីសងដោយខុសច្បាប់បែបនេះ ដែលនៅលើកទី១ អាជ្ញាធរខណ្ឌមានជ័យបានចាប់ឃាត់ខ្លួននៅពាក់កណ្តាលឆ្នាំ២០១៧ នៅទីតាំងនេះដដែល និងបានដកហូតលុយដុល្លារជាង៧ម៉ឺនដុល្លារ ដូចនេះសម្រាប់លើកនេះ សង្ឃឹមថាស្ថាប័នមានសមត្ថកិច្ចផ្ទាល់ នឹងយកចិត្តទុកដាក់ខ្ពស់ក្នុងការវិនិច្ឆ័យទោសឲ្យបានតឹងរ៉ឹងបំផុតតាមច្បាប់ជាធរមាន។
ចុងក្រោយលោកក៏បានបញ្ជាក់យ៉ាងច្បាស់ទៀតថា លោកមានយន្តការការងារច្បាស់លាស់ ដោយបានប្រគល់ភារកិច្ចជូនលោក ឌី រ័ត្នខេមរុណ អភិបាលរងខណ្ឌ ឲ្យទទួលខុសត្រូវផ្ទាល់លើការងារល្បែងស៊ីសងនេះ ដូចនេះវាមិនពិបាកឡើយសម្រាប់លោកក្នុងភាពទំនួលខុសត្រូវចំពោះការងារនេះ ហើយលោកកំពុងតែដឹកនាំឲ្យលោកអភិបាលរងរបស់លោករូបនោះ បន្តការអង្កេតកំណត់មុខសញ្ញានៅទីតាំងមួយចំនួនទៀតតាមរយៈប្រជាពលរដ្ឋ ដែលបានផ្តល់ព័ត៌មានជូនលោក ដើម្បីឆ្លើយតបទៅនឹងសំណូមពររបស់ពលរដ្ឋវិញឲ្យខានតែបាន៕
Source: Kampuchea Thmey Daily
0 Comments