ភ្នំពេញ ៖ រាជរដ្ឋាភិបាលកម្ពុជាបានកែសម្រួលច្បាប់បេឡាជាតិរបបសន្តិសុខសង្គមដែលហៅកាត់ថាប.ស. សដើម្បីកំណត់ឲ្យកម្មករអាចចូលនិវត្តន៍បាននៅអាយុ៦០ឆ្នាំដើម្បីទ្រទ្រង់ដល់ដល់ជីវភាពរស់នៅឲ្យកាន់តែល្អប្រសើរនៅពេលដល់អាយុចូលនិវត្តន៍។
ថ្លែងនៅក្នុងសិក្ខាសាលាពិគ្រោះយោបល់លើសេចក្តីព្រាងច្បាប់ស្តីពីរបបសន្តិសុខសង្គមកាលពីព្រឹកថ្ងៃទី៣១ខែឧសភាឆ្នាំ២០១៨លោក អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជានាយកបេ ឡាជាតិរបបសន្តិសុខសង្គមបានមានប្រសាសន៍ថា សិក្ខាសាលានេះធ្វើឡើងក្នុងគោលបំណងដើម្បី ពិ គ្រោះយោបល់ និងប្រមូលធាតុចូលឲ្យបានគ្រប់ជ្រុងជ្រោយ ក្នុងន័យបំពេញបន្ថែមចំណុចណាមួយនៃសេចក្តីព្រាងច្បាប់ស្តីពីរបបសន្តិសុខសង្គម ឲ្យស្របទៅតាមស្ថានភាពសង្គម និងសេដ្ឋកិច្ចដែលកំពុងអភិវឌ្ឍន៍ឆ្ពោះទៅមុខយ៉ាងស្វាហាប់ប្រកបដោយថាមភាព ក្រោមការដឹកនាំដ៏ឈ្លាសវៃ ប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ជាមួយគ្នានេះដែរ លោក អ៊ុក សមវិទ្យាបានបន្តថា ច្បាប់នេះមានវិសាលភាពអនុវត្តចំពោះ បុគ្គលដែលស្ថិតក្នុងវិស័យសាធារណៈ ជនទាំងឡាយដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ ដោយរួមបញ្ចូលបុគ្គលិកធ្វើការតាមផ្លូវអាកាស និងនាវាសមុទ្រ ព្រមទាំងអ្នកបម្រើតាមផ្ទះ និងបុគ្គលស្វ័យនិយោជន៍។
លោកបានបន្ថែមថា កម្មករនិយោជិតដែលមានលទ្ធភាពទទួលបានរបបសោធន៍និវត្តនេះបានលុះត្រាតែមានគ្រប់លក្ខណៈសម្បត្តិដោយបានចុះបញ្ជីនៅបេឡាជាតិរបបសន្តិសុខសង្គម មានអតីតភាពការងារនិងបានបង់វិភាគទានជាដើម។
លោកបានបញ្ជាក់ថា «នៅក្នុងសេចក្តីព្រាងច្បាប់នេះយើងអត់មានកំណត់អតីតភាពការងារដូរច្បាប់ចាស់រហូតដល់២០ឆ្នាំនោះទេ គឺកម្មករនិយោជិតធ្វើការរយៈពេល១២ខែហើយបានបង់វិភាគទានទៅអាចទទួលបានប្រាក់សោធន៍និវត្តន៍បានហើយ នៅពេលដែលដល់អាយុ៦០ឆ្នាំ»។
លោក អ៊ុក សមវិទ្យាបានឲ្យដឹងទៀតថា ពេលបង់បាន១២ខែហើយបុគ្គលិកកម្មករនិយោជិតអាចទៅធ្វើការនៅកន្លែងណាមួយក៏បានដែរ គឺមានឈ្មោះរហូតដល់ចូលនិវត្តន៍តែម្តងគឺថាអតីតភាពការងាររបស់គាត់មិនមានការបាត់បង់ទេហើយប្រព័ន្ធនេះអាចផ្ទេរពីវិស័យឯកជនទៅវិស័យសាធារណៈពីសាធារណៈទៅឯកជនបានដែរ។
លោកបានបន្តទៀតថា ក្នុងករណីបង់បាន១២ខែហើយអត់ការងារធ្វើយើងអាចឲ្យគាត់បន្តបង់ប្រាក់វិភាគទានបានដោយមិនប្រកាន់ថាគាត់មានការងារធ្វើឬអត់នោះទេ។
លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថាដោយអនុវត្តតាមអនុសាសន៍ដ៏ខ្ពង់ខ្ពស់ សម្តេចតេជោ ហ៊ុន សែន និងក្របខណ្ឌគោលនយោបាយជាតិគាំពារសង្គម ២០១៦-២០២៥ ក្រសួងការងារ និងបណ្តុះបណ្តាលវិជ្ជាជីវៈ បានរៀបចំសេចក្តីព្រាងច្បាប់នេះឡើង ដើម្បីផ្តល់នូវរបបសន្តិសុខសង្គមរួមមាន ផ្នែកប្រាក់សោធន ផ្នែកថែទាំសុខភាព ផ្នែកហានិភ័យការងារ និងផ្នែកនីកម្មភាពការងារ។ ក្នុងនោះ ផ្នែកនីកម្មភាពការងារ គឺជាសមិទ្ធផលដ៏ថ្មីស្រឡាងមួយ ដែលពុំធ្លាប់មាននៅក្នុងប្រវត្តិសាស្ត្រ នៃព្រះរាជាណាចក្រកម្ពុជា។
លោកបណ្ឌិតរដ្ឋមន្ត្រី បានបន្តថា សេចក្តីព្រាងច្បាប់នេះ ពិតជាឧបករណ៍គតិយុត្តិដ៏សំខាន់មិនអាចខ្វះបានក្នុងការអនុវត្តក្របខ័ណ្ឌគោលនយោបាយជាតិគាំពារសង្គម។ដូចនេះថ្នាក់ដឹកនាំ នៃ ប.ស.ស ត្រូវខិតខំអនុវត្តឲ្យបានល្អប្រសើរថែមទៀត លើសេចក្តីព្រាងច្បាប់ស្តីពីរបបសន្តិសុខសង្គម ក៏ដូចជាព្រះរាជក្រឹត្យ អនុក្រឹត្យ និងលិខិតបទដ្ឋានគតិយុត្តិនានាពាក់ព័ន្ធ ដើម្បីឲ្យការអនុវត្តច្បាប់ថ្មីនេះប្រកបដោយប្រសិទ្ធភាព និងតម្លាភាពបំផុត។
ចំណែកលោកកាំងម៉ូនីកា អគ្គនាយករងសមាគមរោងចក្រកាត់ដេរកម្ពុជាមានប្រសាសន៍ថា គាំទ្រព្រោះជាគោលការណ៍វាជាគោលនយោបាយមួយដែលល្អបានជួយទ្រទ្រង់ដល់ជីវភាពប្រចាំថ្ងៃរបស់កម្មករនិយោជិតបានល្អប្រសើរ។
ប៉ុន្តែយ៉ាងណាក៏ដោយលោកបានស្នើថា «ការងារនេះត្រូវធ្វើយ៉ាងមិចត្រួតពិនិត្យមើលទៅលើនិរន្តរភាពនៃការអនុវត្តគោលនយោបាយប្រព័ន្ធគ្រប់គ្រងរួមទាំងប្រព័ន្ធគ្រប់គ្រងថវិកា ទឹកប្រាក់នៅក្នុងមូលនិធិ។ អីចឹងថ្ងៃនេះសូមថ្លែងអំណរគុណដល់រាជរដ្ឋាភិបាល ដែលបានផ្តល់ឱកាសដល់វិស័យឯកជនផ្តល់ជាធាតុចូលដើម្បីឲ្យទៅថ្ងៃអនាគតទៅអនុវត្តដោយប្រសិទ្ធភាពនិងមាននិរន្តរភាពព្រោះថាប្រព័ន្ធនេះត្រូវការអនុវត្តក្នុងរយៈពេលវែងរាប់រយឆ្នាំមិនមែនធ្វើតែបួនដប់ឆ្នាំចប់នោះទេ»។
លោកអ៊ុក សមវិទ្យា បានឲ្យដឹងទៀតថា ច្បាប់នេះ គ្រោងនឹងបញ្ចប់នៅចុងឆ្នាំនេះហើយនឹងដាក់ឲ្យអនុវត្តនៅឆ្នាំ២០១៩ខាងមុខនេះតាមអនុសាសន៍របស់ប្រមុខរាជរដ្ឋាភិបាលកម្ពុជាសម្តេចនាយករដ្ឋមន្ត្រីហ៊ុនសែន ដើម្បីជួយលើកកម្ពស់ដល់ការរស់នៅរបស់កម្មករនិយោជិតឲ្យកាន់តែប្រសើរឡើងនៅពេលដែលពួកគាត់ដល់អាយុ៦០ឆ្នាំដែលត្រូវចូលនិវត្តន៍។
គួរបញ្ជាក់ថា សេចក្តីព្រាងច្បាប់នេះ មាន១១ជំពូកស្មើនឹងជាង១០០មាត្រាដែលមានចែងមានបួនផ្នែកធំៗរួមមានផ្នែកប្រាក់សោធន ផ្នែកថែទាំសុខភាព ផ្នែកហានិភ័យការងារ និងផ្នែកនីកម្មភាពការងារ៕
Source: Kampuchea Thmey Daily
0 Comments