សៀមរាប ៖ នគរបាលក្រុងសៀមរាប បានឲ្យដឹងថា ពាក់ព័ន្ធ ករណីប្រទះឃើញសាកសពទារក ដែលទើបនឹងកើត ភេទប្រុស រុំក្នុងក្រមាពោះគោ យកផ្លុងចោលនៅវេលាម៉ោង ៧និង២០នាទីព្រឹកថ្ងៃទី២៨ ខែមីនា ឆ្នាំ២០១៩ ចំណុចមាត់ស្ទឹងសៀមរាប ទល់មុខ អនុវិទ្យាល័យព្រះឥន្ទកោសា ភូមិបឹងដូនប៉ា សង្កាត់ស្លក្រាម ក្រុងសៀមរាប ខេត្តសៀមរាប។ ត្រូវបានបុគ្គលិកថែសួន ឈ្មោះ ពូន ពៃ ភេទប្រុស អាយុ២៨ឆ្នាំ ប្រទះឃើញពេលខ្លួនចុះប្រមូលសំរាម តាមមាត់ស្ទឹង ហើយរាយការណ៍ជូនសមត្ថកិច្ចតាមដានតែម្តង។
បន្ទាប់ពីទទួលសេចក្តីរាយការណ៍ កម្លាំងនគរបាលប៉ុស្តិ៍រដ្ឋបាលសង្កាត់ស្លក្រាម និងកម្លាំងនគរបាលផ្នែកព្រហ្មទណ្ឌក្រុងសៀមរាបសហការជាមួយ កម្លាំងនគរបាលការិយាល័យបច្ចេកទេសខេត្តសៀមរាប បានចុះទៅដល់កន្លែងប្រទះឃើញសាកសពទារកខាងលើ និងបានធ្វើការពិនិត្យកោសល្យវិច័យ ជាលទ្ធផលពុំមានស្លាកស្នាមលើដងខ្លួនឡើយ។ បច្ចុប្បន្នសពទារក ខាងលើនេះ បន្ទាប់ពិនិត្យរួចហើយ ត្រូវបាននាំទៅបញ្ចុះទុកនៅបរិវេណវត្តព្រះឥន្ទកោសីយ៍ ក្នុងក្រុងសៀមរាប។
យោងតាមការ យកចិត្តទុកដាក់ ពីលោកវរសេនីយ៍ ឯកណុប សារ៉ាក់ អធិការនៃអធិការដ្ឋាននគរបាលក្រុងសៀមរាប ដោយមានការដឹកនាំស្រាវជ្រាវពីលោកវរសេនីយ៍ទោ នួន ស័ក្តិចំរើនរិទ្ធ អធិការរងទទួលផ្នែកព្រហ្មទណ្ឌ ជាលទ្ធផល នៃការស្រាវជ្រាវយើងបានរកឃើញមូលហេតុពិតដូចខាងក្រោម៖
សពទារកនេះ ជាកូនរបស់ឈ្មោះ ជា ម៉េងឡុង ភេទប្រុស អាយុ២៥ឆ្នាំ ប្រពន្ធឈ្មោះ សេង សៀវម៉ី អាយុ១៨ឆ្នាំ រស់នៅភូមិសូភី ឃុំកំពង់ស្វាយ ស្រុកសិរីសោភ័ណ្ឌ ខេត្តបន្ទាយមានជ័យ។
មូលហេតុកាលពីថ្ងៃទី ២៥ ខែមីនាឆ្នាំ២០១៩ ប្ដីប្រពន្ធទាំងពីរ ខាងលើនេះ បានធ្វើដំណើរមក ក្រុងសៀមរាប ដើម្បីចូលសម្រាលកូន នៅក្នុងមន្ទីរពេទ្យគន្ធបុប្ផា លុះដល់វេលាម៉ោង៣ព្រឹកទៀបភ្លឺ ថ្ងៃទី២៧ ខែមីនា ឆ្នាំ២០១៩ ឈ្មោះ សេង សៀវម៉ី អាយុ១៨ឆ្នាំ បានសម្រាលកូនបាន កូនប្រុសចំនួន០២នាក់ (ភ្លោះ) តែទារកទាំងពីរនាក់នេះ មានសុខភាពខ្សោយ ទោះបីមានការប្រឹងប្រែងយកទារក ទៅចិញ្ចឹមក្នុងកែវ ដើម្បីសង្គ្រោះ ពីក្រុមគ្រូពេទ្យ ក៏មិនអាចសង្គ្រោះទារកម្នាក់ដែលជាកូនទីពីរបានដែរ ទារកនោះបានស្លាប់ទៅវិញ។ ក្រោយមកឈ្មោះ ជា ម៉េងឡុង បានសុំការអនុញ្ញាតពីក្រុមគ្រូពេទ្យ យកសពកូន ដោយអះអាងថាយកទៅបញ្ចុះនៅវត្ត លុះដល់វេលាម៉ោង២៤ឈានចូលដល់ថ្ងៃទី២៨ ខែមីនាឆ្នាំ២០១៩ ឈ្មោះ ជា ម៉េងឡុង បែរជាយកកញ្ចប់ដែលមានសពកូន នៅខាងក្នុងនោះ ទៅទុកចោល នៅខាងមុខវត្តព្រះឥន្ទកោសា ចំណុចមាត់ទឹកស្ទឹងខាងកើត ភូមិបឹងដូនប៉ា សង្កាត់ស្លក្រាម ក្រុងសៀមរាប ខេត្តសៀមរាប បង្កឲ្យមានការភ្ញាក់ផ្អើលតែម្តង។
ចំណែកក្រុមគ្រូពេទ្យ នៅក្នុងមន្ទីរពេទ្យគន្ធបុប្ផា ក៏បានបញ្ជាក់ ប្រាប់កម្លាំងនគរបាល ថាទារករបស់ប្តីប្រពន្ធ ពីរនាក់ខាងលើនេះ ពិតជាបានស្លាប់ ដោយសារ កើតមិនគ្រប់ខែនិងសុខភាពខ្សោយ ពិតមែន(៧ខែ )។
អាស្រ័យហេតុនេះ សូមជម្រាបជូនបងប្អូនប្រជាពលរដ្ឋ ដែលប្រទះឃើញសពទារកនេះ កាលពីព្រឹកថ្ងៃទី២៨ មេត្តាជ្រាបថា ករណីនេះមិនជាករណីឃាតកម្មនោះឡើយ និងសូមជ្រាបជាព័ត៌មានផងចុះ៕
Source: Kampuchea Thmey Daily
0 Comments