សៀមរាប ៖ លោកប៉ាន សូរស័ក្តិ រដ្ឋលេខាធិការក្រសួងពាណិជ្ជកម្ម បានថ្លែងថា ការរៀបចំដាក់តាំងបង្ហាញផលិតផលបន្លែ ផ្លែឈើកម្ពុជា លើកទី៧ ឆ្នាំ២០១៥ នៅក្រុងសៀមរាប គឺជាការឆ្លុះបញ្ចាំងឲ្យឃើញអំពីការខិតខំប្រឹងប្រែងរបស់ក្រសួងស្ថាប័ន អាជ្ញាធរដែនដី និងដៃគូអភិវឌ្ឍន៍នានា ដូចជាអង្គការ GRET ,អង្គការAGRISUDនិងគម្រោងកម្ពុជា HARVESTប្រចាំខេត្តសៀមរាប ក្នុងការជំរុញនិងលើកកម្ពស់សេដ្ឋកិច្ចជនបទ ឲ្យមានលទ្ធភាព តភ្ជាប់ បណ្តាញទំនាក់ទំនងពីជនបទទៅកាន់ទីប្រជុំជន ក្នុងការផ្លាស់ប្ដូរទំនិញ ឬក៏ ផ្លាស់ប្ដូរផលិតផលគ្នាទៅវិញទៅមក។
លោកបញ្ជាក់ថា សកម្មភាពនេះ បានជួយទ្រទ្រង់ផលិតផលបន្លែ និងផ្លែឈើកម្ពុជា ដែលបានផលិតឡើងដោយអនុលោមតាមស្តង់ដារបច្ចេកទេសកសិកម្មត្រឹមត្រូវ ឲ្យមានលទ្ធភាពធ្វើចរាចរណ៍ទូលំទូលាយ និងជ្រៀតចូលទីផ្សារក្នុងស្រុកបានច្រើន ដើម្បីជំនួសការនាំចូលបន្លែ ផ្លែឈើពីក្រៅប្រទេស ជាបណ្តើរៗ ជាពិសេសគឺដើម្បីឲ្យកសិករ ផលិតករកម្ពុជា បានទទួលនូវភាពម្ចាស់ការ និងបានដើរតួនាទីជាអ្នកផលិតនិងជាអ្នកផ្គត់ផ្គង់បន្លែ ផ្លែឈើខ្មែរ បានទូលំទូលាយនិងមាននិរន្តរភាព ដល់អ្នកប្រើប្រាស់គ្រប់មជ្ឈដ្ឋាន មិនថានៅទីប្រជុំជន ទីផ្សារសាធារណៈ ភោជនីយដ្ឋាន សណ្ឋាគារ ឬ ផ្សារទំនើបនោះឡើយ។
ការដាក់តាំងបង្ហាញផលិតផលបន្លែ ផ្លែឈើខ្មែរលើកទី៧ នៅក្រុងសៀមរាប បានធ្វើឡើងនៅល្ងាចថ្ងៃទី០៤ ខែធ្នូ នៅលើសួនច្បារដងស្ទឹងសៀមរាប។ ការដាក់តាំងបង្ហាញផលិតផលបន្លែ ផ្លែឈើខ្មែរនេះ គឺមានការចូលរួមផលិតករ សេវាករកសិករខ្មែរ ដែលជាម្ចាស់កសិដ្ឋានអង្គការអភិវឌ្ឍន៍កសិកម្មក្នុងស្រុក ក្រុមហ៊ុននិងសមាគមកសិកម្មមួយចំនួន ដែលមកពីរាជធានីភ្នំពេញ ខេត្តពោធិ៍សាត់ មណ្ឌលគីរី សៀមរាប និងខេត្តកំពង់ស្ពឺ សរុបមានចំនួន ៣០ ស្តង់។
សម្រាប់វត្តមានរបស់សមាគមចុងភៅកម្ពុជា នៅក្នុងពិធីតាំងបង្ហាញផលិតផលបន្លែនោះ បាននាំមកនូវកម្មវិធីប្រឡងធ្វើម្ហូប ក្រោមប្រធានបទ ខ្ទះឆាសៀមរាប ។ ប្រធានបទនេះ គឺចង់ង្ហាញអំពីសុវត្ថិភាពម្ហូបអាហារ ដោយនាំយកបន្លែគ្មានជាតិគីមី ពីកសិដ្ឋានមកកាន់ខ្ទះឆា ក្រោមស្នាដៃចុងភៅនៅក្នុងក្រុងទេសចរណ៍អង្គរសៀមរាប ដែលពោរពេញដោយមនសិការ ( រសជាតិអាហារនៃសុខភាព ) ។ លោក ឡុង បូរ៉ា អនុប្រធានសមាគមចុងភៅកម្ពុជា បានថ្លែងថា បច្ចុប្បន្ននេះ សមាគមចុងភៅកម្ពុជា គឺជាអតិថិជនរបស់កសិករខ្មែរ៕
ក្រសួងពាណិជ្ជកម្ម ជំរុញ ឲ្យមានការគាំទ្រផលិតផលបន្លែ ផ្លែឈើខ្មែរ ជំនួសការនាំចូលផលិតផលបន្លែផ្លែឈើពីខាងក្រៅប្រទេស
0 Comments