ស្ទឹងត្រែង ៖ ក្នុងសិក្ខាសាលាស្តីពីទឹកសុវត្ថិភាព នៅខេត្តស្ទឹងត្រែងថ្ងៃទី៥ ខែធ្នូនេះ អាជ្ញាធរខេត្តស្ទឹងត្រែងនិង អង្គការ ស៊ី ស៊ី ឌីជាដៃគូអភិវឌ្ឍន៍ បានលើកគម្រោងរៀបចំផ្តល់សេវាទឹកស្អាត ហៅថា(ទឹកសុវត្ថិភាព)ឲ្យប្រជាពលរដ្ឋបានប្រើប្រាស់ទៅតាមគ្រួសារ ក៏ដូចជាសហគមន៍នៅទីជនបទដើម្បី លើកកម្ពស់សុខភាព និងបង្ការកុំឲ្យ កើតមានជំងឺឆ្លងនៅរដូវប្រាំងនេះ។
លោកហ៊ុំ សាគន្ធ នាយកប្រតិបត្តិអង្គការស៊ី ស៊ី ឌីបានបញ្ជាក់ថា៖ ប្រជាពលរដ្ឋនៅតាមទីជនបទពុំទាន់មានទឹកសុវត្ថិភាពប្រើប្រាស់គ្រប់គ្រាន់នៅឡើយ ដែលធ្វើឲ្យជីវិតរស់នៅរបស់ពួកគាត់ ជួបនូវបញ្ហាប្រឈម ដូចជាកោសិកាមិនលូតលាស់ កើតជំងឺឆ្លងរាករូសខាតបង់ ថវិកាសម្រាប់ព្យាបាលជម្ងឺ បាត់បង់ឱកាសការងារ កូនចៅខកខានរៀនសូត្រជាដើម។ លោកបានស្នើឲ្យប្រជាពលរដ្ឋគ្រប់ក្រុមគ្រួសារត្រូវ រួមគ្នាគិតពីសុខភាពរស់នៅជាចម្បង។
លោកបានអះអាងថា គម្រោងរៀបចំឲ្យមានបណ្ដាញទឹកស្អាត នៅតាមសហគមន៍ និងគ្រួសារនេះ លោកនឹងប្រឹងប្រែងរកដៃគូផ្សេងៗទៀត មកជួយទៅតាមតំបន់គោលដៅ ដែលគ្មានទឹកសុវត្ថិភាពប្រើប្រាស់ យើងស្វះស្វែងដើម្បីរកដៃគូរល្អៗ ដើម្បីយកមកជួយអភិវឌ្ឍន៍សហគមន៍ ដូចជាកាសាងសង់ស្ថានីយផលិតទឹកនៅតាមឃុំ តាមសហគមន៍តាមខេត្ត ដែលតំបន់ណាមិនមានទឹកសុទ្ធ ដទៃទៅដល់មិនមានទឹកសុវត្ថិភាពទៅដល់ គឺថាឧបករណ៍របស់យើងអាចទៅដល់ទីនោះ អញ្ចឹងសូមបងប្អូនស្វែងយល់អំពីរឿងទឹកនេះឬឧបករណ៍ផលិតទឹកនេះចុះ ដើម្បីធ្វើយ៉ាងណាជួយដល់សុខភាពគ្រួសារ ជួយដល់ហគមន៍ប្រជាពលរដ្ឋ យើងហើយហ្នឹងអាចជួយរកចំណូលឲ្យយើងបានផងដែរ។
លោកជា ថាវរិទ្ធ អភិបាលរងខេត្តស្ទឹងត្រែងមានប្រសាសន៍ថា យន្តការនេះក៏ដូចជាគោលនយោបាយរបស់រាជរដ្ឋាភិបាលដែរ ហើយ អាជ្ញាធរខេត្តកំពុងប្រឹងប្រែងរៀបចំ ផ្តល់អណ្តូងទឹកស្អាតទៅតាមតំបន់ដែលប្រជាពលរដ្ឋខ្វះខាតទឹកប្រើប្រាស់ដែលកន្លងមកសម្រេចបានចំនួន១០រួចមកហើយ។
លោកបន្តថា អាជ្ញាធរគាំទ្រគម្រោងរបស់អង្គការស៊ី ស៊ីឌីដៃគូអភិវឌ្ឍន៍ជួយផ្នែកទឹកស្អាតនេះហើយឲ្យអង្គការនេះស្នើឲ្យចុះទៅពិនិត្យជាក់ស្តែងដល់មូលដ្ឋានរស់នៅរបស់ប្រជាពលរដ្ឋដើម្បីរៀបចំគម្រោងអភិវឌ្ឍន៍ស្ថានីយទឹកស្អាតឲ្យបានឆាប់ទៅតាមផែនការ។
លោកព្រំ យ៉ាតំណាងឲ្យប្រជាពលរដ្ឋនៅឃុំអន្លង់ជ្រៃបានទទួលស្គាល់ថា ប្រជាពលរដ្ឋនៅតាមជនបទពិតជានៅប្រើប្រាស់ទឹកអូរ ស្ទឹង បឹងបួ គ្មានអនាម័យនៅឡើយ ដោយសារ ពួកគាត់ពុំទាន់មានលទ្ធភាពជីកអណ្តូងទឹកស្អាតប្រើប្រាស់នៅតាមផ្ទះ។
លោកសាទរចំពោះការរៀបចំបង្កើតឲ្យមានប្រព័ន្ធទឹកស្អាត ទៅដល់មូលដ្ឋានពីព្រោះនេះជាគោលបំណងដែលប្រជាពលរដ្ឋចង់បានគ្រប់ៗគ្នា។
សូមបញ្ជាក់ថា អាជ្ញាធរ ខេត្តស្ទឹងត្រែង និងមន្ទីរអភិវឌ្ឍន៍បទខេត្តបង្កើតស្ថានីយទឹកស្អាតបានចំនួន៤កន្លែងហើយតែស្ថានីយនេះ នៅមិនទាន់ឆ្លើយតបទៅនឹងតម្រូវការប្រើប្រាស់របស់ប្រជាពលរដ្ឋនៅឡើយទេ៕
អាជ្ញាធរខេត្តស្ទឹងត្រែង និងអង្គការ ដៃគូអភិវឌ្ឍន៍ គ្រោងរៀបចំឲ្យមានស្ថានីយទឹកស្អាត នៅជនបទ
0 Comments