រដ្ឋបាលខណ្ឌដូនពេញ សូមអធ្យាស្រ័យចំពោះការកកស្ទះចរាចរខ្លះក្នុងការជួសជុលលូ ដែលបាក់បែក

Cambodia News June 05, 2018

ភ្នំពេញ ៖ រដ្ឋបាលខណ្ឌដូនពេញ សូមធ្វើការអធ្យាស្រ័យចំពោះបងប្អូនប្រជាពលរដ្ឋ អ្នកដំណើរឆ្លងកាត់មហាវិថីព្រះនរោត្តមទាំងអស់ ដោយសាររយៈពេល៣ថ្ងៃកន្លងមកនេះ, រដ្ឋបាលខណ្ឌ បានធ្វើការហ៊ុមព័ទ្ធការដ្ឋាននៅលើកំណាត់មហាវិថីព្រះនរោត្តមមួយភាគ ដើម្បីផ្លាស់ប្ដូរបំពង់លូ ដែលបាក់ស្រុត និងអ៊ុតកៅស៊ូឡើងវិញ ជាហេតុធ្វើឲ្យទ្រូងផ្លូវរួមតូចចង្អៀតបន្តិច ពិបាកដល់បងប្អូនធ្វើដំណើរឆ្លងកាត់។

ប៉ុន្តែនៅថ្ងៃទី០៤ ខែមិថុនា ឆ្នាំ២០១៨ វេលាម៉ោង ១៧និង៣០នាទីលោកសុខ ពេញវុធ អភិបាលខណ្ឌដូនពេញបានដឹកនាំកម្លាំងជំនាញចុះធ្វើការផ្លាស់ប្ដូរបំពង់លូ និងអ៊ុតកៅស៊ូបានរួចរាល់ជាស្ថាពរហើយ គឺពុំមានការហ៊ុមព័ទ្ធការដ្ឋានទៀតឡើយ។

ដូច្នេះហើយរដ្ឋបាលខណ្ឌដូនពេញ សូមគោរពថ្លែងអំណរគុណយ៉ាងជ្រាលជ្រៅបំផុតចំពោះបងប្អូនប្រជាពលរដ្ឋទាំងអស់ដែលបានយោគយល់ អធ្យាស្រ័យ និង សូមជូនពរបងប្អូនប្រជាពលរដ្ឋទាំងអស់ សូមជួបតែសេចក្តីសុខ សុភមង្គល រកទទួលទានមានបាន និងជួបតែសេចក្តីសុខសុវត្ថិភាពគ្រប់ពេលវេលា។

គួររំលឹកថា នៅថ្ងៃទី០៣ ខែមិថុនា ឆ្នាំ២០១៨ លោកសុខ ពេញវុធ អភិបាល នៃគណៈអភិបាលខណ្ឌដូនពេញ បានចុះការត្រួតពិនិត្យការដ្ឋាន ជួសជុល និង ប្តូរបំពង់លូកាត់ទទឹងមហាវិថីព្រះនរោត្តម ប្រវែង៤ម ដែលបានបាក់ស្រុត និងពុកផុយ បណ្តាលអោយស្ទះលូហៀរទឹកមកលើទ្រូងថ្នល់ តែឥឡូវបានជួសជុលជាស្ថាពរហើយ៕