ភ្នំពេញ ៖ ចៅ ផលឌឿ អ្នកប្រដាល់ក្លិបសំរោងកោងកីឡាខេត្តបាត់ដំបង ត្រូវគេផ្គូផ្គងឲ្យជួបប្រកួតជាមួយ ថៃ ប៊ុនហាន អ្នកប្រដាល់ក្លិបឫទ្ធីពោធិសែនជ័យ នារសៀលថ្ងៃសៅរ៍ ថ្ងៃទី០៧ ខែកុម្ភៈ ឆ្នាំ២០១៥នេះ នៅលើសង្វៀនបាយ័នស្ទឹងមានជ័យ។
នេះជាការជួបគ្នាលើកដំបូងហើយសម្រាប់ពួកគេទាំងពីរនាក់នេះ។ តាមពិតពីមុននោះ ថៃ ប៊ុនហាន ពុំមែនជាដៃគូប្រកួតរបស់ ចៅ ផលឌឿទេ ដោយសារតែកម្រិតសមត្ថភាពខុសគ្នា តែពេលនេះ ថៃ ប៊ុនហាន គេមានការឈានឡើងហើយ។ ថៃ ប៊ុនហាន ជាម្ចាស់ខ្សែក្រវាត់ទម្ងន់៦៥គីឡូក្រាម បន្ទាប់ពីវាយឈ្នះ ធា នុរាជ ក្លិបពោធិជ័យកីឡាយ៉ាងត្រដាបត្រដួសនោះ។ ទោះជាម្ចាស់ខ្សែក្រវាត់ក្តី ប៊ុនហាន ក៏ពិបាកនឹងឈ្នះ ចៅ ផលឌឿ ដែរ នៅក្នុងការជួបគ្នានេះ។ ប៊ុនហាន វ៉ៃខ្លាំង ហើយក៏វាយរំលោភខ្លាំងណាស់ដែរ តែគ្មានបច្ចេកទេសនោះទេ គឺវាយតាមកម្លាំងបាយ និងតាមលក្ខណៈផ្សងព្រេងប៉ុណ្ណោះ។ ការប្រកួតចុងក្រោយ ប៊ុនហាន វាយចាញ់ ថៃ ដោយពិន្ទុដាច់តែម្តង។
ចំណែក ចៅ ផលឌឿ គេជាអ្នកប្រដាល់ដែលវ៉ៃខ្លាំងនិងកម្រោលដូច ថៃ ប៊ុនហាន ដែរ តែគេមានតិចនិកប្រកួតល្អជាង។ កណ្ដាប់ដៃរបស់ ផលឌឿ រហ័ស លឿន និងខ្លាំងថែមទៀត។ ការប្រកួតចុងក្រោយរបស់ ផលឌឿ គេវាយឈ្នះពិន្ទុដាច់លើ ម៉ូ រដ្ឋា អ្នកប្រដាល់ក្លិបព្រៃទទឹងខេត្តបាត់ដំបង។
ទោះជាយ៉ាងណារវាង ចៅ ផលឌឿ និង ថៃ ប៊ុនហាន ជួបគ្នានេះ ថ្វីត្បិតតែពុំមាននរណាហ៊ានទស្សន៍ទាយ ប៉ុន្តែក្រុមអ្នកវិភាគប្រដាល់ក្នុងស្រុក ពួកគេមានជំនឿថា ថៃ ប៊ុនហាន អាចជាអ្នកឈ្នះសម្រាប់ការប្រកួតនេះ។
វ៉ែន សុភ័ក្រ អ្នកប្រដាល់ក្លិបកងពលទ័ពឆ័ត្រយោង៩១១ នឹងជួបប្រកួតជាមួយ ចាន់ ប៊ុនហឿនអ្នកប្រដាល់ជើងថ្មី ក្លិបនិរោធមានជ័យ។ ពួកគេពីរនាក់នេះពុំដែលជួបគ្នាទេកន្លងមក។ ទោះជាយ៉ាងនេះក្តី សម្រាប់ការជួបគ្នានេះ គេមិនមានជំនឿថា ប៊ុនហឿន ឈ្នះ សុភ័ក្រ នោះឡើយ។
វ៉ែន សុភ័ក្រ ថ្វីត្បិតតែគេជាអ្នកប្រដាល់ស្រករក្រោយ ប៉ុន្តែគេមានស្នៀតប្រដាល់ល្អ និងវាយមានផ្លែល្អថែមទៀត។ ចិត្តប្រដាល់របស់គេក៏ធំគួរសមដែរ ជាមួយនឹងការវាយលឿន រហ័សរហួន និងបម្លាស់ទីបានរហ័ស។ អ្នកប្រដាល់រូបនេះ មិនសូវជាចូលចិត្តវាយពីប្រយោលទេ គឺភាគច្រើនចូលកៀក និងចាប់អោយវាយជង្គង់ កែងយកតែម្តង។
ចំណែក ចាន់ ប៊ុនហឿន គេរាងស្ពឹកបន្តិច តែមានស្នៀតប្រដាល់ល្អ និងតិចនិកប្រកួតល្អដែរ ។ តែយ៉ាងណា មិនដឹងថាគេអាចឈ្នះ សុភ័ក្រ បានឬអត់នោះទេ នៅក្នុងការជួបគ្នាលើកនេះ ព្រោះប៊ុនហឿន រាងអន់ខ្សោយកម្លាំងស៊ុហ្វនោះ។ តែយ៉ាងណា ប៊ុនហឿន មានផ្លែជង្គង់ល្អណាស់ ហើយខ្ពស់ល្អថែមទៀត។
ការប្រកួតចុងក្រោយ ចាន់ ប៊ុនហឿន បានផ្ដួលឈាន រស្មី អ្នកប្រដាល់ក្លិបបង្ក្រាបគ្រឿងញៀនខេត្តរតនគិរី ក្នុងទឹកទី២ (ថ្ងៃទី២២ ខែវិច្ឆិកា ឆ្នាំ២០១៤) ឯ វ៉ែន សុភ័ក្រ ប្រកួតចុងក្រោយវាយឈ្នះ ឃីម សាវ៉េត អ្នកប្រដាល់ក្លិបព្រះខ័នរាជ្យដោយពិន្ទុ (ថ្ងៃទី២៥ ខែមករា ឆ្នាំ២០១៥)។ ចាំមើល ចាន់ ប៊ុនហឿន និង វ៉ែន សុភ័ក្រ តើនរណាឈ្នះសម្រាប់ការជួបគ្នាលើកដំបូងនេះ ?
សល់ រីប៊ែល អ្នកប្រដាល់ក្លិបកុសលកីឡានឹងជួបប្រកួតជាមួយ វ៉ែន ហុនជីវ៉ុង អ្នកប្រដាល់ក្លិបកងកេងមានរិទ្ធខេត្តបាត់ដំបង។ ពីរនាក់នេះពុំដែលជួបគ្នាទេកន្លងមក។
អ្នកប្រដាល់ទាំងពីរនេះមានសមត្ថភាពប្រហាក់ប្រហែលគ្នាប៉ុណ្ណោះ បើតាមការកត់សម្គាល់ឃើញពួកគេប្រកួតកន្លងមកនោះ។ វ៉ែន ហុនជីវ៉ុងនេះ ទើបតែបង្ហាញមុខនៅសង្វៀនភ្នំពេញ២-៣ដងនេះទេ តែគេវាយល្អនិងខ្លាំងគួរសមដែរ។ គេប្រកួតចុងក្រោយវាយឈ្នះ នូវ ស៊ីថា អ្នកប្រដាល់ក្លិបតាឡីដំរីមានរិទ្ធដោយពិន្ទុ។
សល់ រីប៊ែល គេក៏វាយខ្លាំងដែរ ដែលការប្រកួតចុងក្រោយនេះ គេបានវាយឈ្នះ មាស ឆូយ ក្លិបសុភានូដោយពិន្ទុ។ រវាង សល់ រីប៊ែល និង វ៉ែន ហុនជីវ៉ុងនេះ បើតាមការសន្និដ្ឋាននោះ សល់ រីប៊ែលអាចជាអ្នកឈ្នះក្នុងការប្រកួតនេះ ព្រោះរីប៊ែលខ្ពស់ជាងជីវ៉ុង។
ផូ សុភី អ្នកប្រដាល់ក្លិបអេភូថងកីឡា ត្រូវប្រកួតជាមួយ ចាន់ វិរៈ អ្នកប្រដាល់ក្លិបនិរោធមានជ័យ។ ពួកគេទាំងពីរនេះជាអ្នកប្រដាល់ថ្មីថ្មោងប៉ុណ្ណោះ៕
0 Comments