ភ្នំពេញ ៖ ជ័យ ប៊ុនសង់ អ្នកប្រដាល់ក្លិបគីសែនមានរិទ្ធនឹងត្រូវជួបប្រកួតជាមួយជើងចាស់ ឆាយ មាស អ្នកប្រដាល់ក្លិបសំរោងកោងកីឡាខេត្តបាត់ដំបង នាយប់ថ្ងៃអាទិត្យ ទី០៨ ខែកុម្ភៈនេះ នៅលើសង្វៀនSEA-TV។ ពីរនាក់នេះមិនធ្លាប់ដែលប៉ះគ្នាទេកន្លងមក។ ការផ្គូផ្គង ឆាយ មាស ឲ្យជួបជាមួយ ជ័យ ប៊ុនសង់ អ្នកប្រដាល់ស្រករក្រោយនេះ ដោយសារតែ ឆាយ មាស ឥឡូវគេរាងចាស់ស្រុតធ្លាក់មិនខ្លាំងដូចពីមុននោះ។
ជ័យ ប៊ុនសង់ ជាអ្នកប្រដាល់ជើងខ្លាំង ក្នុងចំណោមអ្នកប្រដាល់ស្រករក្រោយ ក្នុងទម្ងន់៦០គីឡូក្រាម។ និយាយរួមគេពុំសូវដែលជួបប្រកួតជាមួយអ្នកប្រដាល់ជើងចាស់ប៉ុន្មានទេ។ តែយ៉ាងណា ប៊ុនសង់គេវាយល្អ វាយមានផ្លែ ហើយចិត្តប្រដាល់របស់ក៏ធំគួរសមដែរ។ គេប្រកួតចុងក្រោយនេះវាយស្មើជាមួយ លាស់ យីន(រាជសីហ៍បាបា)ក្លិបសម្រែករាជសីហ៍បង្ក្រាបគ្រឿងញៀន។
ទោះបីជាយ៉ាងនេះក្តី ជួបជាមួយឆាយ មាស គឺជ័យ ប៊ុនសង់ ក៏ប្រហែលជាពិបាកនឹងឈ្នះដែរ ព្រោះថា ឆាយ មាស គេមានផ្លែល្អ និងមានកលល្បិចក្នុងការប្រកួតច្រើនទៀតផង។ ឆាយ មាស អន់តែកម្លាំងកាយសម្បទា(ស៊ុហ្វ)ប៉ុណ្ណោះ ស្នៀតទាត់ កណ្ដាប់ដៃ ជង្គង់ កែងរបស់គេនៅតែល្អដដែលទេ។ អ្នកប្រដាល់ ឆាយ មាស ប្រកួតចុងក្រោយនេះ វាយចាញ់ មាស ច័ន្ទមាន អ្នកប្រដាល់ក្លិបកីឡាក្រសួងការពារជាតិដោយពិន្ទុ។ ចាំមើលរវាង ឆាយ មាស និង ជ័យ ប៊ុនសង់នេះ តើអ្នកណាជាអ្នកឈ្នះនៅក្នុងការជួបគ្នាលើកដំបូងនេះ ? ម៉ាត់ ឆ្វេង អ្នកប្រដាល់ក្លិបក្រសួងការពារជាតិនឹងជួបប្រកួតជាមួយ អាន មុន្នី អ្នកប្រដាល់ក្លិបសុភានូមានជ័យ។ ពីរនាក់នេះមិនដែលជួបគ្នាទេពីមុនមក។
ម៉ាត់ ឆ្វេង ជាអ្នកប្រដាល់វ័យក្មេង តែមានស្នៀតប្រដាល់និងបទពិសោធន៍ដូចអ្នកប្រដាល់ជើងចាស់ដែរ។ អ្នកប្រដាល់ស្រករៗគេ មិនងាយយកឈ្នះគេបាននោះឡើយ។ ឆ្វេងមានកណ្ដាប់ដៃ និងជើងទាត់ល្អ និងធ្ងន់ ហើយការវាយចេញក៏លឿនរហ័សណាស់ដែរ។ តែការប្រកួតចុងក្រោយរបស់គេ គឺវាយចាញ់ពិន្ទុ ម៉ន រដ្ឋា អ្នកប្រដាល់ក្លិបការិយាល័យទី៥កងទ័ពជើងគោក។
ប៉ុន្តែការជួបប្រកួតជាមួយ អាន មុន្នីនេះ ម៉ាត់ ឆ្វេង ប្រហែលជាមិនចាញ់នោះទេ ព្រោះ មុន្នីនេះ ត្បិតតែគេជាអ្នកប្រដាល់ចាស់វស្សា ប៉ុន្តែគេវាយអន់និងមិនសូវដែលឈ្នះនរណាទេកន្លងមក។
អាន មុន្នី គេបានតែកម្លាៗទេ រឿងវាយខ្លាំងគឺមិនខ្លាំងឡើយ។ ប្រកួតដប់ដងឈ្នះគេម្តងប៉ុណ្ណោះ។ ដូច្នេះប៉ះជាមួយ ម៉ាត់ ឆ្វេង ប្រហែលជាទៅមិនរួចទេ។ តែយ៉ាងណាមិនអាចទាយមុនបានឡើយ ព្រោះថា ម៉ាត់ ឆ្វេង ពេលខ្លះក៏វាយអន់ដែរ។ ការប្រកួតចុងក្រោយនេះ ម៉ាត់ ឆ្វេង គេវាយចាញ់ ម៉ន រដ្ឋា ក្លិបការិយាល័យទី៥កងទ័ពជើងគោកដោយពិន្ទុ។ ចំណែកការប្រកួតចុងក្រោយរបស់អាន មុន្នី គេវាយស្មើពិន្ទុជាមួយអ្នកប្រដាល់ យិន បូរិន ក្លិបអាស៊ីកីឡា។
ឃីម សាវ៉េត អ្នកប្រដាល់ក្លិបព្រះខ័នរាជ្យនឹងជួបប្រកួតជម្រះបញ្ជីជាមួយ ហេង វាសនា អ្នកប្រដាល់ក្លិបព្រៃទទឹងខេត្តបាត់ដំបង។ ពួកគេពីរនាក់នេះធ្លាប់ជួបគ្នាពីរលើកហើយកន្លងមក ដោយវាយឈ្នះ ចាញ់ គ្នាដោយពិន្ទុម្តងម្នាក់។
ហេង វាសនា និង ឃីម សាវ៉េតនេះ ជាអ្នកប្រដាល់ស្រករក្រោយដូចគ្នា និងមានសមត្ថភាពបច្ចេកទេសប្រហាក់ប្រហែលគ្នា។ វាសនា គេវាយរាងយឺតមិនសូវរហ័សរហួន និងមិនសូវមានកលល្បិចក្នុងការប្រកួតទេ។ អ្នកប្រដាល់រូបនេះមិនសូវជាចូលចិត្តវាយពីប្រយោលទេ គឺភាគច្រើនចូលកៀក។ ចំណែក ឃីម សាវ៉េត គេក៏រាងស្ពឹកបន្តិចដែរ តែមានស្នៀតប្រដាល់ល្អ និងតិចនិកប្រកួតល្អ ។ តែយ៉ាងណា មិនដឹងថាគេអាចឈ្នះហេង វាសនា បានឬអត់នោះទេនៅក្នុងការជួបគ្នាលើកនេះ ?
ការប្រកួតចុងក្រោយ ឃីម សាវ៉េត វាយចាញ់វ៉ែន សុភ័ក្រ អ្នកប្រដាល់ក្លិបទ័ពឆ័ត្រយោង៩១១ដោយពិន្ទុ ឯ ហេង វាសនា ប្រកួតចុងក្រោយវាយចាញ់ សូត្រ ប៊ុនធី ក្លិបបក្សីស្លាបដែកដោយពិន្ទុដែរ ។ ចាំមើលជួបគ្នាលើកទី៣នេះ តើនរណាជាអ្នកឈ្នះនោះ?
សយ ជ័យ អ្នកប្រដាល់ក្លិបឌីណាព្រែកលៀបជួបជាមួយ តក់ រដ្ឋា អ្នកប្រដាល់ក្លិបអេភូថងកីឡា។ ពីរនាក់នេះជាអ្នកប្រដាល់ជើងថ្មីដូចគ្នា ។ ដូចនេះការជួបប្រកួតគ្នានេះពុំដឹងថាអ្នកណាជាអ្នកឈ្នះនោះឡើយ៕
0 Comments