លោកប្រធានាធិបតី Donald Trump បាននិយាយកាលពីថ្ងៃពុធថា សហរដ្ឋអាមេរិកនឹងបញ្ជូនទាហានប្រដាប់អាវុធទៅកាន់ព្រំដែនភាគខាងត្បូងបន្ទាប់ពីទាហានម៉ិកស៊ិកកាលពីពេលថ្មីៗនេះ បានភ្ជង់កាំភ្លើងដាក់កងទ័ពអាមេរិកដែលជាហេតុបង្កើនសង្គ្រាមពាក្យសំដីរបស់លោកជាមួយប្រទេសម៉ិកស៊ិកស្ដីពីបញ្ហាអន្តោប្រវេសន៍។
លោក Trump ទំនងជាសំដៅទៅលើឧប្បត្តិហេតុកាលពីថ្ងៃទី១៣ខែមេសាដែលកាលនោះ ទាហានម៉ិកស៊ិកត្រូវបានគេរាយការណ៍ថាបានចោទសួរនិងភ្ជង់អាវុធរបស់ខ្លួនលើកងទ័ពអាមេរិកចំនួនពីរនាក់ដែលកំពុងធ្វើការឃ្លាំមើលនៅតាមព្រំដែន។
លោកបានបង្ហោះ Twitter ថា “ទាហានម៉ិកស៊ិកកាលពីពេលថ្មីៗនេះបានភ្ជង់កាំភ្លើងលើទាហានឆ្មាំជាតិរបស់យើង។ នេះប្រហែលជាយុទ្ធវិធីបង្វែរសម្រាប់អ្នកជួញដូរថ្នាំញៀននៅតាមព្រំដែនហើយមើលទៅ។ យល់ល្អសូមកុំឲ្យរឿងនេះកើតឡើងម្តងទៀតឲ្យសោះ”។លោកបន្តថា “ឥឡូវនេះ យើងនឹងបញ្ជូនទាហានប្រដាប់អាវុធទៅកាន់ព្រំដែន។ ប្រទេសម៉ិកស៊ិកមិនបានធ្វើសកម្មភាពគ្រប់គ្រាន់ក្នុងការចាប់ខ្លួននិងប្រគល់មកវិញទេ!”។
ស្របពេលជាមួយគ្នានោះដែរ ប្រធានាធិបតីម៉ិកស៊ិកលោក Andres Manuel Lopez Obrador បាននិយាយថា រដ្ឋាភិបាលរបស់លោកនឹងវិភាគលើឧបទ្ទវហេតុនេះហើយយកចិត្តទុកដាក់លើមតិយោបល់របស់លោក Trump និងធ្វើសកម្មភាពស្របតាមច្បាប់នៅក្នុងក្របខ័ណ្ឌនៃអធិបតេយ្យភាពរបស់យើង។
ទោះបីជាយ៉ាងណាក៏ដោយ វាមិនច្បាស់ទេថាតើលោក Trump បានបង្ហាញពីការដាក់ពង្រាយថ្មីឬការផ្លាស់ប្តូរណាមួយលើកងទ័ពសហរដ្ឋអាមេរិកនៅតាមព្រំដែន។មន្ត្រីមន្ទីរបញ្ចកោណបានប្រាប់ AFP ថា មន្ត្រីភារកិច្ចសកម្មមួយចំនួនក្នុងចំណោម២,៩០០នាក់និងទាហានឆ្មាំជាតិ២,០០០នាក់ដែលដាក់ពង្រាយនៅព្រំដែនគឺតែងតែត្រូវបានប្រដាប់ដោយអាវុធសម្រាប់តែការការពារកងកម្លាំងប៉ុណ្ណោះ។
មេបញ្ជាការភាគខាងជើងអាមេរិកបាននិយាយថា ទាហានអាមេរិកពីរនាក់ដែលជាប់ពាក់ព័ន្ធនៅក្នុងឧប្បត្តិហេតុកាលពីថ្ងៃទី១៣ខែមេសាគឺស្ថិតនៅក្នុងរថយន្តខណៈធ្វើប្រតិបត្ដិការគាំទ្រព្រំដែននៅព្រំប្រទល់ខាងអាមេរិកនៅពេលពួកគេត្រូវបានតាមប្រកៀកដោយបុគ្គលិកយោធាម៉ិកស៊ិកពីប្រាំទៅប្រាំមួយនាក់។គួរបញ្ជាក់ថា ឧបទ្ទវហេតុនេះបានកើតឡើងនៅភាគខាងជើងនៃទីក្រុង Rio Grande ក្នុងរដ្ឋ Texas៕ AFP
Source: Kampuchea Thmey Daily
0 Comments