បើករថយន្តលុចស៊ីសទាំងស្រវឹង បោះពួយ មកបុករ៉ឺម៉កម៉ូតូទាំងកំរោល ស្លាប់ជនបរទេស២នាក់ និងខ្មែរម្នាក់

ភ្នំពេញ ៖ យ៉ាងហោចណាស់ជនបរទេស២នាក់ និងបុរសខ្មែរម្នាក់ទៀត ដែលជាអ្នកបើករ៉ឺម៉កម៉ូតូ បានស្លាប់ទាំងអស់គ្នា ដោយសារតែត្រូវបុរសស្រវឹងស្រាជោកជាំម្នាក់ បានបើករថយន្តឡិចស៊ីស៣៣០ លឿន ដូចហោះ រេចង្កូមកបុកទាំងកំរោល នៅចំណែកផ្លូវម្ខាង នៃរ៉ឺម៉កកង់បីដឹកជនបរទេសនោះ បើកបញ្ច្រាសទិសដៅគ្នាពេញទំហឹង និងអូសជាច្រើនម៉ែត្រ បណ្តាលឲ្យស្លាប់រដូករណែលពេញកន្លែងកើតហេតុតែម្ដង។

ហេតុការណ៍គ្រោះថ្នាក់ដ៏រន្ធត់នោះ បានកើតឡើងនៅម៉ោង២និង៣០នាទីយប់ ថ្ងៃទី០២ ខែមីនា ឆ្នាំ២០១៩ តាមបណ្ដោយផ្លូវព្រះស៊ីសុវត្ថិ កែងផ្លូវលេខ១៨៤ ចំណុចមុខព្រះបរមរាជវាំង ស្ថិតក្នុងសង្កាត់ជ័យជំនះ ខណ្ឌដូនពេញ។

ប្រភពព័ត៌មានពីអ្នកដែលបានឃើញហេតុការណ៍គ្រោះថ្នាក់ដ៏រន្ធត់នោះ បានប្រាប់ឲ្យដឹងថា នៅមុនពេលកើតហេតុគេឃើញរថយន្តមួយគ្រឿង ម៉ាក LEXUS RX330 ពណ៌ខ្មៅ ពាក់ស្លាកភ្នំពេញ 2AX-5853 បើកបរដោយបុរសម្នាក់ ដែលទើបចេញពីផឹក មានសភាពស្រវឹងធ្លាក់ភ្នែក បានបើកបោះពួយយ៉ាងលឿនដូចហោះ តាមបណ្ដោយផ្លូវព្រះស៊ីសុវត្ថិ ក្នុងទិសដៅពីត្បូងទៅជើង លុះមកដល់ចំណុចមុខព្រះបរមរាជវាំង ស្រាប់តែរថយន្តរេចង្កូតងាកមកខាងឆ្វេងជ្រុលទៅបុករ៉ឺម៉កកង់បីចំពេញពីមុខពេញទំហឹង អូសជាង៥០ម៉ែត្រ បណ្ដាលឲ្យជនជាតិបរទេស២នាក់ ដែលជិះលើរ៉ឺម៉កម៉ូតូនោះត្រូវបែកក្បាលហូរឈាមស្លាប់ភ្លាមៗនៅនឹងកន្លែង។

ប្រភពព័ត៌មានបានបន្តទៀតថា ចំណែកឯបុរសខ្មែរដែលជាអ្នកបើករ៉ឺម៉កនោះ បានស្លាប់នៅពេលបញ្ជូនទៅកាន់មន្ទីរពេទ្យកាល់ម៉ែត។ រីឯអ្នកបើកបររថយន្តបង្កវិញ មិនចេញពីកន្លែងកើតហេតុទេហើយត្រូវបានសមត្ថកិច្ចឃាត់ខ្លួន យកទៅប៉ុស្តិ៍នគរបាលជ័យជំនះ ដើម្បីធ្វើការសាកសួរនាំផងដែរ។

សមត្ថកិច្ចបញ្ជាក់ថា គ្រោះថ្នាក់ចរាចរណ៍ គឺបង្កឡើងដោយរថយន្ត RX330 ពណ៌ខ្មៅ ពាក់ស្លាកលេខ 2 AX 5853 ភ្នំពេញបើកបរ ដោយឈ្មោះ ហ៊ែល វណ្ណៈ ភេទប្រុស កើតថ្ងៃទី០៥ ខែតុលា ឆ្នាំ១៩៨៦មានស្រុកកំណើត នៅឃុំមេសរជ្រៃ ស្រុកស្ទឹងត្រែង ខេត្តកំពង់ចាម និងទីលំនៅបច្ចុប្បន្នភូមិមានលាភ សង្កាត់សុខដុម ក្រុងសែនមនោរម្យ ខេត្តមណ្ឌលគិរី។ ដោយបើករថយន្តបុកជាមួយរ៉ឺម៉កម៉ូតូ គ្មានស្លាកលេខ និង បណ្តាលឲ្យអ្នកបើករ៉ឺម៉កកង់បី ឈ្មោះ យឹម ស៊ីដូន ភេទប្រុស អាយុ៣១ឆ្នាំមុខរបររត់កង់បី មានស្រុកកំណើតនៅភូមិអូរបាក់ត្រា ឃុំព្រិល ស្រុកភ្នំក្រវាញ ខេត្តពោធិ៍សាត់ (ស្លាប់) អ្នករួមដំណើរជនបរទេស ទី១-ឈ្មោះ ARTTU JOHANNES HIETA មុខរបរទេសចរណ៍។ ទី២-ឈ្មោះ LASSE MIKAEL APAJASALM (ស្លាប់ទាំងពីរ មិនដឹងសញ្ជាតិ)។

ក្នុងហេតុការណ៍នេះដែរ ក្រោយរថយន្តបុករ៉ឺម៉កម៉ូតូ មិនទាន់អស់ល្បឿន ក៏ទៅបុកម៉ូតូហុងដាC 100 ដែលចតស្ងៀមបណ្ដាលឲ្យ ខូចស្រាល ម្ចាស់ម៉ូតូ មិនរបួសទេ ឈ្មោះ ស៊ុំ ហ៊ីម ភេទប្រុស អាយុ៣៣ឆ្នាំ បុគ្គលិកក្រុមហ៊ុន ស្នាក់នៅផ្ទះលេខ 146 Eoz ផ្លូវ 63 សង្កាត់ចតុមុខ ខណ្ឌដូនពេញ។

សមត្ថកិច្ចបញ្ជាក់ថា ករណីនេះបានប្រគល់ឲ្យចរាចរណ៍ក្រុង វាស់វែងយកមករក្សាទុកនៅនគរបាលចរាចរណ៍ក្រុង ដើម្បីដោះស្រាយ។

បច្ចុប្បន្ន សពទាំង៣នាក់ ត្រូវបានដឹកយកទៅតម្កល់នៅឯវត្តស្ទឹងមានជ័យ ដើម្បីរង់ចាំសាច់ញាតិមកទទួលយកទៅធ្វើបុណ្យតាមប្រពៃណី៕