ព្រះវិហារ ៖ កម្លាំងនគរបាលក្រុងព្រះវិហារសហការជាមួយការិយាល័យនគរបាលជំនាញបង្ក្រាបគ្រឿងញៀននៃស្នងការដ្ឋាននគរបាលខេត្តចុះបង្ក្រាបទីតាំងប្រើប្រាស់និងជួញដូរគ្រឿងញៀនមួយសំបុកធំនិងដកហូតបានវត្ថុតាងបទល្មើសមួយចំនួនកាលពីវេលាម៉ោង២និង៣០នាទីរសៀលថ្ងៃទី១៩តុលា២០១៥ស្ថិតនៅភូមិទ្បឥដ្ឋ សង្កាត់កំពង់ប្រណាក ក្រុងព្រះវិហារ។
ការចុះបង្ក្រាបនេះដឹកនាំដោយលោកវរសេនីយ៍ត្រីគង់ គាអធិការនគរបាលក្រុងព្រះវិហារដោយមានបញ្ជាពីលោកស្រេង វុទ្ធាព្រះរាជអាជ្ញារងអមសាលាដំបូងខេត្ត។
លោកវរសេនីយ៍ត្រីគង់ គាអធិការនគរបាលក្រុងព្រះវិហារបានឲ្យដឹងថា ទីតាំងបង្ក្រាបបទល្មើសគ្រឿងញៀនស្ថិតនៅលំនៅដ្ឋានមួយកន្លែងដែលមានម្ចាស់ឈ្មោះលីវវឌ្ឍនៈ ភេទប្រុសអាយុ៣៨ឆ្នាំមុខរបរយោធា។ សមត្ថកិច្ចដកហូតបានវត្ថុតាងបទល្មើសមួយចំនួនរួមមានជញ្ជីងថ្លឹងគ្រឿងញៀនចំនួន៤គ្រឿង,ថ្នាំញៀន១កញ្ចប់ធំនិង២កញ្ចប់តូច,គ្រាប់អាវុធខ្លីកា៥៤ចំនួន០៨គ្រាប់,ទូរស័ព្ទដៃ០៥គ្រឿង,លុយខ្មែរ៤៥៧០០០រៀល,២ដុល្លារនិងសម្ភារៈប្រើប្រាស់សេពគ្រឿងញៀនមួយចំនួនធំ។
លោកអធិការនគរបាលបញ្ជាក់ថា ជាលទ្ធផលសមត្ថកិច្ចបានឃាត់ខ្លួនបុរសជាជនសង្ស័យចំនួន៨នាក់រួមមានទី១ឈ្មោះលីវ វឌ្ឍនៈអាយុ៣៨ឆ្នាំមុខរបរយោធាជាម្ចាស់ទីតាំងទី២ឈ្មោះជាសុភ័ក្ដ្រ អាយុ៣៨ឆ្នាំរស់នៅរាជធានីភ្នំពេញ ទី៣ពេជ្រ ប៊ុនយីម អាយុ៣៣ឆ្នាំមានទីលំនៅភូមិសំរោងសង្កាត់កំពង់ប្រណាក ក្រុងព្រះវិហារ។ ទី៤ឈ្មោះអ៊ឹង រដ្ឋាអាយុ២១ឆ្នាំនៅភូមិទ្បឥដ្ឋ ទី៥ឈ្មោះម៉ូកែវអាយុ១៥ឆ្នាំ នៅភូមិទ្បឥដ្ឋ ទី៦ឈុន ហាក់ អាយុ៣០ឆ្នាំនៅភូមិភារកិច្ច សង្កាត់ប៉ាលហាល ក្រុងព្រះវិហារ ទី៧សុកសាយ អាយុ១៧ឆ្នាំ នៅភូមិទ្បឥដ្ឋនិងទី៨ឈ្មោះវ៉ាន់ ចាន់ថេន អាយុ៣៦ឆ្នាំនៅភូមិគោកបេង សង្កាត់កំពង់ប្រណាក ក្រុងព្រះវិហារ។
លោកអធិការនគរបាលក្រុងព្រះវិហារថ្លែងថា នៅព្រឹកថ្ងៃទី២០ ខែតុលា ឆ្នាំ២០១៥នេះសមត្ថកិច្ចនគរបាលក្រុងព្រះវិហារកំពុងរៀបចំកសាងសំណុំរឿងរីឯជនសង្ស័យទាំង៨នាក់នាំទៅឃុំខ្លួនផ្ញើនៅស្នងការដ្ឋាននគរបាលខេត្តដោយសារនៅអធិការដ្ឋាននគរបាលក្រុងព្រះវិហារមិនទាន់មានកន្លែងឃុំខ្លួនជនសង្ស័យបានល្អនៅឡើយ។
ភ្នាក់ងាររាយការណ៍ពីតំបន់ព្រំដែនប្រាសាទព្រះវិហារថា សំរាប់ខេត្តព្រះវិហារបទល្មើសគ្រឿងញៀនមិនបានហូរចូលពីខេត្តដទៃនោះឡើយគឺអាចមានមនុស្សទុច្ចរិតមានអំណាចបុណ្យសក្ដិនាំចូលតាមច្រកសំខាន់ៗជុំវិញតំបន់ប្រាសាទព្រះវិហារជាប់ព្រំដែនថៃរហូតដល់ច្រកមុំ៣ថែមទៀត។
ជាពិសេសតាមច្រកព្រំដែនទឹកកម្ពុជា-ឡាវនៅកំពង់ស្រទ្បៅក្នុងស្រុកឆែបកំពុងមានឈ្មោះល្បីហូរចូលបទល្មើសគ្រឿងញៀនឆ្លងដែនចូលមកខ្មែរខ្លាំងជាងគេនៅទូទាំងខេត្តព្រះវិហាររីឯសមត្ថកិច្ចលំអក្រុងមានគ្រប់ស្ថាប័នប្រចាំការនៅទីនោះប្រៀបដូចទីងមោងចាំស្រែតែប៉ុណ្ណោះ៕
ជនសង្ស័យប្រើប្រាស់និងជួញដូរគ្រឿងញៀន០៨នាក់ត្រូវនគរបាលឃាត់ខ្លួននិងដកហូតបានវត្ថុតាងមួយចំនួនធំ
0 Comments