ភ្នំពេញ ៖ លោក សួន សេរីរដ្ឋា ប្រធានគណបក្សអំណាចខ្មែរ ដែលទើបមកពីអាមេរិកចូលមកដល់ប្រទេសកម្ពុជា កាលពីថ្ងៃទី០១ ខែតុលា ឆ្នាំ២០១៥ ថ្មីៗនេះ បានទទួលស្គាល់ថា នៅប្រទេសសកម្ពុជា ក៏ដូចជានៅរាជធានីភ្នំពេញ ពិតជាមានការសាងសង់ច្រើនមែន តែមិនមែនជាការអភិវឌ្ឍន៍ទេ ពីព្រោះជាការសាងសង់មួយដែលមិនត្រឹមត្រូវតាមស្តង់ដារបច្ចេកទេស។
លោក សួន សេរីរដ្ឋា ថ្លែងបែបនេះនៅក្នុងសន្និសីទសារព័ត៌មានមួយនៅទីស្នាក់ការគណបក្ស ដែលស្ថិតនៅសង្កាត់ទឹកល្អក់ទី១ ខណ្ឌទូលគោក ក្រោមប្រធានបទ “តើប្រទេសខ្មែរ ពិតជាមានការអភិវឌ្ឍន៍មែន ឬមិនមែន” កាលពីព្រឹកថ្ងៃទី២០ ខែតុលា ឆ្នាំ២០១៥ ប៉ុន្តែមន្ត្រីរាជរដ្ឋាភិបាលបានអះអាងថា ការអភិវឌ្ឍន៍ប្រទេសមិនមែនបំពេញចិត្តអ្នកនយោបាយ ឬលោក សួន សេរីរដ្ឋា នោះទេ។
លោក សួន សេរីរដ្ឋា បានបញ្ជាក់ថា ការអភិវឌ្ឍន៍ត្រឹមត្រូវជាការអភិវឌ្ឍន៍មានប្លង់មេ តាមបទដ្ឋានបច្ចេកទេស មានកិច្ចសហការគ្នាបានត្រឹមត្រូវ ប៉ុន្តែនៅរាជធានីភ្នំពេញ គេឃើញមានផ្លូវមួយចំនួនសាងសង់រួចហើយ បែរជាត្រូវជីកកាយដាក់លូឡើងវិញ ដែលហាក់ដូចជាគ្មានការពិភាក្សារវាងអ្នកពាក់ព័ន្ធទាល់តែសោះ។ លោកបញ្ជាក់ថា “ការអភិវឌ្ឍន៍ត្រឹមត្រូវ គឺជាការសាងសង់មួយដែលមានប្លង់មេ តាមបទដ្ឋានបច្ចេកទេស ដូចជាតំបន់សេដ្ឋកិច្ច តំបន់ពាណិជ្ជកម្ម និងតំបន់ផ្សេងៗទៀតដាច់ដោយឡែកពីគ្នា ងាយស្រួលដល់ការសំគាល់របស់ភ្ញៀវទេសចរ ឬអ្នកវិនិយោគបរទេសដែលចូលមកប្រទេសកម្ពុជា ប៉ុន្តែនៅភ្នំពេញមិនមានការរៀបចំបែបនេះទេ គឺឲ្យតែអ្នកណាមានលុយ អាចសាងសង់យ៉ាងម៉េចក៏បាន”។
ដោយឡែកប្រព័ន្ធលូនៅភ្នំពេញវិញ លោក សួន សេរីរដ្ឋា បានអះអាងថា ឲ្យតែមានភ្លៀងមួយមេ គឺលិចតែម្តង ដែលការលិចបែបនេះ យូរៗទៅនឹងធ្វើឲ្យពុកផុយទៅដល់គ្រឹះសំណង់អាគារ ហើយអាចនឹងបាក់ស្រុតបង្កគ្រោះថ្នាក់ដល់អាយុជីវិតប្រជាពលរដ្ឋ។
ទាក់ទងនឹងការលើកឡើងរបស់លោក សួន សេរីរដ្ឋា នេះ កម្ពុជាថ្មីមិនអាចសុំការបញ្ជាក់លោក ឡុង ឌីម៉ង់ មន្ត្រីអ្នកនាំពាក្យសាលារាជធានីភ្នំពេញបានទេ ដោយទូរស័ព្ទមិនមានអ្នកទទួល។
ចំណែកលោក ទិត សុធា ទីប្រឹក្សារាជរដ្ឋាភិបាលបានមានប្រសាសន៍កាលពីរសៀលថ្ងៃទី២០ ខែតុលា ថា ការរិះគន់ណាមួយ គឺជាសិទ្ធិរបស់អ្នកនយោបាយ ប៉ុន្តែការអភិវឌ្ឍន៍មិនមែន ដើម្បីតម្រូវចិត្តអ្នកនយោបាយទេ គឺដើម្បីតម្រូវចិត្តប្រជាពលរដ្ឋដែលជាម្ចាស់ឆ្នោត។
លោកបញ្ជាក់យ៉ាងនេះថា “នេះគឺជាការបញ្ចេញមតិរបស់អ្នកនយោបាយម្នាក់ៗ ប៉ុន្តែការវាយតម្លៃអំពីសមិទ្ធផល អំពីការងាររបស់រាជរដ្ឋាភិបាលមិនអាស្រ័យទៅលើបបូរមាត់របស់អ្នកនយោបាយទាំងនោះទេ គឺស្ថិតនៅលើទឹកចិត្តគោរពស្រឡាញ់របស់ប្រជាពលរដ្ឋ ដែលផ្តល់សេចក្តីទុកចិត្តដល់រាជរដ្ឋាភិបាលក្នុងការអភិវឌ្ឍន៍ប្រទេសជាតិ ហើយពេលនេះបាននឹងកំពុងអភិវឌ្ឍន៍ ធានានូវសុខសន្តិភាពជូនប្រជាពលរដ្ឋ ហើយនេះជាទំនុកចិត្តរបស់ប្រជាពលរដ្ឋអ្នកម្ចាស់ឆ្នោត”។
លោក ទិត សុធា បានលើកឡើងទៀតថា “អ្នកនយោបាយ មានសិទ្ធិប្រើវោហាសាស្ត្រដើម្បីធ្វើការរិះគន់ ប៉ុន្តែរាជរដ្ឋាភិបាលក៏មានសិទ្ធិបដិសេធនូវរាល់ការការរិះគន់ណា ដែលប្រាស់ចាកអំពីការពិត និងផ្ទុយពីឆន្ទៈរបស់ប្រជាពលរដ្ឋ ហើយលទ្ធផលដែលគាត់ទទួលមកវិញ គឺសំដីដែលគាត់ផ្ញើសារជូនមហាជននេះ ប៉ុន្តែសម្រាប់រាជរដ្ឋាភិបាល គឺមានតែការខិតខំប្រឹងប្រែងធ្វើការ និងការអភិវឌ្ឍន៍ ហើយអ្នកដែលនិយាយ គឺជាសិទ្ធិរបស់អ្នកដែលនិយាយ តែអ្នកធ្វើជាសិទ្ធិរបស់អ្នកធ្វើ ដើម្បីតម្រូវទឹកចិត្តរបស់ប្រជាពលរដ្ឋ មិនមែនដើម្បីតម្រូវទឹកចិត្ត អ្នកនយោបាយទេ”។
សូមបញ្ជាក់ថា លោក សួន សេរីរដ្ឋា បានរត់ចេញពីប្រទេសកម្ពុជា ទៅកាន់បរទេសតាំងពីយូរណាស់មកហើយ និងទើបតែមកដល់ប្រទេសកម្ពុជាកាលពីដើមខែនេះ ដូច្នេះលោកមើលឃើញតែប្រទេស ដែលមានការអភិវឌ្ឍន៍រាប់រយឆ្នាំតែប៉ុណ្ណោះ មិនដែលស្គាល់អ្វីដែលជាទុក្ខលំបាកដូចប្រជាពលរដ្ឋ និងប្រទេសខ្មែរក្រោយពីការបំផ្លិចបំផ្លាញខ្ទេចសល់តែផេះផង់នោះឡើយ ហើយដំណាក់កាលចុងក្រោយនេះ ទាំងជាតិ និងអន្តរជាតិ បានសរសើរស្ទើរគ្រប់មាត់អំពីការរីកចម្រើន និងអភិវឌ្ឍន៍របស់ប្រទេសកម្ពុជា ប៉ុន្តែបែរជាទទួលរងការរិះគន់ពីលោក សួន សេរីរដ្ឋា ទៅវិញ៕
មន្ត្រីរាជរដ្ឋាភិបាលថា ការអភិវឌ្ឍន៍ប្រទេសមិនមែនបំពេញចិត្តអ្នកនយោបាយនោះទេ
0 Comments