ភ្នំពេញ ៖ ប្រធានស្តីទីនាយកដ្ឋានសុខមាលភាពមនុស្សចាស់នៃក្រសួងសង្គមកិច្ច អតីតយុទ្ធជន និងយុវនីតិសម្បទាបានឲ្យដឹងថា តាមការព្យាករណ៍នៅឆ្នាំ២០២៥ខាងមុខចំនួនមនុស្សចាស់នៅកម្ពុជានឹងកើនឡើងដល់១.៥ លាននាក់។
លោក ចេង ដារ៉ាវុធប្រធានស្តីទីនាយកដ្ឋានសុខមាលភាពមនុស្សចាស់និងជាលេខាធិការ នៃលេខាធិការដ្ឋានគណៈកម្មាធិការជាតិកម្ពុជាដើម្បីមនុស្សចាស់( គ.ម.ច.)បានមានប្រសាសន៍កាលពីព្រឹកថ្ងៃទី២០ ខែតុលា នៅក្នុងកិច្ច ប្រជុំពិគ្រោះយោបល់អំពី សេចក្ដីព្រាងគោលនយោបាយជាតិសម្រាប់មនុស្សចាស់បានឲ្យដឹងថា អង្គការសហប្រជាជាតិបានកំណត់ថា មនុស្សចាស់គឺមានអាយុចាប់ពី ៦០ ឆ្នាំឡើងទៅហើយនៅព្រះរាជាណាចក្រកម្ពុជា បច្ចុប្បន្ន មនុស្សចាស់ចាប់ពី ៦០ ឆ្នាំឡើង មានប្រហែល ១ លាននាក់ ហើយមានការព្យាករណ៍ថា នៅឆ្នាំ២០២៥ អាចកើនឡើង ១.៥ លាន នាក់។
លោកបានបន្តថា មនុស្សចាស់ភាគច្រើនកម្ពុជារស់នៅតាមតំបន់ជនបទដែលជាទីកន្លែងមានជីវភាពមិនសូវធូរធារ ខ្វះការយល់ដឹងផ្នែកអនាម័យ និងផ្នែកសុខភាព។ ជាទូទៅ មនុស្សចាស់ជាច្រើនតែងតែរស់នៅជាមួយកូនឬចៅ ឬរស់នៅតាមទីវត្ដអារាម។ នៅតាមគ្រួសារក្រីក្រការថែទាំមនុស្សចាស់នៅមានកម្រិតបណ្ដាលឲ្យមនុស្សចាស់ត្រូវប្រឈមមុខនឹងការដោះស្រាយជីវភាពរបស់ពួកគាត់ដោយខ្លួនឯង ក្នុងការរកប្រាក់ចំណូលប្រចាំថ្ងៃ ដោយសារកម្លាំងទន់ខ្សោយ និងសុខភាពទ្រុឌទ្រោម និងមានការលំបាក។
លោកបានបញ្ជាក់ថា ចំណែកមនុស្សចាស់ជាស្ដ្រីមិនត្រឹមតែមានការថែទាំខ្លួនឯង ថែមទាំងទទួលបន្ទុកជាមេគ្រួសារ ក្នុងការមើលថែទាំចៅៗ ដែលនៅជាមួយដោយសារឪពុកម្ដាយ ត្រូវធ្វើចំណាកស្រុកទៅប្រកបមុខរបរនៅកន្លែងឆ្ងាយ ឬទទួលមរណៈភាពដោយសារគ្រោះថ្នាក់ចរាចរណ៍ និងជម្ងឺផ្សេងៗទៀត។
លោក លីម ឆាយ អនុរដ្ឋលេខាធិការនិងជាប្រធាន លេខា ធិការដ្ឋានគ.ម.ច. បានមានប្រសាសន៍នៅក្នុងប្រជុំពិគ្រោះយោបល់អំពី“សេចក្ដីព្រាងគោលនយោបាយជាតិសម្រាប់មនុស្សចាស់”ថាក្នុងគោលបំណងលើកកំពស់កិច្ចគាំពារដ៏មានប្រសិទ្ធភាព និងសំដៅលើកស្ទួយសុខុមាលភាពរបស់មនុស្សចាស់ រាជរដ្ឋាភិបាលបានចេញអនុក្រឹត្យលេខ ១៥៨អនក្រ.បកស្ដីពីការបង្កើតគណៈកម្មាធិការជាតិកម្ពុជាដើម្បីមនុស្សចាស់ដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា និងជាប្រធាន កិត្ដិយស រដ្ឋមន្ដ្រីជាប្រធានហើយគណៈកម្មាធិការជាតិបានរៀបចំយន្ដការនៅថ្នាក់ជាតិ និងថ្នាក់ក្រោមជាតិ ដែលមានតួនាទីភារកិច្ចសំខាន់ៗដូចជារៀបចំគោលនយោបាយ ដើម្បី លើក ស្ទួយវិស័យសុខុមាលភាពមនុស្សចាស់។
រៀបចំផែនការយុទ្ធសាស្ដ្រ និងផែនការ សកម្មភាពដើម្បីដាក់ដំណើរការវិស័យសុខុមាលភាពមនុស្សចាស់។ រៀបចំសម្របសម្រួលការពិគ្រោះយោបល់នានានៅថ្នាក់ជាតិ និងថ្នាក់ក្រោមជាតិជាមួយអង្គការមិនមែនរដ្ឋាភិបាលជាតិ អន្ដរជាតិដៃគូអភិវឌ្ឍន៍និងផ្នែកឯកជនអំពីការងារវិស័យសុខុមាលភាពមនុស្សចាស់។ រៀបចំគោលការណ៍ស្ដីពីការណែនាំការបង្កើត និងគ្រប់គ្រងសមាគមមនុស្សចាស់និងគោល ការណ៍ស្ដីពីការណ៍ណែនាំការថែទាំមនុស្សចាស់គ្មានទីពឹងនៅតាមសហគមន៍។ ធ្វើការតាមដានត្រួតពិនិត្យ និងវាយតម្លៃជាប្រចាំលើការអនុវត្ដគោលនយោបាយ និងលិខិតបទដ្ឋាននានា អំពីវិស័យសុខុមាលភាពមនុស្សចាស់។
លោក លីម ឆាយ មានប្រសាសន៍ទៀតថា លេខាធិការដ្ឋាន គ.ម.ច.បន្ទាប់ពីរៀបចំយន្ដការមន្ដ្រីជំនាញបានសិក្សាស្រាវជ្រាវរៀបចំសេចក្ដីព្រាងគោលនយោបាយជាតិសម្រាប់មនុស្សចាស់(ថ្មី)ដោយដកស្រង់ចេញពីគោលនយោបាយសម្រាប់មនុស្សចាស់កាលពីឆ្នាំ២០០៣កន្លងទៅ។
លោកបានបន្ថែមទៀតថា លេខាធិការដ្ឋានគ.ម.ច.ដាក់សេចក្ដីព្រាងគោលនយោបាយជាតិសម្រាប់មនុស្សចាស់បានបើកសិក្ខាសាលាពិគ្រោះយោបល់ចាប់ពីថ្នាក់សហគមន៍ នាពេលនេះដើម្បី ពិគ្រោះ យោបល់កម្រិតមន្ដ្រីជំនាញ ដើម្បីរកអំពីបញ្ហាប្រឈមរកដំណោះស្រាយនិងអ្នកទទួលខុសត្រូវអំពីបញ្ហារបស់មនុស្សចាស់៕
ចំនួនមនុស្សចាស់នៅកម្ពុជានឹងកើនឡើងដល់១.៥ លាននាក់នៅឆ្នាំ២០២៥
0 Comments