ភ្នំពេញ ៖ លោកវរសេនីយ៍ទោ យិន បញ្ញារិទ្ធ នាយការិយាល័យអន្តរាគមន៍ “ក៩” នៃមន្ទីរប្រឆាំងបទល្មើសគ្រឿងញៀនក្រសួងមហាផ្ទៃថ្លែងថា នៅរសៀលថ្ងៃទី២៤ ខែកក្កដា ឆ្នាំ២០១៥ សមត្ថកិច្ចបានបញ្ជូនជនសង្ស័យម្នាក់មកអយ្យការអមសាលាដំបូងរាជធានីភ្នំពេញ ដើម្បីមានចំណាត់តាមផ្លូវច្បាប់ ករណីជួញដូរគ្រឿងញៀនកន្លះគីឡូក្រាម។ ជនសង្ស័យមានឈ្មោះ សុខ អាត អាយុ៥៣ឆ្នាំ មានទីលំនៅផ្ទះលេខ០៦៩ ផ្លូវលេខ១០៧ ភូមិសាមគ្គី៣ សង្កាត់ត្រពាំងក្រសាំង ខណ្ឌដង្កោ ត្រូវបានសមត្ថកិច្ចឃាត់ខ្លួនកាលពីវេលាម៉ោង៤និង៤៥នាទីល្ងាច ថ្ងៃទី២២ ខែកក្កដា ឆ្នាំ២០១៥ នៅអតីតសំណង់អគារផ្ទះល្វែង ជាប់ផ្សារបឹងព្រលឹត ស្ថិតក្នុងភូមិអូរអណ្ដូង១ សង្កាត់ព្រែកប្រា ខណ្ឌច្បារអំពៅ។
លោក យិន បញ្ញារិទ្ធ ថ្លែងថា មុនឈានដល់ការចុះបង្ក្រាបមុខសញ្ញាចែកចាយគ្រឿងញៀនដ៏ធំ និងយ៉ាងសកម្មម្នាក់នេះបាន គឺកម្លាំងសមត្ថកិច្ច បានបើកការស្រាវជ្រាវ តាមដានយ៉ាងល្អិតល្អន់ ជាង៣ខែមកហើយ រហូតទទួលបានដំណឹងច្បាស់ការណ៍ពីកន្លែងពួនសម្ងំលាក់ខ្លួនរបស់ជនសង្ស័យ ទើបកម្លាំងនគរបាល នៃមន្ទីរប្រឆាំងគ្រឿងញៀនប្រមូលកម្លាំងចុះធ្វើការបង្ក្រាបបានជាក់ស្ដែងតែម្ដង។ ក្នុងការឃាត់ខ្លួនជនសង្ស័យរូបនេះ សមត្ថកិច្ចដកហូតបានថ្នាំញៀនប្រភេទក្រាមស ថ្លា ចំនួន៥កញ្ចប់ធំ ដែលមានទម្ងន់ស្មើនឹង៥០០ក្រាម និងវត្ថុតាងមួយចំនួន៕
បញ្ជូនជនសង្ស័យម្នាក់ទៅតុលាការ ករណីជួញដូរគ្រឿងញៀនកន្លះគីឡូក្រាម
0 Comments