បាត់ដំបង ៖ គេសង្កេតឃើញថា ក្នុងមួយថ្ងៃៗសត្វស្លាបគ្រប់ប្រភេទ រាប់រយ រាប់ពាន់ក្បាល ត្រូវបានគេសម្លាប់យកមកដាក់លក់យ៉ាងអនាធិបតេយ្យ ដោយមានទាំងឆៅ និងមានទាំងឆ្អិន ដែលគេបានបំពងរួចជាស្រេចសម្រាប់ឲ្យអតិថិជនចូលទៅអង្គុយពិសារយ៉ាងឆ្ងាញ់ជាមួយនឹងទឹកត្នោតជូរ នៅតាមកញ្ចុះដែលគេបានសង់ឡើងនៅសងខាងផ្លូវ តាមបណ្តោយផ្លូវជាតិលេខ៥ ដែលមើលទៅហាក់ដូចជាមិនរំខានដល់ស្ថាប័នជំនាញណាមួយទាល់តែសោះ។
បើគេធ្វើដំណើរតាមបណ្តោយផ្លូវជាតិលេខ៥ ពីភ្នំពេញទៅបាត់ដំបង ដល់ត្រង់ចំណុចភូមិស្វាយកង់ ឃុំអន្លង់វិល ស្រុកសង្កែ ខេត្តបាត់ដំបង គេនឹងប្រទះឃើញ ទីតាំងលក់សត្វស្លាបគ្រប់ប្រភេទនេះជាមិនខាន ព្រោះប្រជាពលរដ្ឋបានសង់កញ្ចុះជាពីរជួរនៅអមសងខាងផ្លូវ ដោយមានដាក់ព្យួរនូវសត្វស្លាបប្លែកៗគ្រប់ប្រភេទ ទាំងឆៅ ទាំងឆ្អិន សម្រាប់ឲ្យអតិថិជនចូលទៅអង្គុយពិសារ ក្លែមជាមួយនឹងទឹកត្នោតជូរ ឬក៏អាចវេចខ្ចប់យកទៅផ្ញើសាច់ញាតិនៅឯផ្ទះក៏បាន។
កន្លងមកអ្នកលក់មួយចំនួនធ្លាប់បាននិយាយថា មានអង្គភាពជំនាញមួយចំនួនបានទៅយកលុយដាក់ខែជាប់ជាប្រចាំ ដោយក្នុងនោះក៏មានទាំងខាងអង្គការមួយចំនួនផងដែរ ប៉ុន្តែក្រោយមកការយកលុយនេះក៏បានស្ងប់ស្ងាត់ទៅវិញ បន្ទាប់ពីខាងអង្គការវ៉ាយអេតចុះចាប់ មួយលើកជាពីរលើករួចមក។
ថ្មីៗនេះស្ត្រីមួយរូប ដែលជាអ្នកលក់សត្វស្លាបនេះដែរបានបញ្ជាក់ប្រាប់កម្ពុជាថ្មីថា សត្វស្លាបទាំងនេះគឺមានឈ្មួញដឹកយកមកនៅពេលទៀបភ្លឺ ដើម្បីបោះដុំឲ្យលក់គឺអាចបានកម្រៃក្នុងមួយក្បាលចាប់ពី៥០០រៀល ដល់ ១ពាន់រៀល ទៅតាមសត្វតូច ឬធំតែប៉ុណ្ណោះ គួបផ្សំជាមួយនឹងទឹកត្នោតជូរបន្ថែមទៀត ដូច្នេះគាត់អាចរកបានខ្លះសម្រាប់របបប្រចាំថ្ងៃនៅក្នុងគ្រួសាររបស់គាត់ ទោះបីជាមានការចាប់ម្តងម្កាលក៏ដោយ ព្រោះវាបញ្ហាត្រង់ថា បើគាត់លក់សត្វក្រួច ដែលគេចិញ្ចឹមក្នុងស្រុកនោះ គេមិនបរិភោគឡើយគឺអ្នកទិញគេសួររក តែសត្វព្រៃតែប៉ុណ្ណោះ។
ស្ត្រីរូបនេះបានបន្តថា ថ្មីៗនេះដូចជាស្ងាត់អ្នកដែលមកសុំលុយ រីឯជំនាញក៏មិនដែលឃើញមកដែរ ប៉ុន្តែមានម្តងគឺខាងអង្គការ ដែលមានឯកសណ្ឋានបរិស្ថាន បានមកសុំសត្វឆ្អិនយកទៅបរិភោគ ដោយពួកគេមិនយកទេសត្វក្រួចដែលចិញ្ចឹម នេះសបញ្ជាក់ឲ្យឃើញថា សូម្បីតែខាងជំនាញក៏រកសត្វព្រៃហូបដែរ ពិតជាឆ្លាតមែន។
ដោយសារតែបញ្ហានេះហើយបានជាប្រជាពលរដ្ឋ ដែលលក់នៅទីនេះមិនសូវព្រួយបារម្ភនឹងការចាប់ចងទៀតនោះទេ ព្រោះខាងអស់លោកជំនាញមួយចំនួនគាត់ចូលចិត្តបរិភោគសត្វស្លាបនេះដែរ ដូច្នេះវាជាការងាយបំផុតសម្រាប់ការលួងចិត្តដល់ពួកគាត់ នេះហើយដែលជាបញ្ហាធ្វើឲ្យសត្វស្លាបនៅក្នុងតំបន់ព្រៃរនាមវិនាសហិនហោចពីមួយថ្ងៃទៅមួយថ្ងៃ គឺគ្មានការអភិរក្សទាល់តែសោះ៕
ទីផ្សារសត្វស្លាបគ្រប់ប្រភេទ កំពុងពេញនិយមនៅក្នុងភូមិស្វាយកង់
0 Comments